【個案分享】不停經常遲到的男人,是否值得繼續下去?

在感情路上,我們常常都會有很多選擇;而不同的人生階段當中,選擇對象的條件也自然會有所不同。

即使在同一階段,如果同時間有多個對象出現的話,我們也當然要細心評估;而評估的準則,也當然要絕對客觀,邏輯,一定要有條理,有分析力,這樣才能夠幫助你找到最好的對象,做出最正確的選擇。

這次的個案,女主角同時間出現了 A, B, C;而當她排除萬難和其中一位一起之後,又發現了不少問題,這些經歷都會讓我們很有啟發,而且從中也會學習到不少感情技巧,讓我們來看一看。

網友分享

龍師傅你好:

我無意中知道左你在podcast上的節目,一聽就覺得好中意好有用,之後不斷睇你寫既文章,真係對我好有用幫助好大,唔止係愛情上,仲有待人接物既技巧。

(龍師傅註:對,只要大家願意,我這裏有大量免費資源幫助大家學習感情技巧;也一定不要有一個誤解,以為免費必然質素低;事實上,你絕難在坊間找到如此有思考力,如此有系統,如此合乎邏輯,如此實用的文章,節目。

你上網胡亂找,當然可以找到大量所謂幫助你感情的感性文章,但寫文章的人,大部份你都不知道是誰,有些甚至乎自己也未拍過拖,你就信以為真,這跟相信沒有讀過醫科的人要跟你做心臟手術一樣危險。

無奈,很多人都是感性思維,她們傾向於發夢,聽好話,而不願夢醒;結果她們胡亂找了垃圾,然後信以為真,再經過時間的過去,自己想要的事情無一出現,到那時青春已找不回,要後悔已經太遲。

好好看我的網誌,聽我的 Podcast 情到龍匙,看我的 Facebook Live,參加我的課程,你一定會有所得著。)

實在非常感謝你無私的分享。我有一段感情一直放不開,不知道應該繼續落去或者是分開,希望龍師傅可以替我指點迷津。

我今年25歲,我同佢都識左幾年既時間(簡稱A),咁係讀書時做 part time 認識既,我同A都有幾個共同朋友會間中約出嚟食飯聚一聚。

四年前初初認識既時候曾經同佢 flirt 過一段時間,A有明確表示好中意我,但因為佢當時係有女朋友,我自己都覺得介入人地既感情唔太好,但又覺得好難得有個人同自己好岩傾好明白大家。有次同班朋友飲左幾杯,A送我返屋企既時候都有話如果早啲認識到我就好,咁我當時有暗示佢如果係愛佢女朋友的話,佢唔會中意上我的。

(龍師傅註:他當時未必想和女朋友分手,但又想和你拍拖,於是就這樣說了。)

A當時大概就話如果咁樣分手對佢女朋友唔公平之類。我當時好傷心,但都默默接受,只係覺得大家有緣無份好可惜。

當時為左比大家一個過渡期,我同佢都停止左聯絡大概三四個月時間(本來每日都會wtsapp)。

咁當時咁啱有另一個男仔追我(簡稱B)雖然對佢好感不大,但果陣想快啲忘記依段感情,所以答應同B拍拖。

咁拍拖既時候B都對我好好的,會帶我周圍去搵好野食周圍去玩,但幾個月之後我發現B同佢ex仲有keep住聯絡,甚至有肉體關係,咁我覺得接受唔到就分左手。

(龍師傅註:這種關係當然不能接受,你要看看對方有甚麼等價交換,以及你自己的年紀;你很年青,機會多,不停有男生追求,所以當然一開始時要嚴格一些。)

​在這段時間我和A都有斷斷續續咁wtsapp,但對話都係講下近況如何咁。

咁佢周不時都有係ig到post佢同佢女朋友既相,我自己都唔覺得同A會有機會一齊到,反而覺得還有機會做回朋友是好,因為我地有班共同朋友會一齊約出嚟食下飯飲下野咁。

同B分左手之後一段時間,同A就傾得更加密,一直都冇停過。

當中有斷過幾次,每次大約幾日至一個禮拜,原因都係大家覺得咁樣唔係幾好,但好快又會因為掛住而傾返計(有時佢搵返我先,有時就我搵返佢先)。

傾計內容都係講下大家生活,工作等等,flirt 既成分反而唔多。

直至到舊年既時候,A為左慶祝我生日特登夾埋班朋友一齊比驚喜我,咁我都好開心。

後尾聽朋友講返,原來A有話佢對佢女朋友都冇咁上心,但就會為左想我開心而做咁多野(想講多少少:A同佢女朋友一直都好少見面,可以一個月都唔見,雖然我地幾個朋友都覺得奇怪,但就唔多作評論,因為始終係人地既事)。

