前兩天晚上，行經銅鑼灣，和龍嫂商量著到那裏吃飯。無意中去到這間位於禮頓廣場地下的鈴木咖啡館：

那天天氣寒冷，服務員在我們一進來之後，馬上奉上兩杯窩心熱水，龍嫂話一定要提一提，讚一讚佢地！

佢地食既野係日本既西餐，即係日式既豬牛雞。他們有晚餐供應，一看餐牌，林林種種，好多野食呀！

晚餐我們選了第一個，雞肉咖喱奄列配茄汁糙米飯，然後再叫多一個意粉。我地揀左個有半生熟蛋既意粉，即係最上面果個：

先講晚餐，都算抵食了，有沙律，主菜及甜品，咖啡另外加錢。

沙律來了，是蛋沙律來的：

造得異常精緻。蛋好味到暈，點解人地可以整到咁好味呢？

然後到主菜：

我睇落已經覺得好好味，於是照份量減Ｄ落個碗到，再睇下：

一食落口，不得了，好感動，僅次於東京既松屋。汁醬有味，飯又軟熟，一流中既一流！

再來就是生熟蛋意粉，又係一流，不過，如果比對起晚餐既話，七十二蚊好似貴左少少，但都ＯＫ同好好食既：

將個生熟蛋攪勻，又係極致之選！

以我咁鐘意飲咖啡既人，一定要試佢地既咖啡啦！又係一流：

呢杯咖啡如果跟晚餐，只係加多十八元咋！沖調得好好飲！

無意之中係個咖啡杯底睇到有行字：

Quality without compromise！真係同我一樣，一係唔做，要做就點都做得到，一絲不苟，一定要將最好既做俾人地！

最後奉上甜品！

粟子蛋糕，龍嫂話麻麻地喎，咬左一啖，再影，俾大家睇下入面係乜野黎既：

食食下，見到有隻鹿係度：

都好有氣氛下！

食完之後，欲罷不能，因為太好味了，所以又想再食多樣，但已很飽，於是睇下有乜小食：

最後叫多個炸八爪魚。佢地既出品都好 detail 下，你睇佢吸油果張紙，好特別，係印左報紙花紋既紙：

我好欣賞佢既醬汁。係 wasabi 黎既，但又唔算太棘，薯條都好好味！

諗住埋單走了，意猶未盡，又想試下佢既凍咖啡；叫左杯 Iced Latte，好好飲，我睇到師傅係即刻沖俾我飲既，佢好有心機，整得好好飲！

已經好飽，又睇到佢地有五穀米飯漢堡，我係 MOS 見過，不過我就未食過，都係下次先了。

銅鑼灣呢間分店絕對ＯＫ，質素一流，服務一流，服務員好細心，好有禮貌，最好係佢地播日本歌，令我覺得暫時係日本，氣氛好好！唯一嫌佢無暖氣，大街大巷，都幾凍嫁！不過後來食左野就ＯＫ了。

最後一提，我去過之後，問佢地拎左咭片，先發覺我寫字樓附近維德廣場又有分店，於是過兩日我又再去幫襯了，野食一樣，但招呼係九流中既九流，完全唔專業，同銅鑼灣既分店係兩回事，所以下次都係幫襯銅鑼灣果間好Ｄ！

鈴木咖啡館
地址：銅鑼灣禮頓廣場地下2號舖
必食推介：雞肉咖喱奄列配茄汁糙米飯，Latte
平均消費：每人一百五十元
分數：＊　＊　＊　＊

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去