這次分享的個案有點特別，問題並不來自男朋友本身，而是他的家人。

從來都說，愛情有時候不只是兩個人的事情，有時候對方的家人也有機會影響彼此間的感情；這次個案的女主角，男朋友其實對她很好，也沒有問題，但他就是有一個不生性的哥哥，常常在錢銀方面需要男朋友的幫助。

長遠下去不是辦法，應該怎辦？

讓我們先看個案，然後再加上我的看法。

網友來信

龍師父，你好！我有個問題想聽下你的一些建議，如果題材合適都歡迎你放上網誌做教學（我睇過晒龍師父所有文章都無我呢個情況...所以我都唔知要點解決好...）

（龍師傅註：好的，沒有問題，我先謝謝你的來信分享，如果題材適合，我會在網誌之中發表我的看法。）

講下背景先：

我上年有搵過你一生運程詳批＋感情咨詢服務，當時你話我男朋友係愛我既，我果陣都半信半疑，因為佢一直都抗拒結婚生仔。

今年我地都30歲了(大家同年紀），佢終於開始同我討論結婚生仔既事，我地打算最遲下年結婚（因為年紀都唔細，想快點生仔），我地唔係話好有錢，所以有共識唔會大搞，只係簽紙加請親戚食餐飯就算，我地最大目標係想留d錢黎買樓，而我地兩個既積蓄都應該可以俾到首期。

（龍師傅註：這就好，兩個人雖然收入未必很高，但有共識，大家都朝著同一個目標進發，這樣成功的機會自然大很多。

這和我早兩天分享的個案實在有天淵之別。早兩天的來信，也是雙方收入都不高，但大家沒有共識，男的努力儲蓄，一心想著結婚，一心想著婚後的生活怎樣安排，儲錢買樓，但女的卻很幼稚，只管看男方送甚麼禮物給自己，非常計較，這當然沒有好下場。

當然並不是女方不對，女方想要收禮物，想要男方哄自己，人之常情，只是她很明顯找錯對像了。

而你們兩個如果有共識，甚麼禮物都不送，一心只想著結婚，為目標進發，就很好。）

但近呢幾個月佢阿哥腰背痛，睇左醫生話要做手術，手術費要大約十萬。

男友係好錫屋企人好孝順的，衰d講就係媽寶，佢媽就成日偏心哥哥，不過佢同哥哥感情都好好，今次佢媽媽話幫哥哥俾手術費，但佢媽係家庭主婦根本無積蓄，佢爸亦已退休，平時生活費都係靠我男友支撐，所以其實到頭來都係我男友要俾晒十萬蚊手術費...（仲未計手術後覆診/復康等等費用...）

講下佢哥背景：中學畢業就出來做野，廿幾歲時結左婚，而家有個女已十歲，一家三口住公屋，月入一萬五，份工無咩前途，出來做野咁耐都無俾過家用父母！阿嫂無返工全職湊女，早幾年佢哥直頭連家用都唔肯俾老婆，所以阿嫂要離婚，離婚後阿嫂就同個女一齊申請綜緩，但仍然一家三口住係公屋（所以我覺得佢地係假離婚）， 一家三口都好大洗，哥哥同阿嫂30幾40歲人完全零積蓄，每個月有幾多錢就洗幾多，例如明明電話好新淨無壞，但都每人一年換兩部新電話；校服無穿無爛又合身，但要年年換新！

（龍師傅註：他哥哥不生性是一定的了，而月入萬五也當然是很低的收入，還要負上照顧一家三口的責任，當然問題多多。

不過在你男朋友的立場而言，他和哥哥感情要好，所以當他哥哥有事的時候，他就很自然的去照顧他，在他而言也很合理。

作為女朋友的你，也很難插手進去，只是自己心知就可以了。）

我男友其實收入都唔高，月入一萬六，只係比佢哥高少少人工，所以十萬蚊係辛苦死慳死抵儲返來，平時出街餐餐食快餐店，極少買野咁...呢舊錢用左起碼要再慳1-2年先儲得返黎...我男友知道要俾咁貴手術費之後都好唔開心，亦講過話咁辛苦搵錢無享受過就用晒...究竟生存黎有咩意思...好辛苦想自殺之類既說話，我亦唯有安慰佢「錢無左就再儲過啦...」，亦有提議不如當係借比佢哥，要佢哥每個月分期還返錢，但佢就話佢哥無可能會還！

（龍師傅註：你男朋友收入也低，真是經濟不好的時候，就會產生很多問題；所以我的忠告是，一開始時如果想有幸福婚姻及生活，就一定要找一個經濟好一點的男生作為交往對象，這樣往後的問題就相對較少；我有很多客人都是這樣。

也當然，未必一定要很有錢，因為太有錢的男人選擇也多，條件也好，感情又或許會受到影響；但如果人工太低，真的很難生活，更勿論結婚了。）

無左十萬蚊我地已經唔夠俾首期上車了，其實我對上唔上車無咩所謂，住公屋我都ok；但最令我氣憤係，佢哥由排期到真正做手術，都大約等左兩個月，呢段期間佢都一直有返工有糧出，但佢竟然一蚊都無俾過出來！依舊吃喝玩樂洗晒d錢都唔俾返少少自己既手術費！講真如果佢係有盡過力但真係唔夠錢，我會體諒佢，但佢而家完全係將自己快樂建築在別人痛苦上！真係難為我男友同佢媽咁擔心佢！

（龍師傅註：這也是他哥哥的問題，但你男朋友心甘情願去付這筆手術費，你只能夠勸告，也不能幫他做決定。

有些事情外人是難以影響的，例如親情。

所以你在這件事情上可以做的事其實不多。）

我覺得長此下去，佢哥一家三口無事健健康康就最好，但一有咩事都好大機會係我男友埋單...分分鐘第時佢哥個女讀到大學無錢交學費都會搵我男友俾！

但年紀愈大多左病痛亦在所難免，佢地根本係個計時炸彈！除非我男友一個月搵十萬蚊啦（要養父母、哥哥一家，共5人），否則咁樣根本無可能儲到錢...但月入十萬根本無可能！咁落去我同男友的人生規劃只會俾佢哥成家人拖跨！

（龍師傅註：所以這也是你自己要想的地方，經濟條件如果太差真的很難生活，並不是你不愛你的男朋友又或者你要拜金，而是有些時候我們也要看現實。

我有很多客人也是如此，她們深愛著對方，滿以為只要有愛就可以解決很多問題，卻發覺原來很多問題都難以解決。）

萬一我同佢結左婚，亦唔知會唔會問我拎我d積蓄去補貼佢阿哥一家！當然我一定唔會俾，但講錢點都傷感情啊...

（龍師傅註：也有機會的，所以你自己也一定要想想；所以愛情有時候並不單只是兩個人的事情，也有可能是兩家人的事情；如果對方家人不好，拖累了對方，自己也有可能會受到影響的。）

基本上除左佢阿哥之外，男友的所有野我都好滿意，究竟有冇辦法令男友放低佢哥哥呢個負累？

（龍師傅註：這比較困難，而且這是對方的事情，旁人也難以插手；所以你在這件事上面可以做的事情並不太多。）

唔好意思全文有少少長，希望師父得閒可以俾少少意見，無限感激！

（龍師傅註：如果是這個情況，影響真的太大的話，即使勉强一起也沒有很大意思，每天都要為錢而奔波勞碌；不要說儲錢了，就連生活也成問題，這樣的婚姻其實是很沒有保障的。

不是說凡事一定要向錢看，而是我們活在一個現實的世界當中，有很多事情都要現實地看。）