今天和大家介紹和民居食屋。不過唔係香港，係深圳！

有人話，車，香港同深圳咪一樣？我可以話俾大家知，完全係兩回事。係香港，我勸你都係唔駛去，因為我去過兩次，一次係銅鑼灣恆隆中心，都算OK；另一次係銅鑼灣時代廣場，直頭想食到嘔（唔係形容詞，係 physically 想嘔！）

你諗下，叫個三文魚刺身，佢整到好似煙三文魚！我好難想像，係超級市場買過期既都好過佢！

然後我叫個服務員過黎，問佢係咪攪錯，D 三文魚好似煙過咁既？佢話：係呀！我地呢度Ｄ三文魚係咁嫁！吹脹！

自此以後，我沒有再去了，亦唔敢再去！

呢間位於深圳 Coco Park 既和民，就完全不相同了。格局優雅，環境舒適，服務員態度一流，今日仲比我睇到一幕好 impress！又令我想起乜野叫做專業！一陣至同你地講！

深圳 Coco Park，係一個好大既商場，基本上你唔駛知道點去，只需要在深圳上的士，然後話去 Coco Park，司機就會知道點去了，中文都唔駛講！

如果司機唔知道，你應該馬上極速落車，因為可能佢唔係的士司機，又或者冒充係的士司機！

車程不遠，二十蚊都有找。

今日去到，個門口都好特別下：

有乜特別？因為佢係七喜做 promote。行近 D 睇睇，個背景係用汽水罐做既，夠唔夠特別？

呢個商場都好大下，名店都多，不過都唔駛浪費時間睇了。大陸名店，我真係唔識欣賞，八百幾蚊一件大陸拼音牌子既 T-shirt，所以我都好少行。

樓下有間 Tutor 專門店，但價錢都好貴下，如果有勞力士就更佳，不過佢無：

入到去，由於時間尚早，所以很快有位，服務員安排了我們坐在角落，很是舒服，又靜，又無人，最合食飯傾計：

又可以望到街景：

到我和龍嫂吃完晚飯時，已經是天黑了，又影一張相給大家對照一下：

餐牌甚是精美，佢有特別介紹：

我地決定叫一個星鰻壽司試一下。

佢地既餐牌好多款式，熱食既，乜都有，日式湯麵，飯，意粉，Pizza 都有：

串燒選擇都好多，我介紹大家食個鐵板牛油帶子，好香，好好味！

我們叫了和民沙律半份，如果人多，可以叫一份。味道唔錯，如果有薯仔，蛋會更好！

原隻魷魚。質素同香港差唔多，但四十八蚊變二十八，真係好抵食呀！

海鮮焗飯，唔好以為佢好大碗，一人一碗都得，好似泉張居既白飯 size 咁，超細，但超好味，二十八蚊都算係咁了！

接著而來的就是星鰻壽司，三十三蚊，星鰻長到拖地：

鏡頭影唔到，成呎咁長呀！不過大家都係唔駛叫呢個了，口感及味道只是一般而已。

另有一個海老帶子卷，做得好好味，清香又唔肥，點沙律醬食，一流！

最後我當然叫咖啡，味道還可以；龍嫂則叫了曲奇奶昔，二十八蚊，以大陸來說比較貴，但龍嫂每次來都叫自有她的原因，因為太好味了！

整頓飯吃得甚為滿意，埋單也只是二百多元而已！

最後一提，他們做的壽司很不錯，魚生也很新鮮，不過這次我們得兩個人，就沒有叫那麼多了。

文首說過這裏的服務生很專業，我覺得很值得加以表揚。有禮貌，跟單落足心機不在話下（這裏肯定有著酒店級的 training，香港的和民就肯定沒有了），到最後，我們看到有一對夫婦，大概是自由行中的自由行吧，他們老遠的從北方來到深圳：

他們剛坐下，服務員問他們：要茶定要水？

佢地問駛唔駛錢，服務員話唔駛錢，佢地先要。

然後佢地點菜，叫個服務員埋黎，話：我地要兩餸一湯，炒個菜，兩碗白飯，唔該！

我都好有興趣睇個服務員點回應。

佢不單只介紹他們吃甚麼菜，還要說明白飯要五蚊碗，因為怕他們不知道；點菜後還多謝前多謝後，令到呢對夫婦好滿意！真係抵讚，呢 D 就真係叫做專業！

吃飽後，還看到商場有 illy 咖啡，看名稱應該是特許經營的，就像香港的 Oliver's 一樣吧！

不知這裏做的咖啡怎麼樣，香港的就不敢恭維了，可能始終和意大利相距較遠吧。猶記得數年前客人介紹我去尖沙咀彩星大廈那裏喝 illy 咖啡，那時 illy 剛登陸香港，慕名而去，花了二十七元飲一杯 Espresso。結果不外如是，我沖得還比它好呢。現在那裏已經結業了，改為由 Oliver's 特許經營，味道也只是差不多。

如果你下次有機會去深圳玩樂的話，不妨到這間和民試一下，包你有意想不到的驚喜！

深圳和民居食屋
地址：深圳 Coco Park 商場
必食推介：海鮮焗飯，原隻燒尤魚
平均消費：每人一百二十元
分數：＊　＊　＊　＊

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去