上環蘇杭街一帶都開左好多食店，但一路做得住又維持得到既真係廖廖可數，個問題係每間舖都以為自己好有特色，誰不知最重要既元素，食物質素亂哂籠，咁個個客都係去過一次唔會再去，好快就結業咯。

好似呢間，叫做碰麵。其實我都唔知佢想賣乜。似間西餐廳，但又整韓式飯，又整車仔麵。

人最緊要係專業，時間有限，總無一個人可以識哂所有野，例如我強項係玄學，寫書，咁我去織件衫俾你你都唔敢著啦！

呢間碰麵，車仔麵又得，西餐又得，早餐又有三文治，西多士，再加韓燒，唔通有十個師傅咩？咪又係得一個，咁一個師傅又點可能做得到咁多野都好食呢？

環境唔錯，我建議如果你行過，飲下咖啡坐一兩個鐘都無問題，因為呢度既即磨咖啡做得幾好：

大牆個鐘都好有特色：

我叫左雞翼蛋公仔麵，又係果句，其實整個公仔麵有幾難？就係咁難，一百間有九十九間都做得差。

如果唔識整，買包出前一丁，睇下個包裝背面，照足佢做，一定得，我自己都係咁整，係最好既配方。

真係唔明，一日整個一百個麵，日日整，都整得咁差，呢Ｄ咪係有無心既問題咯。

多士都算可以：

我就叫左個茶餐，乜都有，你留意下條腸，咁既腸邊度俾得人嫁？

燶哂，稍有良心既廚師都唔會俾人啦。

咖啡則對板，但要係即磨果隻，如果你叫普通蒸溜既就包唔好飲。

碰麵

地址: 上環蘇杭街 104 號

電話: 2535 9979

必食推介: 即磨咖啡

平均消費: 午餐 35 元，加即磨咖啡另加 8 元

食物質素：　　　
環境質素：　　　
服務質素：　　　
物值　　：　   　

總評　　：　　　兩個太極，免費才去

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去