(龍嫂著)

去完豊洲其實我地都好攰喇, 生命力正在下降中,雖然係飛機上面都訓到少少,但始終都唔係訓得咁好,所以而家最好係去浸番個温泉, 好好舒服一下。

去大江戶温泉原本都係我地行程之內，但原本想第二日先去，而家因為無去築地而多左時間，而且豊洲有百合海鷗線直接去温泉，所以我地臨時改去大江戶温泉喇。

搭豊洲百合海鷗線真係啱哂路，唔使轉車，去到 telecom center 站落車，行三分鐘就會見到大江戶温泉。

一落車有指示牌，所以都好容易揾到。

大江戶温泉我想有好多人去過，因為係市區，都無乜邊到地方有温泉浸，去到見到個門口已經好開心喇。

大江戶温泉絶對係可以玩半日的地方，入場費 2827 yen，但如果你六時後先去到的話，只需要１９８７yen，但我地等唔到咁耐喇，因為都幾攰下，又無理由咁早番酒店，所以我地下午三點幾就入去。

但後尾先發覺，我地的選擇係正確的，因為我地走個陣時，發覺門口好多人，排隊排到打哂蛇餅咁，原來好多日本人六點後先去，貪佢入場費平些。所以唔想同人迫的話，都最好早少少去，寧願比貴些。

一入到去有個 Locker 比你放鞋，呢個係日本人的習慣，入門口一定要除鞋，然後去counter 度交錢先。

交完錢，跟住就可以揀你鐘意的日式浴衣喇。

攞左你喜歡的浴衣後，梗係去換衫啦。

女仕們最好自備個小袋仔，因為件浴衣無袋的，女仕有好多小物件拎住會比較麻煩。換好哂衫就可以出去溫泉喇。

呢度分室外同室內温泉的，如果是足浴的話，是可以男女一齊出去戶外，但如果浸全身的話，當然有分男女啦，全裸上陣，除左一條小毛巾之外，你唔可以帶任何野的。我最初都以為會尷尬，女人始終唔太習慣嘛，但入到去都覺得無乜野，仲覺得蠻free 的，哈哈。。。是個不錯的體驗啊！

呢度分幾個唔同功効的足湯，我地梗係個個都試下啦！

兩對天蠶神腳！！　哇！舒服哂。。。。

戶外除左足湯之外，仲有其它野比你玩下，呢個就係你擺對腳落，有好多魚仔會幫你食左Ｄ死皮，但要另外收費，成百蚊港紙先得十五分鐘咋！

另外有比小朋友玩的泥沙，其實就係個沙盆放些貝殼落去，等些小朋友發揾一下咁囉！

後尾發現有個要比錢的木屋，因為唔識日文，所以唔知入去做乜的，如果有人知就話我知，等我下次去試下。

除左浸温泉之外，仲有乜野可以玩到半日呢？原來仲有好多野玩的，有些似荔園的攤位遊戲啦。。。。。

龍師傅的老本行，占卜睇相問命啦。。。。

日本人至鐘意的夾公仔啦。。。

當然唔少得要有野食啦。啱哂一家大細去玩的啊！

未入去浸温泉之前，先試下個叉燒拉麵，其實這些遊玩的地方，就像香港的迪士尼和海洋公園一樣，食物質素都是一般而矣，雖然比不上出面的拉面，但還是比香港的質素好呢！

然後再來一個中華燒賣，呢個質素就真是一般喇，雖然個賣相好靚，但單靠個樣係唔得架。一籠三十元港紙，香港北苑都係差唔多價錢，但北苑好佢好多咯！

你估呢位師傅＂啄＂緊　ｄ　乜呢？原來係度＂啄＂雪糕呀，佢將　d 配料溝埋一齊然後撈埋一齊，因為頭先太飽，無食到呀，而家睇番　ｄ　相，有些後悔添！

行行下，忽然見到個忍者，睇真　ｄ　原來係個＂立＂像，一眼望埋去，真的以為是真人，後尾先知原來係假的。

有小橋流水，仲有小狗潻。。。

我地仲有做脚底按摩，不過唔可以影相，所以比唔到大家睇，脚底按摩是要另外收費的，佢有分全身同埋腳底，我地最初唔知，行左好耐先知，所以無　Ｂｏｏｋ　到時間，所以如果你想按摩的話，建議你一去到就到　Ｂｏｏｋ　左先去玩，咁樣就比較慳時間喇。

按摩技術好好，不過要二百零蚊一次，仲要係只得半個鐘，但我地果日太累，乜都唔理啦，按摩半個鐘都可以訓得著覺！

臨走前見到有表演，個個坐哂係地睇，但我地不諳日文，唔知佢講乜，但日本人就睇得好開心，係咁係度笑。玩到六點幾，都係時候要走喇，

 又黎一個總結先, 就大江戶温泉最好都係第一日去, 雖然有人會選擇第一日去迪士尼, 因為由羽田去會近些, 但這要視乎你的精神狀況, 因為搭羽田機的話, 個日都會有些累, 仲要去迪士尼排隊, 對我黎講真係死得!

仲有就係勸你都係唔好貪平, 過左六點之後真係會好多人的.