今天下午在銅鑼灣吃午飯，順便買本電腦雜誌 PC Market 睇下，剛巧睇到華碩 Eee PC 出左內建 Windows 版本，價錢只是三千五百元，當下想了五分鐘，決定到灣仔電腦城買左佢；一來好平，二來好輕，三來我用得著。

相信大家對 Eee PC 都唔會陌生，佢係一部好細既電腦，非常輕便，最啱我呢Ｄ成日週圍去既人，重量只有 900g，內建 windows XP，我可以裝埋玄學博士，同埋論命軟件，唔駛下下帶部比較重既 Laptop 出去。

我剛在上個星期決定了買 Macbook Air，不過無現貨，要等兩個星期先有，而呢部 Eee PC 好似細Ｄ，用途差唔多，但價錢平五倍，所以都無乜點諗，想即刻成交。

午飯後馬上去到灣仔電腦城，有四間有得賣，但四間都話無 Windows XP 版本，只係得 Lunix ，我覺得奇怪，明明電腦廣場雜誌已經有哂價錢，於是照住雜誌上既電話打去漢科，佢係香港既華碩代理。

打左三次，長響，話線路繁忙，要我留言，我已經有點不耐煩，第四次終於打通，一個非常沒有禮貌的女士接聽，問我乜事，我話睇到雜誌話有內建 Windows XP既 Eee PC 賣，但係去到灣仔電腦城搵唔到，佢好無禮貌咁講，話有Ｄ係漢科代理有Ｄ唔係，我都唔知佢講乜。

一時又話未出一時又話唔知，我真係火都黎埋，我問佢明明今日睇到新出既雜誌上話有，然後又留左漢科既電話，咁我梗係打黎問啦；佢完全唔知道雜誌有佢地既電話，又多口話內建果個係 Vista，唔係 XP，我於是問左佢三次，係咪內建 Vista，佢都話係，我都無同佢再講落去，只係問佢邊度有得賣。

最後佢俾左旺角山東街星際城市分店既電話俾我，我於是照打去。

呢位員工就好好多，佢話而家貨未到，要下個星期先到，同埋跟機果個係 Windows XP，唔係 Vista，咁我都清楚Ｄ，亦可能我同呢部機無緣，可能都係要買番 Macbook Air。

從呢件事可以睇得出，專業同唔專業既分別。我覺得專業係要自己造既，呢個代理直頭唔專業到爆！

1. 有乜理由電腦雜誌出街報告左個新 product，自己都未有得賣？
2. 出左稿連自己漢科都唔知出左，員工亦都唔知，有無攪錯？
3. 接線既員工夠膽死話呢部機跟機係 Vista，我都唔明漢科點會請左Ｄ咁既員工，完全無應付來電詢問既知識，咁簡單既野都講錯，如果我係老細，即刻炒得啦！

又想起去年攪記憶術課程同埋思想改變運氣課程，真係感概萬千。當時完全唔係為賺錢，只係為左自己既理念，同埋練好自己既 presentatioin，兼學 marketing；雖然只係得我同龍嫂兩個人，但係我地都表現出最專業既態度，落哂唔同日子廣告，前一個星期我已經同龍嫂預備哂 standard script，報名解答同埋要龍嫂背哂（因為接電話係佢）。

我好難想像自己落左廣告，然後Ｄ人照電話打黎報名，仲問佢："哦，出左喇咩？我地唔知喎，你等等，你想報乜野？"

我覺得每個人都應該專重自己既專業，即使係一個清潔阿姐，都應該有佢既專業態度。

又例如 SOGO "揸 Lift 人" Ling 姐，我睇住佢起碼做左十二年，每日十二個鐘，係咁係部 lift 度，上上落落，每日長期都係講同一句說話，喂大佬真係唔悶呀？

不過我由十二年開始留意到佢，第一次見佢已經覺得佢好專業，制服整齊到爆，仲要戴埋白手襪，完全係一個專業既形象。

佢每次開門既時候，都會高舉單手，我覺得好 charming；可能有Ｄ人會覺得唔係乜野，但我可以話俾你知，十二年做同一個動作，到今時今日仍然有笑容，有高舉單手，呢Ｄ就係對份工專業既態度了。

