今天為大家介紹一間位於尖沙咀港威中心的日本餐廳，麻布茶房。

這間餐廳以前在銅鑼灣也有，位置是在名店街，去了 N 次過門而不入，我也想不出原因。因為我也喜歡吃日本菜，所以應該是要試一試的，但那個時候始終沒有去，後來還關門了。直至今天經過尖沙咀才去試一下。

侍應為我和龍嫂安排坐位：

這個位置太過擠迫了，我們看見有旁邊不遠處有一張獨立檯，於是說要坐那張檯子，他們答應。

一坐下去，總覺怪怪的：

大家可能會不覺眼，所以我特登將 menu 放在檯上給大家比對一下。這張檯太細了。細過平時既檯三分之一左右。

本來我也沒有所謂，但後來菜未來之前，由於檯面太細，所以龍嫂一撞，倒瀉左杯茶，及一杯水，仲要係傾全力，一滴不漏咁，由件大褸及手袋飲哂，那當然要換檯啦！

換完檯之後，佢地又無比番Ｄ水同茶我地，招呼勁差！現場觀察所得，係因為好多人都係新手，又唔夠人，所以有咁既服務。

我地開始叫野食，個 menu 好精緻：

打開，真係乜都有：

大碟既細碟既，精緻既，有齊！價錢都ＯＫ，細細碟，平均四五十蚊度，博你唔覺唔覺，叫多幾碟，以為好抵，埋單都要二百幾。

有魚叫，但係熟既，我只係食海星班，都係唔多合我心意了。

另有一Ｄ拉麵，我地後來無叫，不過睇到隔離叫左都好似幾好，佢地食完猛咁點頭，應該都唔錯。

飲品更係包羅萬有，不過幾十元一杯，我睇佢成本都唔駛三蚊，可能主要都係賺你呢Ｄ黎交租，但賣相真係幾鬼靚：

飯團賣相都幾得：

咖啡都好似幾靚，對於無咖啡會死的我，都要整杯黎試下：

我地叫左個烏龍麵，呢次輪到龍嫂猛咁點頭，佢話極力推介，叫我一定要寫：

再來就係炒什菌，正到暈，一定要試，好香，可能落左牛油；雖然唔好招呼，但Ｄ野真係幾好味：

跟烏龍麵有個湯，都幾清，OK 啦！

呢個牛柳，又係必食之選，真係正到暈，又香，又有牛味，好好口感！

呢碟係前菜，即係夾硬屈你食果Ｄ，都ＯＫ，好味！

點解突然我面前多左一碗小碟野食既？我好似無叫喎！龍嫂話係佢夾比我既，係烏龍麵。原來我掛住影相都唔知，唔該哂喎！

咖啡，好飲，但三十元我覺得又太貴，因為都唔係好值呢個價錢，佢係用愛護牌忌廉既，而愛護牌忌廉有提升咖啡香味既能力，令到一般的咖啡 "飲落去好似幾好"。

最後食左個蕃薯雪糕，非常好味，好明顯佢係落重本，而價錢亦係落重本，四十二蚊，即係 7-11 三皮既軟雪糕加個蕃薯，我覺得唔係好抵。但係龍嫂又猛點頭喎，可想而知甜品對女人係幾咁有吸引力，呢Ｄ又係乜野心理呢？

佢有個特色，好快溶，可能舊蕃薯好熱卦？

我覺得佢既野真係好好食，但係招呼就麻麻，佢又唔係唔做，只係你踼一踼佢，佢就會郁一郁，好明顯係完全無 training，同 pokka 完全係兩個世界。

晚上九點去，勁多人，尖沙咀都係越夜越精神！

麻布茶房
地址：九龍尖沙咀港威中心
必食推介：牛柳，烏龍麵，拉麵，蕃薯雪糕
平均消費：每人一百三十元
分數：＊　＊　＊

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去