今日同大家講下旺角有間舖, 叫做冇骨氣, 野葛菜既風水:

呢間舖, 好明顯亦係無搵人睇過風水. 問題如下:

第一: 間舖係收順水, 睇下車既方向就知道, 即使佢無門口, 都只係收順水, 咁係漏財, 搵埋都肯定唔夠交租.

第二: 街舖最忌無門框, 門口可以唔使開, 我成日都叫D客咁做, 因為有街舖有門係會阻礙生意, 你有無見過銅鑼灣賣魚蛋既舖係要推門入去呀? 無麻?

呢樣野我同好多客講過, 有D客聽, 有D客唔聽, 你開洋服舖可能有門人客都係推門入去, 但如果係做食既, 而又係在街舖開既, 幾大都唔好有門, 我有一半客聽, 一半客唔聽, 唔聽既客人, 佢地既原因係驚走冷氣, 我真係俾佢地吹脹!

驚走冷氣, 用大匹數既冷氣, 再加閘風機咪得咯, 驚走冷氣又係驚俾貴電費, 呢D野根本就唔慳得, 亦係好易明既道理.

不過即使無門都好, 一定要有門線, 咁樣先可以聚氣, 十字路口舖位好多間都係衰呢樣, 坐向又無, 方向又無, 根本就係漏氣!

第三: 個名都改得怪過人, 冇骨氣, 個名本身都有問題; 雖然佢地既原意可能係下火既意思, 但做生意最忌係個名改得唔好!

我唔知大家有無去過灣仔既三不賣, 呢間其實唔係三不賣既分店, 但佢地就裝修到好似同灣仔三不賣一樣, 等D人以為係一樣, 就咁幫趁左!

你呃得人一次, 呃唔到人第二次. 我即管幫趁左一碗, 完全無味, 溝水溝到暈, 仲要收到七蚊一碗, 以呢個位既租同埋佢既人流黎計, 佢根本就係幫業主交緊租; 咁租貴, 賺唔到錢咯, 咪將貨就價咯, 但係又唔好飲, 咁D客人又唔會黎, 所以又係好短期既貨仔.

我飲緊既時候, 已經可以將呢間舖頭解碼. 佢應該在一年前左右開, 果時只係賣葛菜水, 而家仲有涼茶等其它五六種東西賣, 咁即係佢唔掂, 要諗計求存咯.

再者, 佢連工場都無, 根本係交黎既, 但以佢既質素計, 根本好難會有人再去幫趁.

我想話俾大家知, 我地做乜野都一定會有人睇得到, 所以呢間舖我都斷定佢唔會做得好長.