【個案分享】如何客觀分析感情讓自己有優勢?

​在感情上,我們必然要懂得邏輯分析,才會讓自己在不同的時候都能清楚評估自己的形勢或機會率,讓自己可以做長勝將軍。

有些概念一定要很清楚,就是你有清楚的邏輯思維,未必能夠讓你控制到每個男人,這是常識。

邏輯思維,是要讓你知道眼前的男人是否值得交往,是否需要及早放棄。

如果一直都是以似乎合理的解釋去開脫自己,一直都在和一些明明很不愛你又沒有結果的男人談戀愛,而自己又很想有將來,這會是一個甚麼樣的狀態?

這當然是一個無助的狀態。

但無奈,很多女生都樂於這樣,因為她們被情緒控制,而做了很多在現實生活之中對自己不利的事情,結果時間過去了,也浪費了青春,到最後甚麼也沒有。

如果是命運使然,那也說不了甚麼;但九成九的東西,其實是一早可以避免的。

這即如一開始你看到前面是掘頭路,那你還會在這個方向繼續前行嗎?

而奇怪的是,很多女生明知道前要是掘頭路,卻不停自找解釋然後扮作前面有出路一樣,而且扮得很似,浪費時間前行,越行越沒有路,越是在全力扮奇怪。

讀者來信

龍師傅你好!

一路有睇你既散文同專欄,覺得你係對男女感情分析得好好既作家,所以想講下我宜家發生既情況,希望可以得到你一d既建議,我真係好無助。

(龍師傅註:作家無分好壞,感性作家也可以很好,關鍵在於你想要甚麼,是你想要一些實用分析而可以幫助你的感情或人生,還是一團糟糕再想不停找些人安慰自己繼續沉倫及發夢,這就去到個人決定。

我的文章,只會實質地幫助大家,只會看事實,只會有最實用的分析,但有些人很不中聽的,即如網戀被人騙錢一樣,有人坦白說明了,自己卻在怪責對方為甚麼傷害自己的感情。

這不是我作出來的,這是我真實看到的事情。最近就有一位網友,她說她男朋友在印度被扣押,要她給錢給他,她很擔心,問我是不是真的。

我坦白的告訴她這是騙案,她不願意相信,還在反問我如果萬一是真的呢,那怎麼辦。

我再傳送了大量網上騙案的事實資料,報章報導給她,她還是不願相信。

為甚麼鐵証如山,女人總傾向於不相信?

因為她們相信了,戀愛感覺就沒有了,這段情就沒有了;雖然她們沒有見過面,但她們會覺得自己是失戀,會傷心。

而她們寧願不夢醒,寧願不停相信這些騙人的網上騙子,也不願意醒來。

所以,要做一個不願意醒來,一生都發夢但沒有幸福的人,還是切實地醒來,做點對自己感情有利的事情,自己去選擇。)

我同男朋友工作關係認識,兩年前正式一齊,宜家佢36歲,我32歲。

我地係2016年8月開始,開頭3個月其實並不是太開心,覺得佢重視朋友多過我,因所以個時我提出分手,覺得同佢唔會幸福。 不過之後嗰一個月佢極力挽回,話會變得有交帶,同埋會抽時間俾我,我心軟原諒咗佢,又一齊返。

之後個年幾,佢既表現的確有覆行承諾,就算幾忙每日都有抽時間打俾我,同埋會抽時間見面,生意上遇到什麼事又會同我分享,又好主動咁想見我呀媽,每日一得閒就會打俾我,成日話我好啱佢,覺得同我一齊好舒服,大家感情算係穩定咗。

呢一年仲得閑就問我幾時結婚,又會講下生B會想點,好似所有野都越來越好,不過佢凈係講,都無咩實際行動,所以我係唔多信佢。而且喺我既角度梗係要見下佢父母先啦,佢呀爸呀媽都係搞生意既,點知難唔難相處?我暗示過呢個要求,不過佢好似仲有顧慮,一直都唔肯帶我返屋企見家人,所以其實我無咩安全感。

(龍師傅註:就是這樣,不要相信男人說甚麼,要看男人做甚麼。)

而其實我心裡面仲有隱憂。佢成日話佢呀媽好麻煩,所以到宜家都未帶過我見佢屋企人,平時星期日係family day, 佢一定要陪屋企人,從來無喺星期日同我出過街,大時大節如中秋一定要同佢屋企人吃一餐,姨媽姑姐呀婆吃一餐、新年就算有幾日假都要同呀媽周圍去拜年,復工後先有得見,仲有最重要係,佢地一家申請緊移民澳洲,如果ok就要坐移民監……宜家呢個年級搞Long D, 我都覺得危險。