雖然我好開心A會為左我做咁多野,但我開心完都冷靜落嚟諗依段感情唔會有結果(始終佢一直都冇同女朋友分手),而且都已經持續左好幾年既時間,維持現狀只會浪費時間,所以我心入面都決定要放低佢。

(龍師傅註:做人最怕等,放低他是最好的做法。

我有很多客人,她們只是知道愛對方,然後一直在等,她們嚴重忽略了自己的機會成本;等候會讓人停留在原地不動,而最可怖的,是不知道要等多久。

所以,一定要不停讓自己有機會,一定不能在等。)

咁啱果陣有另一個男仔主動追我(簡稱C)。咁同佢傾計傾左一個月左右,佢就約我出黎亦都問我可唔可以做佢女朋友,咁我就覺得試下都無妨,就答應左佢。

同C拍左大約兩個月既時候,我就同班朋友同埋A講我拍緊拖喇,A知道果下都話恭喜我咁樣的。

但過左兩三日,A就同我講佢好唔開心,話發覺自己好中意我,習慣左我既存在。

A話佢發現自己已經唔愛佢女朋友,只係拍左幾年時間會有感情,同埋覺得佢女朋友無做錯野就唔應該分手。

(龍師傅註:這去到感性思維,人總會有這樣的心理,未得到就覺得好,明明你和她好端端,但你現時拍拖,他又心有不甘,所以就會說不捨得。

說不捨得,和是否真的很愛你,是兩回事。

感性人最喜歡一時一樣,看到你拍拖,就不開心。

你自己也要小心,即使他真的分手了,你們也只是剛開始而已,中間也當然有很多問題。

最經典的例子是兩 pair 人,各自有丈夫太太,大家苦戀了十年,好不容易兩邊都離婚了,大家在一起結婚,這是任何人聽到都動容的童話故事。

但事情的後續是,兩個人在結婚不到一年之後,離婚了。

他們每天都吵架,而且吵得很厲害。

你可能會覺得很奇怪,相處了十年不是應該很了解嗎?原來不是,兩個人一起但不是真正一起,是有分別的。

再另外一個例子,兩個人異地戀,十年了,終於在一起,大家都很開心;感性人最喜歡的事:自找麻煩,讓自己身陷險境,然後努力克服,視之為有意義。

​可是大家一起了半年,才發覺有問題,然後分手了,那個女的白白浪費了自己人生最寶貴的十年;十年來,原來一直都只是買一個假希望。

為甚麼會這樣?原來十年來,單靠每年見那幾次面,每天只是在 Skype 看那個二D 畫面的影像,每天只是文字訊息,不能真正了解對方是否能夠適合自己長期生活的。

​所以,好好想一想。)

咁我亦好誠實地話比佢聽我既感受,亦都同佢講希望佢好好對佢女朋友。

佢聽完之後就話,佢會分手,希望我回心轉意同佢一齊。

我果陣就同佢講太遲喇,點解唔早啲發現。

但雖然把口咁同佢咁講,當我知道佢係咁諗既時候,我就很不自在,覺得大家咁啱傾咁夾,又互相中意,依家有個機會一齊點解唔試下。

(龍師傅註:多餘的,要試一早試了,而且有可能只是對方好勝心而已,他未必真的很喜歡你,你要分清楚。)

果幾日佢都一直有同我講會分手,希望我同佢一齊。

咁我考慮左一段時間,我就答應左A,佢叫我比啲時間佢處理。

我自己都同C講清楚,話心入面始終有個人放唔低,唔可以繼續同C一齊。

另外,A上個月都處理好已經分左手,咁我同A都有keep住約出黎見面,佢份工係輪shift(要通頂),而我就office hr,時間上都盡量配合佢的,例如佢有時收工收夜晚12點/1點,我都會特登早些睡跟住較鬧鐘起身打比佢同佢傾電話,佢亦都好樂意的。如果佢星期六日撞正dayoff既話都會留比我,除非佢真係好累唔出,我亦無所謂的。

