我的感情理論，從來都不會多，也非常簡單，直接；但變化萬千，每次去到不同的個案都會有不同，所以大家一定要不停看，務求看到入腦，入血，感情技巧就會提高，就會有思考力。

今次分享的個案，她交了一位年紀比她大二十三年的男生，還做了第三者，當中也自然有不少問題；到最後失敗了，她很想知道原因，想從今次失敗的教訓當中學習，讓自己下次不會重演。

我們先看個案，再加上我的分析。

網友來信

龍師夫你好,

今次來信歡迎公開, 並希望你直接指出我要改善的地方, 因為我一直都相信你.

本人已經成為你粉絲幾年, 最近並收看了你的「戀愛溝通桃花術」, 「愛情五十天條」, 得著良多, 最近第一次在知情下成為了第三者, 本人一直對感情專一, 這段情在初頭的時候可以好理性去面對, 但到最後情緒累事。

（龍師傅註：多謝你的支持，也多謝你參加我的課程；我深信你會在課程之中學到很多實用的感情技巧，希望你能夠學以致用。）

我35歲, 高瘦身材, 一直有運動習慣, 外表看似30, 戀愛經驗2次拍拖3年, 其餘也是散拖, 自已不想結婚, 不想生小孩, 要生活平衡不會放愛情係全部, 因為之前情傷太重, 不斷增值自已, 比較鐘意成熟男人, 身體語言不錯。

（龍師傅註：是否結婚沒有所謂的，感情上各人有各人的追求，我常說，一定要想想自己要甚麼東西，也要切合現實。）

對方, 簡稱C君, 58歲但多表看似50歲, 專業人仕, 做教育工作, 月入大約10萬, 離婚3次, 每次維持6-7年, 佢好識同女人相處, 社會經驗好夠, 性格好, 風趣, 好多人都想埋佢身邊。

（龍師傅註：男人去到這個年紀，經濟條件以及自己的閱歷，都會是自己的等價交換條件。）

我們相識了3年, 因為參加興趣班而認識而佢就係堂上的老師, 直到1年前佢自動私下約我同另一對情侣去離島玩, 果日玩得好開心, 我哋有輕度身體接觸, 佢好照顧我, 其實我一直都對佢有意思, 最後可能因為我磁力增加咗, 玩完當晚佢已經話想再約下一次去主題樂園玩同埋呢對情侣, 我就答大家可以夾時間, 之後佢就無而私下再聯絡我, 但我從其他人口中得知, 原來佢正在追一個女人, 大約50歲, 最後就一齊咗。

（龍師傅註：一個離了婚三次的男人，結婚必然不是他想要的東西，他現時的追求，是想找一個伴侶多一些；但沒有問題，如果你不想結婚，只是想拍拖，有一個成熟男人在身邊照顧自己，問題也不大。）

我聽到後唔開心, 但我無做任何野, 因為我一直想信師夫講要吸引男人去追你才值錢. 其間一直都有人追但條件唔啱。

其間我一直有上堂, 正常上堂見到佢, 無事發生, 一直係佢面前出現, 無主動約, 無表白, 到最近4,5個月因為疫情時間佢比較多時間因為唔洗返工, 另外因為佢自已租咗個工作室, 得閒既時候會係果度彈鋼琴, 畫山水畫, 因為佢工作壓力好大要找方法釋放壓力。

就係呢段疫情時間, 我哋相處時間突然增加咗好多, 行近咗好多, 但每次我都提自已要理性, 因為佢已有女朋友同埋當初佢無擇我, 所以都保持距離。

從4, 5個月之前只係WHATSAPP通訊, 佢成日花時間係工作室因為可以避疫情所帶來既不安情緒, 佢會幾日就傳畫咗既畫比我睇, 每次我都好認真睇, 讚賞, 不斷鼓勵佢, 佢好受落, 我真心鐘意欣賞。

同埋佢都傳自己彈琴嘅影片畀我睇, 每次我都用心欣賞用心讚賞記住歌名, 見到佢真人彈既時候就拍手, 所以畀佢嘅感覺我係好與別不同,佢自已講因為從來冇人咁用心去讚賞佢呢啲興趣。

