（上回提要：去了 Siam MBK 商場的 Mont 食了加央多士同埋奶茶之後，馬上又要離開，因為要趕著去唐人街南星食翅）

真係不停食不停影龍師傅，而家睇番，其實食都佔左我地一個好大既比重！

第三晚的晚飯，我們去了唐人街的南星。因為第一日已經去左海外天，咁第三日自然就去另一間南星了。

泰國唐人街食翅有兩間最出名，分別係海外天同埋南星。香港人好多都識得南星，因為香港旺角馬健記隔離有間，而海外天則少Ｄ人識。

邊間好食Ｄ，且聽我細細道來……

的士去到，唐人街旺爆！

週街大排檔，一片混亂：

本來我都想趁混亂試下街邊大排檔，因為睇佢地食海鮮食得好好味，但剛巧又落雨，唯有維持原判，去左南星食翅：

叫翅，當然唔少得芽菜：

除左翅之外，我地都有叫東風螺，要成五百銖，真係把鬼：

螺又乾，又細隻，又無鮮味，醬汁又差，同鯉魚門有一大段距離，咁我在鯉魚門食都得啦，使乜去泰國食？嘥左我個 quota，真係唔抵。

牛肉炒河，濕炒既，雖然都好好味，但都同海外天既炒飯炒麵有一大段距離：

呢個炒通菜，海外天贏佢九條街，算啦，二百銖：

個翅明顯俾海外天比左落去，翅無味，少，唔夠香，味精多，形成一堆野咁，有相為證：

價錢去到千二銖一窩，唔太大，三碗左右。

我同龍嫂食完，後悔非常，因為第一日去既海外天太正了，而且係正隔離，我地腦海有閃過一絲念頭去番海外天，但本著出得黎玩，乜都試下既心態，最後都去左呢間，真係後悔，以後請都唔去呀！

環境一般，我覺得可以接受，但Ｄ野食，去到呢個價錢，我就唔會再去了，龍嫂都唔會再去，你呢？