這篇網誌其實是在二月十四日寫的，不過稿擠，排到今天才能夠見街。

我本來一早訂了洲際酒店的情人節 buffet，每人七百八十元，再加一，埋單兩個人差不多兩千元，龍嫂甚為肉痛，於是堅決反對我們在那天去食 buffet。

就是這樣，唯有放棄，係你自己講唔駛慶祝，唔關我事嫁！

退而求其次，唯有折現，因為現時工作已忙了很多，也沒有太多時間去選購禮物；再者，很多東西龍嫂都有了，也想不到送甚麼東西；送禮物給人最怕別人不合意，所以我覺得都幾難諗。

大家都說明當天不用送禮物，因為我地都過得好開心，差唔多日日都係情人節；而吃飯方面，也是當天晚上才作決定，還要在我寫字樓見完客才商量；那時已經是晚上七點了，差點想去文輝食河粉算數。

其實有個好似龍嫂咁樣既女人都幾好的，起碼我唔駛煩，佢亦好易滿足，男人最怕女人煩；我常說，女人唔煩已經係綁住男人成功既一半了。

最後決定去星泰屋，其實氣氛都幾好嫁，又唔會太光，暗暗地，野食又好好；雖然我地都去過多次，但果晚其實太家都好肚餓，所以都係好開心咁去。

我地決定叫 D 以前一直未叫過既野食。第一個係青咖喱雞：

做得麻麻地，可能因為好棘。我叫呢個既原因係一來無食過，二來我見過有好多鬼佬入黎係叫呢樣。原來未必係多人叫就好味，係 D 鬼佬唔識叫而已。

拉尾叫左個白飯送咖喱汁，一般啦：

第二樣係軟殼蟹，做得好好味，五十五元有咁多隻都算係咁了：

我最鐘意係佢既椒鹽，唔孤寒，有幾多落幾多，咁先至夠味嫁！

另一樣係蠔仔蛋，叫完我先發覺，唔係果行就唔好食果行飯，泰國餐廳就唔好叫潮州野：

蛋又硬，蠔又少，一 D 都唔好味呢！

反而椰青就幾甜，二十元蚊我地叫左兩個，都好抵飲：

到最後，龍嫂無端端拎左盒野出黎，攪乜鬼？原來佢買左情人節禮物俾我，係條皮帶黎，因為佢知我想換皮帶，所以今日特登去買左條俾我，又會咁既？話明唔送禮物嫁麻？我完全無心理準備，亦無禮物作為回禮，因為由朝早做到晚上，食飯都無時間，又點會有時間買禮物呢？雖然我都有折現，但都俾唔上佢咁有心思呢！

咁我都要多謝佢，亦見得出女仔係好細心，好識睇通睇透。好啦，係呢度多謝龍嫂，出年我早少少 plan 定，等你過一個開心既情人節啦！