早前為了睇奧運，響應高清及超水準 5.1 聲道直播，走去百老匯看了音響，到最後決定買呢套抵到暈既 Sony DZ750k 五聲道 Hi-Fi：

真係好抵，唔買真係唔知而家既音響可以平到咁，以前好Ｄ既 5.1，郁Ｄ就話過萬，而家呢套，原價四千，而家用中銀咭再平一千，即係三千，已經有好高既水準。

我成日都話，會考由唔合格到合格係好易，由合格到拿個 C 都係好易，但係 C 去 B，B 去 A 就難過登天。點解呢？因為攞 A 要講運，例如數學，96 分先有A，咁花少少力氣攞個 C 咪好咯，其餘大部份時間去做自己更鐘意做既野。

呢句話係中原地產施永青先生講既，我好 buy，因為我都係咁，永遠只係用兩成時間去完成八成既東西。所以施先生都叫佢既仔女唔好讀書，因為真係好浪費時間。

音響都係一樣，幾百元同幾千元既音響，係有好大分別（你用開 USB 入電蕊既喇叭你就知道），但係幾千元同幾萬元既音響，分別唔大，幾萬同幾十萬既音響，更加唔係人既聽覺可以分辨到。所以我都係買中價貨，好聽就算，留番Ｄ錢黎買股票好過，而家係低潮，真係入得過。

講番套音響，等左一個星期先送貨，一送貨，自然急不及待拆開：

好多舊，同埋有好多線：

由於太忙，我都要三日後，同龍嫂一齊得閒先開始砌，砌完仲要放好，拉線，都幾麻煩，用左一個鐘頭左右。

以現時來說，一個鐘頭的時間已經很寶貴了，因為年尾已經開始忙。

唔駛驚砌線，只要你係智力正常既男人既話，一定砌到；女人係智力正常都唔會切，因為男女生理構造有別；佢地會覺得你地男人砌係天公地道既！

砌好之後，放在無印櫃上面 perfect，有前置，中置，低音，後置，再加埋個 DVD 機，剛好！

講開無印，要介紹下呢個櫃，我當年買既時候，龍嫂問我幾多錢，我話三千六；龍嫂即刻話："吓？你三千六買幾舊廁紙筒？"

其實真係物有所值，上面個櫃都係在我原先買既櫃拆出來既一部份而已。我好 buy 無印既理念。呢個廁紙筒櫃，其實大有來頭，因為呢 D 紙筒係防水既，而且當年用在一Ｄ有天災既國家，幫佢地重建家園，起屋既，夠神奇哩！

講番呢套 Sony 5.1 DVD 組合，真係好抵，我聽 DVD 既時候，個低音同中音真係發揮佢地既成用，睇 Concert 呯呯聲，拆樓一樣，人聲好清：

呢部 DVD 亦係好野，除左睇 DVD 之外，聽歌亦得，只需要放入 CD，又或者插 USB 播 MP3 都得，水準好高，我用黎聽陳潔麗，真係聽出耳油！

後置喇叭，盡量放在高處，佢有四十呎線俾你，一定夠：

我最欣賞既係，而家幾千蚊既 Hi Fi，都有幾萬蚊一套喇叭先有既試音裝置。係點試呢？因為每間屋既大細都唔同，而且左右，前後既喇叭都無可能放在佢提議既正確位置。唔緊要，佢有個試音咪俾你：

佢真係一個咪黎。將它放在皇帝位上，然後按測試，佢會自動幫你做 13 個 testing，靠個咪收音，從而評估每個喇叭既距離，然後幫你調校每個喇叭既音量，真係好神奇，可能我真係無乜點玩過 Hi Fi，十七年前三萬幾蚊買對 Tannoy 就無買過，亦無睇過，今次都係要聽奧運，睇高清才買一套放在寫字樓，物有所值；有時Ｄ客未黎，坐在梳化上，熄哂燈，開番柔和既黃光燈，聽下寫意既歌曲，一樂也！ 

順帶一提，百老匯另有一套放在隔離，個前置喇叭細少少，要二千四元，千祈唔好改變主意，加呢五百元你一定唔好後悔；仲有，同價既 Philips，Samsung，JVC 我試過哂，質素最好係呢部 Sony，仲要高幾班；去到千祈唔好改變主意及信心動搖！