幫人睇風水既最大好處，係可以因利成便，去到唔同既地區食野。我係一個鐘意試新野既人，新鮮感對我既靈感係好重要，好多時候寫既野，包括書同埋 blog，都係在日常生活之中無意發掘的。

如果日日去同一個地方，做同一樣既野，又或者食同一樣既野，視野同埋知識都會永遠停留在同一個階段。

就好像今日，在沙田看風水，因利成便，梗係在沙田新城市廣場食完野先走啦，咁就到左今日要介紹既日本食店　－　甘味：

俾佢吸引既原因係佢門口有好多人，同埋Ｄ相都好似好靚，我同龍嫂七點鐘去到，等左大概十五分鐘先有位。

一入到去，環境也算不錯：

Menu 都算精美，佢大字標題介紹日本二十穀米，同埋手打烏冬，咁呢兩樣一定係膽啦：

仲要拖埋其它腳，咁睇下佢有乜野其它野食先：

下面寫既鍚紙牛油焗野菌好似好好味喎，都要試下；佢魚生都有得食：

仲有壽司，咁都要試下啦！

不過後來非常後悔，大家去千祈唔好叫錯，我呢度介紹好食既野大家可以叫，其它一概不叫，佢既質素好參差。

先來一樣必食既 "牛肩肉穀米，佢既穀米真係有二十樣咁多嫁，佢有個模型係度介紹，完全對板：

牛肩肉好鮮味，好有肉感，再加一點芝麻，好香口：

尤其係穀米方面，真係好好味，有粟米，青豆，紅豆等其它配料，食落去個口感一流！

配穀米飯既仲要碟粟米，好正：

第二個必食推介係豬軟骨烏冬，豬軟骨完全對板，烏冬口感亦一流，絕對可以叫：

跟住叫左雞翼，我覺得麻麻地，下次可以唔駛叫；雞翼燒到好乾：

牛油焗野菌都唔錯，不過唔算係上上級數，可有可無：

我地另外叫左個刺身拼盤，大家睇下，留意下Ｄ刺身。唔整齊嫁：

我覺得呢碟有Ｄ亂黎，真係當人地係傻既；魚生唔齊整，即係唔新鮮啦，而且亦唔好味，又好細碟，細到不合比例，而且都幾貴，下次一定唔好要！

套餐加六蚊有杯咖啡，咁又黎杯啦，中下級數，我勸你叫杯清水好過：

總括黎講，呢間野你只可以叫二十穀米飯同埋手打烏冬，其它一概不叫，咁你會食得好開心！

甘味
地址：沙田新城市廣場三期１／ＦＡ１９２舖
必食推介：牛肉烏冬，牛肩穀米飯
平均消費：一百二十元
分數：　　（可以一去）

（分數指南：以六粒星最好，無星最差。）

無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去