（龍師傅註：這是正確的愛情技巧，也是我常說的讚美技巧，這是對的。）

大約經過一個月之後,佢就主動約我去工作室,睇佢畫畫同埋彈琴,我當時內心係好開心, 另外經過兩個月相處嘅時候,我不麻煩,細心,照顧,溫柔體貼,令到佢對我加分, 就算有啲情況我唔鍾意,我都冇發脾氣；到佢自己同我講話同我一齊相處好舒服,仲有佢講咗好多嘢畀我聽話唔係咁多人知,不過兩個月後佢冇表白,我哋好自然咁一齊咗。

（龍師傅註：一齊也沒有問題，大家都是成年人，不過要想想自己是否投入太多，也控制不了自己，萬一出現問題會怎樣；因為對方是一個離了婚三次而且有女朋友的人，他的心不是對你很專一。）

理性上我知道唔應該,但其實我已經鍾意咗佢好耐,因為佢好識照顧人, 而我又唔需要結婚, 一星期見面大約兩次已經ok 我又唔會要去佢交代去左邊, 我哋亦都兩三日先whatsapp一次,佢好願意分享佢嘅嘢畀我聽 ,我亦都滿足佢嘅英雄感存在感。

每次一齊我哋都好開心每次離開都有依依不捨嘅感覺,從來我都冇問我哋係咩關係,我只可以用心去感受同埋知道唔應該問,我哋從來冇講過佢女朋友.我每次都多謝佢為我做既野, 所以佢越做越多, 總之我做既野就係佢鐘意既野. 佢完全可以係我面前放下面具, 做回自已。

（龍師傅註：去到這裹也暫時是好的：你有對他好，他感受得到，你有滿足他的英雄主義，讚美他；你也有做到不麻煩。）

到兩個月後, 我忍唔住同佢發生咗男女關係, 然之後事情就改變咗, 第一次發生咗關係之後,我同佢講唔舒服,然後他就送我搭車走, （備註：佢從來未送過我返屋企, 就算返到佢屋企半夜12點都無問我返到去未）因為我哋習慣幾日先whatsapp一次我都接受, 但係嗰日之後, 佢三日後就問我有冇興趣再去去工作室陪佢,完全冇問起我唔舒服嘅事情, 只係叫我小心身體之後就冇再提過, 我就表面上看起來好就好。

相隔一星期我哋有第二次男女關係過程都好開心,不過其實我已經發覺通常都係8成時間係佢講自已野, 2成時間係我聆聽,我覺得佢唔太想了解, 只係想講自己嘅嘢然後我去讚佢, 再加上第二次性關係之後, 我下體當場流血可能佢以為只係正常女人經期, 佢一句都無問過咩事, 到第二日上晝我哋分開後我就忍唔住。

（龍師傅註：這是比較嚴重的，你也要想想自己有甚麼問題。）

其實呢次只係導火線, 因為之前我一直都覺得佢唔關心我,見面嘅時候係好開心好關心好照顧我, 但係每次見面之後, 一直都唔會問我有冇返到屋企。

（龍師傅註：其實這點可以主動一點的，他沒有問你是否回了家，你也可以在回到家之後告訴他的。）

我理性咁諗就算係做人情人, 我諗對方都可以好錫我特別係頭果幾個月,同埋我哋期間完全係冇鬧過交,嗰一刻因為我好驚身體有事,所以忍唔住情緒發作我就send whatsapp畀佢, 其實我係想分手, 我話可以繼續陪佢但係唔想再有進一步嘅行為,我忍唔住話你已經有女朋友, 1年前你無選擇我, 佢話之前真係少咗D互動, 可能係天意, 佢話尊重我嘅決定, 知道佢畀唔到將來同埋承諾我, 話我開始嘅時候去結束係明智嘅選擇, 又話我會搵到一個對我更加好嘅男人。

（龍師傅註：你有情緒，他自然也會覺得麻煩；去到這個位，他就有可能對你興趣減少了。

當然，你身體出現問題，也是值得關注的，你不開心也是很正常的，但是否能夠恰當表達又是另一回事。

另外他八成說他的事情，你有不滿，你覺得他不關心自己，你其實也可以主動說你的事情的；當然，說甚麼事情又是另一回事，例如你是否只是情緒垃圾站，只說負面之事，對方也自然沒有太大興趣和你談下去；你要想一些有趣的事情和他分享。）

