今日出左去旺角，唔記得帶相機，所以借左朋友部機影，點知影得唔係好靚，因為用唔慣呀。

論環境，呢間係朗豪坊 13 樓的佳肴店確係唔錯，環境清幽又有格調。d 野食仲好好味添。

先黎一個太爺雞，一食之下，發現好香茶味，薰煙味，出面唔係周圍可以食到，難得的是，肉汁很多而且香滑。雖然價錢有點貴，$120半隻，但以物值黎算，都是合理價錢吧。

再來就是大蜆蒸蛋，你睇佢 d 蜆幾大隻！好鮮甜啊，連帶蛋也有蜆的鮮甜味，也得滑呢！

再來就是黃金蝦，這個菜餐牌上是沒有的，只是朋友之前吃過，覺得很好吃，所以今日特別問部長有沒有這款菜，他很有禮貌的說要問一下廚房才知道，結果當然是有呀，黃金蝦最難的是整到 d 蝦唔似乾爭爭，我係出面食好多時都太乾，，今次呢個整得好好食，連 d 殼都食得，兼且唔會太乾，蛋黃也配合得剛剛好。

士多啤梨焗肉排是他們的招牌菜，梗係要食啦，肉排做得很好，士多啤梨味很濃，最重要就係唔太酸嘛！

食左咁多肉，梗要食番 d 菜，呢個油麥菜銀魚都做得不錯，但就有少少辣的。

食完晒野之後，其實都好飽，但好似欠左個甜品，見到有桂花蛋散，好耐未食過蛋散，於是叫左一客，個桂花糖漿，我個人黎講覺得太甜，但桂花味好重。

其實全晚做得最差的就是這個蛋散了，和我想象的完全唔同，雖然唔可以講話唔好食，但唔係我想象中的蛋散咁樣囉！仲要廿蚊咁貴，咁點都有Ｄ要求卦？

除左呢個蛋散之外，我之前也去過多次，甜品其它如楊枝甘露，合桃露，Taramisu，New York Cheese Cake 我都誠意推介！

佳倄館
地址：旺角朗豪坊十三樓六號舖
必食推介：太爺雞，黃金蝦，士多啤梨焗肉排
平均消費：一百三十元
分數：　　　   （一定要去）

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去