泰國四日三夜自遊行遊記 – 第一天(1)(龍嫂著)

12 7 月, 2008

決定去泰國只是我忽然很想很想去旅行,在六月頭先決定,想著可以在端午節的假期去的,但點知酒店,機票全部爆哂,唯有將行程推延十日,而且龍師傅真的很忙,没法抽空,這次是我硬拉他去的

其實我和他各自去泰國都有好幾次了,就是没有一起去過,今次終於有機會了。我地訂左 8:00 機,要早两個鐘去機場,所以晨咁早要起身,真係好眼訓啊。

 

到左機場,梗係第一時間 check in 先啦,費時拖住個喼周圍走。跟住就去左大家樂嘆個靚早餐,其實而家大家樂的食物質素都唔錯架喇,本來諗住一場黎到,試下其它餐廳的早餐,但真係太貴喇,我唔拾得食啊!

但其實如果唔係太餓的話,上到飛機都有飛機餐食,講唔到比你地聽好唔好食喇,因為我同龍師傅都食唔落喇。但睇個樣都唔差掛。

係飛機我就例牌訓唔著,所以一早帶定電腦睇台劇,最近狂追(命中注定我愛你)好好睇,睇到我係咁喊,又係咁笑,成個傻婆咁,成日比龍師傅笑。

去泰國機程真係快,睇完一集時間剛好,因台劇個半鐘一集,一落機就去左買電話咭,因為用漫遊好貴啊。但攪左半粒鐘都用唔到,好彩最後個靚女sales都幫我攪掂。

大家自遊行過泰國的話,你就會深深咁感受到,由你出機場的一刹那,就是給泰國人屈錢的開始,一出機場,你會見到個 counter 幫你叫的士,代價就是要比多五十銖,之前都聽朋友講,你比錢呢類服務好些,因為泰國屈遊客錢是層出不窮的,之後個幾日深深咁體會到喇。

上到車,都見到個牌寫明你去邊到要多幾錢咁,我想是費事 d 遊客比人屈左都唔知。但想深一層,的士佬都幾難揾食,如果佢唔屈你車費的話,起標 35 baht, 然後每跳一下只不過是 2 baht, 真係好平架。

建議你行高速,否則你有排都到唔到酒店,泰國的塞車情況,比香港厲害得多。由機場去到酒店,行高速都要半個鐘,連高速費用大約港幣一百蚊到。

順帶一提,如果你要唱泰幣的話,在機場唱少少好喇,我諗五百蚊港幣都夠了,因為機場對的滙率無咁好的,去到 d 大的 shopping mall 周圍都有得唱,滙率高好多,同一日,我係機場唱1:4.02, 出到去就 1:4.18,所以係機場唱錢會有支水送比你,但唔好以為真係送,其實你比個滙率已經包埋的。

終於去到酒店,本來諗住上房沖個涼先出去,但因為太早到,(我地十一點就到喇,因為泰國時間慢一個鐘,時間好似好好用咁)去到唔可以 check in 住,所以唯有即刻出發啦。

呢間酒店叫做 Pullman King Power, D 設施同大堂都幾靚,好有 Resort feel 架。

我地得一本旅遊書咋,因為臨時話要去,所以都無睇乜野書,剩係用之前換番黎的呢本,後來我地發覺基本野呢本書都比到你既,但有好多資料都唔夠詳細,同埋有 d 料係錯的。

放低哂d行履,我地都開始肚餓喇,係酒店叫左架的士去 Siam Square, 其實都是两個 BTS 站,初黎步到,唔知掟,坐的士去塞左二十分鐘車,車費大約 $15 啦。

因為我地已經好肚餓,龍傅唔餓得架,所以我地就求其入左間寫住 Noodle Shop 的小食店,見佢地方乾淨企理,就叫左個海鮮冬蔭公面,我個人唔係太鐘意食辣同冬蔭公個陣味,但我都覺得呢碗面好好味,d 料好新鮮,仲好多料潻。

唔知點解龍師傅會叫呢個沙律,佢平時係食肉獸黎架,忽然要食d咁清既野,龍 Sir 可唔可以解釋下咁呢,所以唔好成日都話女人心,海底針喇,男人心都好多時好難明的。

講番個沙律,無乜特別,有少少火鴨絲,我諗最特別的是個沙律汁,檸檬醬混出來的,酦酸地,都幾醒胃的。

再來一個中國式的小食拼盤,我好鐘意食香口野架,呢個啱哂我,估唔到泰國人整中國野食都唔錯,可能泰國太多中國人了,好多地方都可以食到中國菜的。

食左咁多野,加埋杯冰凍杧果汁,都唔駛六十蚊港紙,咁平,唔怪得之咁多人鐘意黎泰國啦!

食飽飽之後梗係去行街 shopping la……(待續)

​關於作者

龍震天課程

龍震天,玄學家,作家,擅長替客人分析感情問題,推算姻緣運,一生運程,同一時間也是課程講師;出版書籍超過三十本,題材包括心理學,身體語言,行為解碼學,男女感情技巧,男女感情個案分析,感情理論,潛意識,改思改運等等。


服務詳覽:

http://lungcourse.com/service

分享
Facebook LikeFacebookWhatsAppLineEmailSumoMe

四天戀愛溝通術


​原價 HKD2,680,現時 ​免費獲得!

「四天戀愛溝通術」免費獲得!


四天網上課程讓你了解男女關係如何用適當方法,包括誘導術,心理學,潛意識的控制,讓每個男人都為你做你想他做的事,說你想聽的話!

>

四天戀愛溝通術網上課程