睇左龍師傅寫多咁多篇食經,我今日都想寫一下,因為呢個美麗華自助餐真係太好味了!
尋日講果 D 牡丹蝦係咪睇到都好想食呢,跟住 Chef Eddy 仲話可以幫我地將 D 蝦頭拎去做天婦羅,哇!開心死啦,你地睇,炸得幾靚!其實我自己唔係咁鍾意食炸野,但呢個天婦羅好好味,香口得黎仲唔油膩。

以前去食 buffet,好少食salad, 因為通常都係一堆什草咁放係你面前,D 沙律醬比人攪到周圍都係,睇見都唔開胃,但呢度就唔同喇,有幾款配料,排得好整齊,最 impress 就係 ……….

呢度係幫你撈埋個沙律即上架,絕對乾淨,唔會攪到一塌胡塗,見食左咁多野,於是剩左個清清地的沙律,好鍾意 d 麵包粒,夾埋 d 生菜,好好味架!

大家知唔知呢個係乜呢?食落去感覺滑0者0者,Chef Eddy 叫我地一定要試下喎,原來係魚既春子,唔怪得之咁滑滑啦!龍師傅睇到都怕怕了,我則無有怕,其實又幾好味喎!

頭盤、冷盤都差唔多喇,係上主菜既時間喇,主菜有四個,我地四個人,一人叫一個,其實分量唔太大,我地四個都覺得剛好,因為一個正常人唔會食得晒所有野啦。
第一個係蟹腳天婦羅,同個蝦頭一樣,甘香鬆脆!

再黎就是燒銀鱈魚,你睇佢幾精致,非常鮮味!份量好聰明地係好少,唔係真係食唔哂呢!

黎左兩個淡味主菜的,要黎 d 濃味既,正所謂梗有一款啱你的,呢個燒羊架,細細件,d 肉好嫩,我怕羊的羶味,但呢個絕對唔羶架!龍師傅食到點哂頭,猛話好野!大家放心,如果連龍師傅都唔怕,咁呢個羊架絕對唔羶,因為有少少味佢都唔食嫁!

跟住落黎,介紹 d 正野,大家一定以為呢幾件係牛扒喇,係就係牛,但點會咁 cheap 比幾件牛扒你呢,呢幾塊係牛的面珠登黎架,我咁大個都未食過牛的面珠登架,一食落去,淋到呢……好難形容比你聽,總知都係一個字,正!
其實真係食得幾招積的,牛面豬登,講出黎俾朋友聽都更加 presentable 啦!

四個主菜出晒場喇,你地話喇,五百幾蚊係咪物超所值呢,仲未夠的話,係熱葷個度仲有東星班腩呀,平時你要幾錢先食到呀,幾舊水一條都係斤令重,而家係任食架,你睇幾靚!仲要加埋個金華火腿,真係無敵!

我地其實都已經好飽了,甜品都已經食埋,點知 Chef Eddy 同我地講,問我地有無食魚,佢話係東星;都未講完,已經唔見左龍師傅,佢已經即刻出去拎了,龍師傅好鬼克人憎,唔係貴魚佢唔食,養班唔食,因為佢好怕腥;但呢味東星佢竟然食哂,咁你話有幾好味喇!
(待續)
尖沙咀美麗華酒店 Yamm
必食推介:晚餐 buffet
平均消費:五百五十元左右連加一(一至五有特價)
分數:* * * * * *(一生必去)