又到寫食經的時候了，今日要介紹的，是你一定要特登來的星泰屋。

顧名思義，星泰屋就是吃星馬菜的地方，這裏有很多選擇，由喇沙，海南雞飯，到串燒，菠蘿炒飯都有：

環境乾淨，坐得舒服，也在我寫字樓附近，所以我久不久也會去一下。

侍應招呼有禮，如果坐卡位也算寬敞，款式也算多，基本上你可以每次來都叫不同的東西。

今天我和龍嫂比較肚餓，因為見客晚了，要到八時半才可以吃飯（我平時習慣六時半吃飯，一來可以早點消化，不會太飽及太肥，二來不用和人迫），所以叫了四樣東西，好在後來也吃得完。

這裏最出名的，是肉骨茶，海南雞飯，串燒等，不過以上的東西我們都吃過了，所以想著試一些新的。

第一樣我們點的是印尼炒飯。好處是包兩串串燒，不用叫半打，可以留肚再叫其它東西：

順帶一提，這碟飯是有三塊蝦片的。龍嫂說非常肚餓，等不及我影相就已經擅自拿了一塊來吃。

每樣東西都恰到好處，飯不太硬，也不太軟，炒飯很香，再加幾隻蝦球，真係諗番都 very good！串燒也非常好味，附帶的沙爹汁也可以用來撈飯；再加一隻蛋打勻，正！我最喜歡吃無骨的東西，呢碟啱哂我！

再來就是燒魷魚筒了，四十八元，價錢一般，不過就非常好味，原隻魷魚果然係不同！它附帶有一碟酸汁，真係好味！口感一流！

再來一個酥餅，甚有牛油味，很軟熟，做得真好，值得一吃再吃！

到最後，來了一個絕妙的配搭。咦？乜黎嫁？酥皮飛鴨？

差不多了，呢個係酥皮焗海鮮，打開黎睇睇：

嘩，乜都有，大蝦，蟹柳，魷魚，魚柳，真係好味！

佢係有少少棘棘地既。不過唔算太刺激，ＯＫ嫁！好好味，我最鐘意係佢既咖喱汁，點落去Ｄ酥餅度，一流！

忍唔住影相前自己咬左一啖，太正啦！

呢間店真係好好味，水準平均，做晚飯一流；不過午飯我就建議你唔好去了，水準相差極大，唔知係咪下畫同夜晚唔係同一個廚師。所以如果你想去的話，建議你晚上去比較好。

最後一提，你下次去可以試下青咖喱，我無叫到，但唔知點解隔離枱個個鬼佬都叫，莫非鬼佬只係識得青咖喱，點解呢？

星泰屋
地址：上環文咸東街 38 號（上環地鐵站 A2 出口，一出行禧利街就到）
推介：蝦喇沙，印尼炒飯，原隻鮮魷筒，酥餅
平均消費：一百三十元一位
分數：＊　＊　＊　＊　＊

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去