(龍師傅註:看上去大家的生活作息也有不少問題。)

但佢有個缺點,就係冇乜時間觀念,經常性遲到。

之前朋友關係既時候佢都係咁,但果陣一班朋友,有人遲啲黎都冇咩所謂,因為都可以同其他人傾住計咁樣。

個人黎講我自己去一班朋友既聚會有時都會遲少少到,但單對單約既話我自己就好少會遲到,因為覺得係浪費緊人地時間。

(龍師傅註:男人遲到是大忌,很多女人都不覺得怎麼樣,其實這正是常常吵架的原因;這種人沒有自律性,不尊重對方,沒有同理心。

當然,我們也不用一分鐘也不遲,有時候交通問題,突然間有事做,也有可能遲到,這完全可以接受;但平日每次都遲到,而且遲很多,而且一點不好意思也沒有,我可以說,你在這段關係之中的地位很低。

你是現在才發覺嗎?還是你在之前已經知道?如果你之前已經知道,為甚麼你還要和這樣的人在一起?

人是不能被改變的,如果你真的要和這樣的人在一起,你就要包容,你要完全接受才可以。

如不接受,那只是終日吵架,感情也不會好。)

咁有一次約佢佢就遲左差唔多兩個鐘(果次由佢屋企落去約會地點都只係十五分鐘車程,而且半個鐘內我係可以接受的,但兩個鐘實在太誇張),佢就話因為太攰所以遲到,我果陣都嬲嬲地,但見到佢又心軟嬲唔落。

(龍師傅註:他累了,就要你等兩個小時?讓我很直接地問你:

1. 他是很不尊重你,你同意嗎?

2. 他沒有同理心,你同意嗎?

3. 他佷自私,只顧自己,你同意嗎?

如果你三個問題都同意,那你怎樣和他相處?你想做酒樓的果盤嗎?

請你先回答好以上問題,不要再被自己的感性思維影響,又來一句「他將來有機會改變的」就推得一乾二淨。

我就覺得這個問題很嚴重了,你呢?)

加上之前有次同佢約睇戲,本身約早一個鐘打算一齊食個早餐先,但我訓過龍所以遲左(加上覺得佢都唔係會準時到既人),我岩岩好趕到電影開場,佢果次就好嬲我,話我冇心裝載,影響左佢成個心情,我自始之後都冇再遲過到。

(龍師傅註:間中遲到我覺得是情有可諒的,我也會遲到;只是我們要識別清楚這是「偶然遲到」還是「經常遲到」,如果遲兩個小時,還要是經常性的,我想沒有一個人可以接受。

​因為工作臨時開會走不開也可以接受,也是常見,但因為「很累,所以遲兩個小時」就不能接受。)

到今次,本來約左10點見面,9點左右佢話改11點,咁我都話ok,因為我果陣都只係準備出門口。

到10點幾我打算出門口,我都wtsapp同佢講定,但佢半個鐘後先覆我,問我係咪已經出左門口。

我冇正面答佢(但我已經搭緊車),只係問佢起左身未,佢話未,我就講左句「次次都係咁」。

(龍師傅註:這種人,我不知道你和他交往的理由是甚麼,一個完全沒有同理心的人,別人出了門他自己還未起床,很不尊重人。

你的時間不是時間嗎?為甚麼要你做受害者,將你人生最寶貴的時間都浪費在他身上?)

佢好似覺得唔對路,就話佢會飛的過黎,仲話出緊黎。

咁我見佢話出緊黎,心諗最多都係等半個鐘,就話搭的士咁貴,搭地鐵就得啦。

佢果陣就冇覆我,我以為佢真係搭左的士。

過左15分鐘左右佢wtsapp問我係邊,我以為佢到左,但我打比佢佢就唔聽電話,只係係wtsapp覆我叫我行下附近商場,我果陣就get到佢仲未到,我就問佢係咪未到,搭的士要咁耐咩。

佢先話自己冇搭的士,仲要剛剛先出門口,我就好嬲,覺得佢遲到之餘仲要講大話,又覺得佢自己遲到就冇問題,但我遲到佢就即刻放大黎講,我果下嬲到話我返屋企先喇叫佢唔洗出嚟,佢仲好似冇悔意咁話「ok,咁我返轉頭喇」。

