今天，介紹一間食雲吞麵必去既地方，以物值來說，殺哂！

呢間就係今日介紹既權記了！

無論你何時何地去，都係咁多人，因為佢任何時候，粉麵都係十蚊碗，無花無假，無加一，真係好抵食！最難得既，係佢好好食！

睇下個餐牌，基本上我覺得佢地雲吞同埋魚蛋係最耍家既，牛丸係黑椒牛丸，都好味，墨丸就一般。

以今時今日黎講，百物騰貴，即使佢加兩，三蚊我都覺得合理，但佢直頭無加，我真係好感激，我亦都好捧場，久不久要快食既就要黎呢度，叫夠兩碗都唔會肉赤！

調味料有魚露，醋同棘油，我最欣賞既係佢既棘油，下次你黎一定要落番Ｄ！

棘油炒都好甘香，睇到都香噴噴！

我叫左碗牛肉粗麵，只係食牛肉已經好抵了，雖然係本地牛，但係好新鮮，亦好彈牙！

粗麵亦都係水準之作，我覺得絕對唔會比池記或忠記差！

雲吞非常爽口，一碗有四粒，抵食到爛；以物值計，如果忠記係賣三十七蚊一碗雲吞麵既話，呢間權記起碼都值三十五蚊，咁佢而家只係收你十蚊，一碗當三碗半，你話喇！

裏面既蝦好大隻呀！

我另外叫左碗淨雙丸，都係十蚊，記住，綠色碗係十蚊，我覺得呢間權記幾好，因為咁平，可以睇得出有好多老人家，又或者退休人士來，反而我去忠記，乜人都無，我覺得權記對社會都係有貢獻既，收得咁平，好多人都食得起，真係值得一讚！

牛丸大大粒，當然同樂園無得比，但最好既牛肉同雲吞都叫左，咁就叫次好既牛丸啦！

墨魚丸就一般：

下次來上環，記住俾個機會佢啊！