(龍師傅註:自己要想,其實問題多多。1. 他媽媽難相處;2. 他星期日必定要陪家人;3. 他不想你見他家人;4. 他有機會移民,一移民變了異地戀,成功機會大幅減低。

​以上的問題不容易解決,也不是小事。

當然,感性思維就無敵了,在此我也幫感性思維沒腦袋的人想一下,她們會說:

1. 他媽媽難相處並不代表不能相處;2. 星期日陪家人並不代表不會陪我;3. 他不想我見他家人只是現在,將來就不會;4. 移民變了異地戀當然有成功的可能。

你看,感性人就會不顧事實,只顧著自己用歪曲邏輯去說服自己,整件事就好像變得很有希望。

事實當然不會這樣,事情只會以越來越糟糕的情況發展下去,到最後自己想要的東西也當然無一發生。)

而最近發生咗兩件事,令我覺得其實繼續落去都係唔會有結果。

第一件事,佢竟然借錢俾個ex(佢澳洲的前妻,佢以前喺澳洲讀書),仲呃我!

佢早一個月前有同我提過話有朋友問佢借錢,咁我話你想借咪借咯,不過預咗唔會收得返,我以為好單純係男性朋友需要幫忙。

點知之後個星期講講下時佢自爆話其實係有個common friend 代個ex問佢借錢,而佢借嗰刻都知道係借俾個ex,咁即係有心呃我。

佢既解釋係個ex同老公剛剛離婚,生活陷入困境,如果無人幫好慘…….我當時好傷心,唔明佢借嗰刻有無諗起我?

明明大家都無再聯絡,咁樣會唔會開咗個頭?

到時佢坐移民監會唔會藕斷絲連?嗰時真係有想過分手,但又唔捨得,而且佢為咗令我原諒佢,仲揸車喺我屋企等咗我成晚,最尾我都原諒咗,其實我知佢想幫我係阻止唔到,但我覺得佢應該同我講,唔好呃我 ,其實佢呃我代表知道咁做我會唔開心,但佢都照做,咁先令我最失望。

(龍師傅註:這些感性討論,我就不參予了,我看不到有甚麼問題。)

第二件事係,上個星期六(22/9)約咗我呀媽 (我爸爸好早唔係度,我係獨生女吃中秋飯,佢竟然又話唔得,咁我當然好失望啦,約咗長輩都咁,有無搞錯,同埋之前有問過佢幾時得閒,佢話星期六得。佢有解釋原因,話上星期應該同朋友去日本,但因為颱風改期,朋友無問過佢就改咗中秋節嗰日飛,佢又無留意要做節,變咗宜家佢屋企兩餐飯要改星期六、日吃,所以唯有問我改期。

講真,其實我呀媽都好就得人,改期唔係問題,但我覺得下下都就唔係辦法,同埋覺得佢好唔尊重我,同著緊我,所以我拒絕咗,仲好凝重咁話佢聽我既感受。

(龍師傅註:對方是要這樣,你也沒有法子,你這段感情也必無幸福,第一,男方沒有太重視你,第二,你也擅於在沒有麻煩之中找麻煩。)

其實我知個一刻應該要用「同意你不同意既野」,但平時我已經成日用,有事就到我都盡量就,但個一刻就係忍唔到……

經過呢兩件事,我已經想開口分手,覺得同佢一齊無幸福,但呢個時候,我驗孕發現自己有咗BB!!!! 月經遲咗3日,我已經懷疑,所以上星期特登請假去買驗孕棒,確認嗰一刻完全唔知點算,但我知道呢d野約快解決越好,所以就算嘈交我當日都約咗佢見面。佢知道後一開始都好震驚,又有d懷疑驗孕棒得唔得,雖然有笑過一陣,但之後都唔識反應,我問佢有咩打算,佢都答唔到…… 個一刻,我開始覺得佢唔想要BB多過想。

(龍師傅註:那當然,莫非你覺得他很想和你有 BB 嗎?如真的有此想法,那只是你主觀的願望而已,並不真實,你也沒有邏輯思維,只顧自己。)

