看到王子網誌介紹一門，一於要試一下！

其實黃金廣場我都去過 N 次，樓上樓下我都去過，係呢間未去過，同埋有間叫和幸既，因為呢兩間都好貴，貴得黎我又唔知有無道理，所以一直到無去。

早兩日已經打算去呢間一門，打去，無檯，最快要到九點半後，咁第二日啦！

第二日，打去，又係無檯，興趣來了，價錢收得咁貴，但又無檯？咁即係好好味啦！

第三日，晨咁早十一點幾打去，都係無檯，但 Bar 檯可以安排下，咁好啦，照殺！

這裏的消費如何？給你一個參考。六件壽司要一百四十元，八片刺身加少少海膽要二百元，我想也不算平宜了。

不過一場來到，早有預算，也就不太看價錢，叫了一些東西試一下。

串燒，平均四十元一串，都算貴。

我們叫了牛舌，非常對板！

爽口，香，而且燒得很好，包著一層油，入口散開，油味馬上充滿整個口腔，很有滿足感呢！

這個基本燒玉子，一定要叫，因為我未有在香港其它地方吃過，更不用論是否好味了：

呢個燒玉子三十八元，以物值來說我覺得是超值。我想起碼用上三隻雞蛋，再加一些醬汁燒成，睇住師傅燒，燒足五分鐘，都算對得你住了。如以紫微斗數及風水計，我同客人講五分鐘肯定唔只呢個價錢。

這個上湯揚豆腐，我覺得他們做得不錯，四十五元，可以一吃：

來到熱棘棘，很是新鮮！

餃子，亦是我很欣賞的一道菜：

餃子裏面肉汁豐富，而且甚為香甜，我記得吃完不斷點頭，因為味覺實在太過豐富及滿足了！

俾一個內餡你睇睇：

四十元，五件，不貴了。

和牛沙律，九十八元：

本來是沖著 "和牛" 兩字而叫的。那麼，我見到有番茄，生菜，和牛在那裏？不用急，其實都好大粒的，話俾你知，其實在上面塊綠色生菜（偏左果塊）上面既四粒紅點了！

我影這粒和牛，就好像影微生物一樣，要定近鏡加微距才影得到，你一口都可以食了十粒而不知道。

可能用料貴吧，但我又不覺加了和牛有甚麼好味，份量太少，下次想食和牛，還是去正正宗宗食一塊算了。

壽司來了，有六件：

我覺得價錢都算合理，因為隻牡丹蝦真係好大隻！

三件得，三件唔得，好似以下呢隻牡丹蝦超得，不過我無得食：

因為被龍嫂吃了，她說超得，我信佢啦，睇個樣都係！

吞拿魚，一般貨色，未係好 impress，但我想起鮮壽司，反了這件壽司一下：

如你有心機比對，你會發覺這個飯糰和鮮壽司是不一樣的，這個很實淨，咬感極好！反而鮮壽司一反，飯粒都走了去遊玩了，亂在一團呢。

在吃的時候，常常見到師傅將魚拿出來劏，可以看到他表演，坐 Bar 檯也自有其好處。

其餘壽司都好好味，我尤其係介紹吞拿魚腩及海膽：

只係劍魚同埋三文魚物值上唔值而已，話哂百四元得六件壽司一定是有要求的。

我們的刺身，也來了，登登登登！

長條形上，甚有氣勢，而且也算厚切，二百元算是合理。

帶子，同羽一樣，鮮甜！

三文魚，厚切，我鐘意，啖啖肉，真的食到好唔得閒！

油甘魚，質素極佳，很新鮮：

這裏的裝修都很日本化，令你有暫時在日本的感覺。

我和龍嫂商量了很久，就像當年討論無間道還是頭文字D好看，結果沒有太過肯定的結論。

最重要我們是平均看，如以壽司，刺身肯定唔值呢個價錢；但其它熟食則殺哂，有幾味菜，例如串燒牛舌，串燒鰻魚，我是一讚再讚的！

但物值我們又覺得未必是這樣，所以遲疑了很久，未能評分。

一門日本料理

地址：銅鑼灣軒尼斯道 502  號黃金廣場 4 字樓

必食推介：串燒鰻魚，串燒牛舌，燒玉子

平均消費: 兩人吃了七百找四

食物質素：　　　　
環境質素：　　　
服務質素：　　　　　
物值　　：　　 　　

總評　　：　　　　　四個太極，一定要去

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去