佢話仲在意我, 我以為對佢嘅好可以令到佢返唔到轉頭,因為我知道每次去同佢女朋友出現街之後都會揸車送佢返去, 可能我嘅妒忌心又發作,同埋最要既係原來有事嘅時候,佢會同我保持距離。

（龍師傅註：這是表面之事，其實你要想想別人做這些事情背後的真正原因及動機，你要想想他心裏到底在想甚麼，而九成的事情別人是真的不會告訴你的。

也可以這樣說，如果事情真的要別人說明自己才知道，就已經太遲。

他這些動作的真正動機，可能是怕和你一起給別人知道所以有避忌，你一定要明白。

另外他是否只是看中和你有男女關係所以和你一起？也有可能。

如果是這樣的話，你也要想想，你男女關係和他不順利，也主動提出不可以有男女關係，如果他只是想和你有男女關係的話，也當然很大可能不會繼續。

你也要想想，他對你很好，他的目的是甚麼？當然是想在你身上得到一些東西。

而男女關係，也是女方最容易和對方換取的等價交換條件。

當然，感性的女人這時會出場，說「一個只為了和你有男女關係的男人，值得交往嗎？」

這是當然的，但自己也有選擇權呀！如果這樣的關係自己接受不到，就當然不要交往。）

我忍唔住犯錯就係做人要坦白一點,同佢講話佢就算我唔舒服冇關心我,亦都從來冇主動了解過我,佢就回覆我話自己好自私唔敢去諗唔敢去面對我哋嘅關係；以為大家默認咗. 師傅呢刻我係咪把被受情緒放大咗, 小事我可以包容, 但同佢有第一次男女關係後唔舒服, 佢都無問候過我。

（龍師傅註：這事情就只有你和對方才知道，我不知道當時的情況怎樣，所以也無從評論。

是否你說明很不舒服，而他卻沒有理會過你？還是你說了，他有關心你，而你覺得他的關心不夠？

因為正常男人，如果你有表明不舒服，他也會問上兩句的。）

當時我就諗起師父嘅等價交換,佢除咗帶比我開心見面時既關懷之外, 同埋佢身份上嘅榮耀就冇其他嘢比到我；反而我就做咗好多男人都好喜歡既野, 可能因為我太短視, 所以經濟上佢未有支持我, 同埋之前大時大節我都冇要求佢陪我, 一直都係我暗示佢約我, 之後我見佢係想由一星期見面由2次變成3次, 不過我控制住個節奏,令到佢成日都好想見我, 大家一齊真係好似去咗天堂咁開心,有咗關係後我想講自己嘅嘢嘅時候, 佢就好快轉咗話題講自己嘢。

（龍師傅註：去到這裏，你就要留意了，你自己說自己的事，是甚麼事？又或者實質一點，是開心的事還是不開心的事？是否只討論你的情緒然後期望別人哄你？

感情從來都不會是這樣的。

因為你沒有說明，所以也無從評論。

如果你不停想分享自己的情緒，期望別人會哄自己，那對方也當然會轉換話題。）

其實之前都有但無咁明顯, 只係我呢段時間一直扮冇事, 佢最後whatsapp就話其實係欣賞我, 對我有好感, 但我真係冇諗過佢完全無想再同我一齊返, 我以為做嘅嘢係佢咁多個女朋友都冇做過以令到佢好有存在滿足感, 可能我一早唔清楚自己嘅位置, 認真咗。

（龍師傅註：其實你要想想，你做的事，是否對方需要的事？因為有很多人做了很多事，都是自以為很好其實對方根本不需要的。

例如自己較了鬧鐘每半小時要找對方一次，努力在對方很忙的時候找對方，努力不停留意對方有沒有和別的女生互動，這些都是男方很不喜歡但女方自以為有付出之事，你自己要想想。）

今次我扮瀟灑所以我係無揾返佢,但係我冷靜咗之後係好後悔我只敢同你講, 因為我同佢真係好夾, 價值觀好相似, 年齡完全唔係問題溝通得非常好, 請問今次我既分手係咪做得啱, 點解我會覺得後悔, 我今次最錯係做咗咩, 請指出, 多謝!

Mary

（龍師傅註：如果自己根本不想分手一開始時就不應該說分手，這是大部份情緒及感性女人所做之事；對對方有不滿是當然可以的，也很正常，但是否要直白說出來讓對方關係變差就一定不是這樣。）