佢有問過我想點,我俾咗兩個方案俾佢,一係結婚生佢落來,二係分手唔要BB。佢話要考慮下,咁我喺等緊佢既時候就係咁找資料,上星期五去咗睇醫生,佢都有陪我既….雖然照唔到胚胎,但驗血顯示應該係有咗,可能2-3星期所以照唔到,要今個星期返去再睇。

醫生話照唔到胚胎個刻,我feel到佢有一刻放鬆咗,但驗完血之後,佢就認真返。當時醫生問咗我兩次想要定唔要,我都答未知,因為佢仲未表態,但佢第二次就沖出來話應該會要,我都好surprise咁望住佢。

到上星期六,佢忽然中午打來話夜晚可以同我呀媽吃飯,原來佢特登飛甩咗婆婆嗰餐,佢呀媽當然唔開心,不過佢話等佢處理,咁我心裡面都算有D安慰。而吃完飯後,佢終於send咗篇千字文講佢既想法。

(龍師傅註:其實你是很自私的,你看到對方身陷險境或要解決問題時你覺得安慰。)

歸納以下幾點:

1.       佢上一份婚姻係21歲發生,只是維持半年,半年後離婚個女仔立刻同另一個男仔結婚,而且因為當時佢呀媽慶祝佢21歲生日,送咗層樓俾佢,佢仲要賣咗層樓分一半錢俾個女仔,因為呢件事佢呀媽唔信咗佢好耐,係呢兩年好返d, 所以佢好怕結婚又影響佢屋企人

(龍師傅註:結過婚又失敗當然會有陰影的,所以再婚的機會很微,除非有很强的等價交換,又或者他有此實際需要,例如要生小朋友繼承大筆遺產,但我看不到。

而你似乎也沒有想過這些,只以自己的心出發,只顧著自己的感受,而沒有想過全盤局面。)

2.       最令我驚訝既係,原來佢前妻呀媽,同佢呀媽係好朋友來,所以避免唔到知道佢消息!佢仲話雖然個女仔分咗半層樓, 但feel 到呀媽其實由頭到尾都鐘意佢前妻……所以覺得宜家個女仔離咗婚,佢地就有機會復合,不過佢話無再想過會再一齊 (佢真係一個裙腳仔,我覺得佢好怕佢呀媽)

3.       佢地一家搞緊移民,佢呀媽呢一年係嗰邊搞既公司同屋都有佢名,屋企既資產陸續轉移到佢同佢呀妹名下,呢個時候佢唔想節外生枝,搞到全家移唔到民 (我理解為佢唔想影響入藉同分身家,佢話最想移民既係佢呀媽喎)

(龍師傅註:只看事實,那當然了,他絕對不會因為你而改變他的計劃的。)

4.       公事上,佢公司呢兩年生意難捱,上兩個月引入部儀器,市場反應唔錯,有生意返,來緊兩個月要成日飛北京上海,怕忙到兼顧唔到我心情。

(龍師傅註:你沒有幫助他甚麼,每天只顧著要給他甚麼麻煩來滿足你自己的情緒,還要別人來照顧你心情,這只是被愛層面,很被動,你在感情上完全沒有話事權。)

5.       另外佢呀媽每年年尾都會飛澳洲避寒,而且想佢陪,跟住佢就唔知點算啦,即係話未來4-5個月佢係香港既時間好少 (鐘意一個裙腳仔真係好辛苦)

(龍師傅註:那當然了,問題在於你要進入他家也很難。)

6.       總結就係佢未有結婚計劃,而佢強調起碼係呢3年,等所有野都搞得七七八八,所有野先容易D。但我覺得佢唔會3年就坐完移民監,佢仲要返香港搞公司d野呢? 同埋誰知呢3年會發生什麼事?)

(龍師傅註:你很傾向於相信一個男人說三年之後的事情嗎?你是真的相信,還是寧願相信?

這三年當然會發生很多事了,發生甚麼事情就不知道,但肯定是對你感情不利的事情。

你要等他三年嗎?還是努力忘記這些,然後默默地等,但努力讓自己忘記在等?

又或者你覺得三年之後苦盡甘來了,對方回來和你感情很好,大家受過考驗了,然後從此幸福快樂結婚生子每天都很開心?

