最輕便 notebook – 華碩 Eee PC已入手

想了數天, 在多方面的意見之下, 經過反覆的思量, 在 "型" 及 "輕便" 及 "價錢" 的考慮之下, 終於買了華碩的 Eee PC, Windows XP 版:

本來想著下個星期才買, 因為上次旺角漢科說要下個星期先有, 沒想到在星期六, 無意中行過灣仔電腦城已經看到, 還要是現貨 (又一次證明漢科的不專業, 連自己代理既 product 幾時有都唔知).

價錢只是 3,488 元, 雖然比起 linix 版本足足貴了六百元, 但我只想著內置 windows XP 唔駛咁麻煩, 再買多一個 OEM 也不只這個價錢, 始終內置係方便好多!

論大小, 它的確非常少, 足足細過 keyboard 一半:

這個 notebook 只有B5 size, 即是  A4 size 的一半:

它除了內置 Windows XP 之外, 還內置了 Microsoft Works, 所以用 Word, Excel, Powerpoint, Access 絕對無問題.

內置 4GB, 裝左 windows XP 之後已經無左一半, 所以乜都唔裝得, 不過這部電腦最重要是拿出街上網, 回覆電郵等簡單事情, 所以我也沒有打算裝甚麼軟件上去.

不過, 論命睇風水軟件當然要裝, 裝左我自己的風水軟件 "玄學博士" 之後, 運作絕對無問題, 而且出外睇風水用呢部 notebook 睇星圖, 超 pro:

有人話, 睇風水使鬼咁 pro 咩? 我正想話, 睇風水就係要咁 pro, 你試諗下, 有個人話自己睇風水好叻, 上到黎, 睡衣拖鞋, 然後搵個指南針幫你睇, 跟住用張霉霉爛爛既撕開左既報紙邊寫個星圖俾你, 咁你會點諗?

又或者, 你去銀行入錢, 個職員用手計左個數, 寫低落你本存摺簿俾番你, 咁你會點?

所以時代已經不同了!

除左睇風水之外, 上網都係好緊要, 亦因此, 同時買了這個 HSDPA Modem:

做得非常輕, 只有 50 gram, 出街用最方便, 不過就要負擔 500 元的月費, 同埋要簽廿四個月合約!

有時話, 用錢買時間, 用錢買方便, 到今日我真係感同身受了.

整件產品我都好滿意, 唯一不好的就是 keyboard, 成日打錯位, 因為太過細, 但都比起 UMPC 好好多了, 唯有適應下啦!

待我用番兩個禮拜, 再向大家報告這部機的實用程度.

  • man fai表示:

    龍師傅真是潮形師傅呢!
    睇風水用notebook係一個反襯,古代加現代混合體。
    係香港之中,應該都只有龍師傅了...我暈
    [版主回覆03/17/2008 01:05:00]哈, 唔駛暈呀, 而家有好多師傅都好專業嫁! 不過我可能有教班, 同埋留意別人的心理, 所以更加注重外表及 gesture 呢.
    這個 "專業及外表很重要" 的靈感也是從補習天王那裏得來的. 人地做先生佢地做先生, 點解補習天王可以搵過千萬呢? 呢D就係 gesture 了. 晚上講既內容, 同日頭都係一樣, 斷無理由會考會有兩個範圍掛, 講同一樣野, 可以有差天共地的變化, 這就是專業及 gesture 了.
    你寧願有個風水師用指南針同你睇風水, 定係有個羅庚呀? 其實道理好簡單呢!

  • 米雪兒表示:

    有人話, 睇風水使鬼咁 pro 咩?  <<<< 乜唔洗 Pro 啊?  幾大都要 Pro !  仲要係做最 Pro 嗰個o忝!  龍師傅你更加係要做 「風水界嘅潮 Pro 先驅者」 o忝啊!   「行快人幾步,深入人民心」 !  
    响呢個世界上,有好多嘢根本都係要講求 「包裝」 架啦!  點解?  全因為根本呢個就係一個好現實世界嚟囉!  所以有一個靚 「包裝」 ,就絕對可以等同於手上面拎住一張 「幸運通行證」 咁,真係事事順利又事半功倍好多架!  之所以話呢.... 「人靠衣裝,佛靠金裝」 嘛!  哈哈哈!   「突圍而出」 令人心中存有一個 「平凡中見突出」 嘅 「不一樣」 的印象,毫無疑問真係好重要架!  嘻嘻!
    [版主回覆03/17/2008 21:57:00]多謝你既鼓勵呀米雪兒, 我都覺得呢部 notebook 係物有所值, 最重要係唔駛我重新適應麻, Linix 我都玩過, 真係幾麻煩!
    我好多時都覺得專業係好重要, 所以我特別花多D時間係呢方面, 而我亦見得太多社會上既不公平現象, 果D好勤力, 做好多野既人覺得好唔抵, 其實都係睇下力度向邊個方向而已!