(龍師傅註:多餘的,其實有可能他去到這裏還未出門口。)

仲話佢自己去食好野,我唔去仲可以慳返我果餐。

事後到夜晚我唔想繼續咁冷戰,我就wtsapp佢話下次都係唔好約咁早,佢就覆我以後都唔洗約喇,話我破壞左佢個假期。

(龍師傅註:和這種人交往,肯定是你的厄運,你還要主動找他,也顯示出他毫無悔意,他自己腦海之中有歪曲邏輯。)

龍師傅,我想問咁樣做都有錯嗎?我接受唔到佢有口話人冇口話自己,而且態度仲咁惡劣,我果下真係忍唔到唔嬲佢。請問真係我做得唔好嗎?另外身邊朋友都唔睇好我同佢的關係,我自己都不知道應唔應該繼續下去。

(龍師傅註:他遲到當然錯不在你,而你等了這麼久,有點脾氣也絕對正常,因為他是經常發生,而且沒有理由,只是他不尊重你,沒有同理心,他也當然沒有愛過你的,你要弄清楚。

你理解他所謂的那些愛,只是用口說而已,這等於小明想出去玩就跟媽媽說會努力讀書一樣幼稚。

你和他繼續一起,你的感情必然厄運連連,他也會拖累你的人生,我說得很清楚了。

當然,你也可以不相信,而繼續交往,每次都因為遲到而吵架,然後期望他將來會突然改變的。

我也跟你說清楚,人是不會被改變的,況且他自己對自己做過的事情,一點也不覺得不好意思,要很厚面皮,很沒有自知之明,人格很垃圾的人才會做得到,這不容易的,而你好運的是,這樣的人竟然被你遇到。

​你自己想想,是否不相信,要親身經歷,到數年之後才知道這是厄運,然後扮奇怪到時才想分手?

如果是這樣,那我也可以清楚的告訴你,感性思維的女人,都是這樣的,她們不會接受現實,然後明知那是厄運,卻去扮不知道,全部親身經歴過後,才知道那是厄運。

所以感性的人,人生當中有九成事情都是厄運事情來的。

​自己想想,最好用紙筆寫下你的答案,寫下你腦海中的想法;你會發覺,你自己也寫不出來,因為你不好意思寫;看到自己的答案,你也不相信那些事情會發生。)

另外文章寫得有點長,好多謝您抽空看完成篇文章。如適合,希望師傅可作分享,謝謝。

祝龍師傅身體健康


​女神王姬「讓你幸福的十個理由」免費課程現可參加及免費下載!

​要找到幸福,關鍵在於你的想法;十個想法讓你知道甚麼是幸福,如何找到愛你的人給你幸福!


「愛情五十天條」網上課程現已推出!

一次過了解所有男女感情技巧,讓你在短時間之內掌握男女感情之間一定要遵守的天條,馬上改變自己的感情運,找到姻緣,增强桃花!


​龍震天鼠年生肖運程正式推出,各生肖運程鼠年運勢免費看,再加上流年風水,大門地氈顏色,犯太歲生肖,桃花生肖,讓你在鼠年趨吉避凶行好運!


是否還未找到好姻緣?感情路上遇到問題?工作是否一直沒有突破?

其實未必是運不好,而是你不清楚問題的解決方法而已;方法不通,任你有多大努力都沒有用處。

龍震天有以下一對一咨詢服務,可以幫助你突破現時困境,找到出路:

  • 感情咨詢
  • ​一生運程詳批
  • 工作咨詢
  • 陽宅風水
  • 改名
  • 婚嫁擇日,搬遷擇日
  • 擇日剖腹生子

了解服務詳情可以按以下連結:


Facebook : http://facebook.com/lungchuntin1
Youtube: http://youtube.com/lungchuntin
Instagram: http://instagram.com/lungchuntin
電郵:info@masters.com.hk
查詢電話:82040102


五天讓你看穿男人心,完全免費!

只用五天時間,讓你了解男女感情操作法則,了解兩性心理學,男人永遠不會告訴你又或者他自己也不知道的秘密,讓你掌握男女關係,突破感情,增强桃花,找到姻緣,讓你愛的男人從此離不開你!

趕快免費登記來參加這個原價 HKD2,680 的網上課程!

>