去到這裏,我寫不下去了,你上網找感性文章自我滿足一下,有大量垃圾文章可以滿足到你的。

再不,找不到也不是問題,自己開個網誌,自己想要甚麼情節,自己寫下去;然後扮忘記是自己寫的,扮無意中在網上找到,扮無知的去說「真的有這麼巧?真的呀!他真的會等我呀!網上也有網友有同樣經歷,男朋友在下一世也很愛她呀!哈哈哈!真的!是真的!」然後繼續發夢。)

最後,佢提出咗第三個方案,就係唔結婚但生BB落來,佢願意一齊幫我照顧佢。 

呢個方案對佢來講係一絕,如果我要,情理上佢好似無走咗去;如果我唔要,佢會話係我唔要,佢又會話佢都會幫忙照顧。佢話照顧姐,但佢來緊成日唔係香港,個人就幫唔到手啦,咁其實係咪直接經濟援助呢?又會幫幾耐?

到時玩失蹤我就死得。何況佢咁講我唔知有幾分真,可能純粹hea我,等自己唔好做衰人,直接叫我落咗個BB。

(龍師傅註:那當然了,如果不結婚生小朋友,對你絕對不利。)

結果個波又拋咗去我度。

我覺得呢個方案再一次體現到佢既貪心,佢話覺得可以唔結婚生小朋友都得,即係想有個人做老婆既角色,又想有小朋友,但唔結婚費事有一日離婚分身家,而且唔怕影響屋企繼續分財產,又可以繼續移民大計。

(龍師傅註:你自己也知道了,不要在過後又扮不知道就可以了。)

婚姻就係一場賭博,到呢一刻如果唔係為咗BB我唔會想嫁佢,佢咁怕佢呀媽,嫁俾佢無幸福。

講真,如果我屋企富裕,我會想生BB落來,佢個方案似乎可以考慮,但係,根據佢既往績,如果佢忽然唔俾錢養,我真係耐佢唔何,到時佢又移民唔係香港,我去邊度找人?

除非佢好似小小超咁,俾幾十億梁洛施,咁我就話少份擔憂姐。

所以,除非佢俾一大筆錢我解決咗我既擔憂,如果唔係,我將會捱得好辛苦… 

師傅,你覺得其實應該點安排對我係最好? 

(龍師傅註:自己怎樣安排,是你自己的決定,任何人都沒有資格參予,那是你的人生。)

唔要BB似乎最快捷簡單,而我就背負一世罪疚,亦唔知仲有無機會遇到一個right person結婚生小朋友,到時仲好大機會做高齡產婦……

如果要BB, 前路難行,我一個會養得好辛苦,仲有社會同親戚朋友既目光……而我媽媽年紀已經唔細,我仲要照顧佢……

我真係好需要你既意見,希望你可以幫幫我,謝謝!

讀者

(龍師傅註:事情已發生了,當然去到兩難局面;重點在於在相處的過程當中,你有沒有看到對方是否真的適合自己,還是一直看到對方根本就不適合自己,自己卻又期望事情改變。

肯定的說,如果你一早有思考以及在博奕上有分析,你絕不會有今天的局面。)

​學習重點

​人很少一開始時就很糟糕的,必然是不停經歷錯誤的決定及想法,才會讓事情一步一步變糟糕。

在這個個案之中,看到女生的思維調轉了,重點也放錯,腦海之中只有自己,只會一心想著對方要做甚麼來照顧自己的情緒,從來沒有想過在對方的人生當中如何佔有一個重要的位置,讓對方沒有自己不行;結果對方隨時要走也可以,因為自己真的沒有甚麼價值,還好意思說要對方照顧自己的情緒,一味將被愛放大。

我可以好肯定的告訴大家,如只將被愛放大,只會在愛情路上厄運連連,輸得很慘;因為在愛情上全被動,任由別人控制,只是靠運。

"

​「在愛情路上,何時也要清楚評估自己的形勢,如果形勢不利,就要修正,想想怎樣會更好;如果對方一直都不對自己怎麼樣,那往後的日子只會越來越差,適當時候就要止蝕,退出。」


​龍震天 ​玄學家 / 作家


感情咨詢,一生運程,風水,改名及擇日服務

龍震天設有:感情咨詢,一生運程詳批,合婚,陽宅及寫字樓風水,擇日結婚入伙,擇日生子服務。了解服務範圍及內容,收費可以按以下連結:

加我進 Facebook,讓你從此交上好運!

龍震天 Facebook 為眾人的心靈雞湯,每天定時推出鼓勵好運及人生正向訊息,幫助你改變想法,改變運氣。

(總共 1 瀏覽, 今天 6 瀏覽)