我記得攪講座既時候，好多時都會有好多要求，龍嫂都會話 "唔駛卦？" 我即刻話一定要。 例如我會記哂所有免費講座（平均四十人。五十人都試過）既人名同埋登記編號，每個人一黎到，佢一講個名，我會即刻講到佢個姓同埋編號，然後馬上帶佢去預先安排好既座位。跟住即刻認埋佢個樣，問問題我可以指明任何一個學生回答，呢個做法既好處係，佢地好有投入感，同埋好互動，佢地會諗："呢個人係咪痴線嫁？每個人既名佢都記得，咁佢一陣咪有機會要我答？" 就係咁，場場講座每個人都好留心，而講座之後每一個人都好 impressed，唔明點解可以做得到，有Ｄ話全靠記憶術啫，我聽後即刻講："係，記憶術可以幫我記哂你地個名同埋編號，但最重要唔係呢Ｄ，而係最緊要有心；無心，乜野記憶術都係假，我可以夠膽講，全香港無人攪課程會記哂所有人既名同編號，包括所有記憶術課程，因為大部份人都覺得花時間去記下免費講座既人既名同埋編號係無需要；但我可以話你知，呢Ｄ就係專業同唔專業既分別了。亦因此，每一個學生上過我的課程之後都很開心，全部都有賓至如歸的感覺，好評如潮，我亦覺得開心，也因此認識到一大班朋友，很多後來都成為我的客人。

我而家都一樣，每一個客人第一次打電話來，我都會記低佢個名，好少有客人再打來我講唔出佢個名的。我記得有個客人叫張小姐，佢幾年前搵過我睇紫微斗數，最近搵我睇風水，我一睇到個電話就認得，佢即刻好 impressed，其實入個名之麻，有幾難？分別只係你有心做同埋無心做而已。

我見客或開會時，例必不聽任何一個電話，我覺得是對 client 或 vendor 基本的尊重。

我又試過和一間教育機構開會談合作講座課程。那個校長真的不知所謂，我和他們的 marketing director 正在商談合作商機，那個校長竟然低頭看其它的文件；這個情景給我看到，我馬上起身告辭。

龍嫂問我："點解唔傾落去呀？" 我話："我只係睇佢呢個 gesture，我已經即刻解到碼，佢地百份百係混吉啦，人地有興趣點會咁做，再傾落去只係嘥我時間，我地既人生係好重要的，一秒都唔可以浪費！"

龍嫂再問："咁無理由呀？人地主動打電話黎約你，點會無興趣？"

我話："其實只係個 marketing director 有興趣，因為係佢主動約我地，但個校長既 gesture 表現出佢完全無興趣！咁話事當然係校長啦，所以都唔駛傾了！"

睇過我本 "創勢記" 既朋友都知道，對人既行為或語言解碼真係好重要！ 

只是概嘆為何現今很多人都不太專業，其實一些簡單的事情已經可以做到基本的專業了，例如開會電話不停響，仲要即刻大聲講，我覺得都係一個 concept 的問題，只要我們都有這個 concept，就會朝著這個方向進發了。

BONUS BLOG：八十年代日本安眠樂隊在紅白重現！

八十年代，有迷開日本歌星的朋友，無人不知道 "安眠樂隊" 這對女子組合。她們的成名曲是 "等待"，當時長期雄據日本唱片榜冠軍。

今天收到友人通知，說今年的紅白歌唱大賽裏特別邀請了安眠樂隊上台獻唱，場面感人，轉眼間已經是廿年了，魁力不減，還在 Youtube 可以看到，真的高興萬分！

甚麼是專業？看過這段表演就知道了；除了歌唱得好之外，大家要留意：

1. 她們的歌很整齊，沒有爭聲，沒有先後，仿如只有一把聲音，其實這是很難做到的，你去 Karaoke 和人一同唱就知道了；我只見到爭咪，先後聲。

2. 她們的台風幾乎一樣，就像韻律泳般，齊得不能再齊，就連一舉手，一投足也是一樣，看得出她們是練了很久的。

請欣賞！