  • Ben表示:

    呵呵~~~終於都買咗啦 ! 我都覺得係要Pro D…有Notebook係到可以搵到好多資料….
    [版主回覆03/17/2008 21:58:00]Ben, 係呀, 好方便, 係街隨時想到乜都可以立即睇到, 又唔駛搵 WiFi, 真係物有所值嫁!

  • Master Pak表示:

    雖然容量不夠,但可以另加USB drive問題可解了。現時的USB drives十分輕便,容量基本上不成問題。無錯,用電腦做事就是為了方便嘛。龍師傅看風水,這個小型notebook最適合不過了。我看過一個七十多歲的玄學家一樣用電腦為客人算命,儲存客戶資料,這就是專業了。白手起盤都會有出錯的機會啦,用電腦起盤既快而準,為何不用?除非個程式有bugs架者。 龍師傅,有沒有試過用電話上網呢?notebook有bluetooth接駁PPC便可以上網了,速度既不比modem speed遜色,更可省卻modem上線月費。iphone應該可以做得到吧?
    [版主回覆03/17/2008 22:01:00]秋雲兄, 係呀, 有時候都唔係自己知識既問題. 既然有咁既知識, 為何不做得專業一點呢? 專業一點, 客人信心都會強D.
    有D客人都會咁樣, 個個都唔信, 只係信我, 咁我自己都好開心嫁!
    用 BT 接駁既 GPRS 我以前都有用過, 但速度都比較慢, 現時的 modem 就好像寫字樓的 broadband 一樣, 好快呀!

  • beck表示:

    我欣賞龍師傅一向都係pro 既師傅……. 客人一定都識欣賞
    [版主回覆03/17/2008 22:01:00]連理枝, 多謝你既讚賞呀!

  • Cody Yim表示:

    風水既野我唔識…不過用notebook, 形象上的確有提升哩.
    [版主回覆03/17/2008 22:06:00]Cody, 係呀, 你果行都係啦, 拎個傻瓜機週圍影, 同拎個 Canon DSLR 影, 感覺都係唔同的.
    看了你影的相, 好 impress, 在照相方面我要跟你多多學習呢! 我最喜歡你每張相都有框, 又有水印, 還有 details, 我還以為是 Canon 的軟件, 因為我有一部 Canon IXUS 相機, 就試著安裝了隨機附送的軟件看一下, 但沒有你相片的功能呢, 很是失望!
    你要努力呀, 影多一些靚相給我們看, 看你的相就好像看到你的內心世界, 很 touching 呢, 到今天我的腦海還有那些馬騮的影象, 最好笑是最尾的那隻貓呢!

  • maggie表示:

    幾好喎…不過4GB 真係細左小小
    [版主回覆03/17/2008 22:06:00]兔兔, 極度細, 基本上一定唔夠, 我都唔敢裝軟件, 另外再買多張 8gb 咭呢!

  • man fai表示:

    龍師傅真係強人,會編寫玄學軟件。
    建議師傅寫''小傳'',晚年才寫自傳。
    大家都對師傅學習命理的經過很感興趣。
    我一直以為在年少時學習玄學,必定係出世於''玄學世家''。如我無記錯,伯父應該是當警察。
    睇來龍師傅接觸玄學的經過,應該很有緣吧?!
    [版主回覆03/17/2008 22:09:00]嘩阿輝, 你這麼好記性, 真不愧為記憶術專家呢!
    有時緣份這東西是很奇怪的, 一遇上, 就學了, 仿彿是天派下來的使命一樣!

  • Christina表示:

    我去台灣是見過, 的確好細部, 我都心郁郁想買返部
    [版主回覆03/18/2008 00:38:00]Wanwan, 如果你常出外, 咁就一定要買番部, 但一定要上到網, Wifi 又好 HSDPA 又好 GPRS 都好, 否則實用性不太大.
    同埋提你一樣野, 個 keyboard 真係超唔好打, 因為太細, 打D簡單野可以, 但同我開頭諗要在街外寫書攞靈感就很難了!
    又或者, 你講下你既用途, 等我同你分析下? 因為我果時都係諗左好奈呢!

  • Ben表示:

    哈哈~~當然啦…你重有埋 HSPDA…真係去到邊到上到網呀
    [版主回覆03/18/2008 23:21:00]係呀, 好方便的! 你凌晨五點都仲唔訓, 做貓頭鷹呀?

  • B表示:

    龍師傅好 pro ! Support !
    [版主回覆03/18/2008 23:20:00]好呀, 亞島, 多謝你既支持呀!

  • Ben表示:

    嘻嘻~~~五點幾係起身至啱….
    [版主回覆03/19/2008 20:40:00]哇,咁早要起身?

  • >