今天介紹一間比較特別的食館，唔識窿路根本無可能去得到；而且吃完之後，我覺得佢基本上係要蝕俾你，呢間就係灣仔得成閣餐廳了。

有乜咁特別，因為嚴格上黎講，佢唔係一間餐廳，而係一間麻雀會，如果沒有打麻雀習慣的話，都幾難知道有咁樣既一個地方。龍師傅唔打麻雀（因為覺得甚為浪費時間，而且也花不起這樣的時間），但都知道。點解知道，朋友講咪知咯！

這天和友人駕車而來，上到黎即刻有位，這是它的一大好處。其實這間得成閣有三大好處，就是：一定有位，價錢勁平及好好味！

來到最好叫套餐，無論你想食乜，都多數包括在套餐之中了：

我最欣賞係四人套餐，每人六十元，有翅（成梳果隻），有蒸魚，仲有飲品，咁仲想點？值得一提的是，招呼在水準之上，絕不會是呼呼喝喝那一類，甚有好感！

我們四個人，當然叫個四人套餐啦！

先來翅，好熱，而且好大碗，大家食落都讚不絕口！

你先唔好理佢係乜野級數既翅，即使是碗仔翅，我覺得六十元一位包哂所有餸菜係極抵食，更何況係真翅？

成梳上，絕無欺場：

蒸水蛋，非常滑，而且甚香，我甚感意外雀會都做得到咁既水準：

六十蚊位晚飯，點都無諗過有西蘭花帶子，呢度就有了，真係喜出望外！

金銀蛋菜，又係一個好好既送飯材料：

仲有個大大既燒味拼盤，我暈咯：

最好係唔單只平，仲要係好好味，我真係從無諗過！

最後到蒸魚，叫左紅鮋，不過不失：

條魚都有一斤三左右，甚為抵食。

下次去開灣仔又搵唔到位食飯，呢度絕對係不二之選！

德成閣餐廳

地址: 灣仔莊士敦道 194-204 號灣仔商業中心 2/F

電話: 25723316

必食推介: 二人套餐, 四人套餐

平均消費: 每人 60 元

食物質素：　　　
環境質素：　　　
服務質素：　　　
物值　　：　　　　    　
總評　　：　　　　　四個太極，一定要去

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去