第一手資料 – 美麗華酒店 Buffet Yamm – 一個緣份的約會之一 – 開始篇

28 2 月, 2008

我本來每天都排好 blog 準時下畫四點零八分出街的(16:08,一路發),已經排到三月中,但係呢餐真係太開心了,所以要搶閘優先報導。

點解咁開心?睇落去就知道了。

*************************************************************

上個星期四晚上十一時三十七分,電話響起。

"喂,龍師傅呀?我係 Eddy 呀!"

Ritz Carlton 的 Chef Eddy?自從上個月尾最後一天在 Ritz Carlton 吃了一個令人畢生難忘的半自助晚餐之後,和 Chef Eddy 已經建立了很好的友誼,他為人爽朗,健談,反應快;最重要的,是大家的理念相同,大家都同樣相信 "思想改變命運",所以一直很談得來。

"我想約你下個星期一晚上,得唔得閒?" Chef Eddy 問道。

"乜事呀?出黎食飯?" 我也不知道他約我甚麼事。

"總之你出黎啦,你得唔得閒?" Chef Eddy 繼續道。

我心諗,我其實下個星期晚晚都唔得閒喎!年頭年尾梗係忙D啦!

"等我睇下先," 我道,於是連忙拿起記事簿,那天晚上有兩個客人,幸好我有他們的電話,就試著打給他們約早點吧。

"得閒,乜事呀?" 當下馬上做出決定,扮得閒,做人要決斷呀!

"我想約你同龍嫂下個禮拜黎美麗華酒店試菜呀!" Chef Eddy 道。

試菜?客人或朋友請我食飯就試得多,不過試菜真係未試過喎,幾大都要試下!

"好呀!" 我道。

"OK,我預留一張檯給你,還有龍嫂,王子,王妃。"

"吓??" 簡直喜出望外,非常滿意的掛了線。這個約會太特別了!

王子和王妃也是在網上相識的好友,大家互相在對方的 blog 裏認識已經有一段時間,見面還是第一次,心中只感覺很興奮,也很期待。

在凌晨一時多,在王子的的網誌裏留言,著大家互相聯絡,想不到王子已經在十二時多已經在我的網誌裏留言;就在此時,電話響了。

和王子談了一會,也確認了 Chef Eddy 原來早已聯絡了他,只不過我晚上在工作,所以聽不到電話而已。

就這樣,一個試菜飯局,將 Chef Eddy,王子,王妃,龍嫂,我連在一起;想不到那次到 Ritz Carlton 酒店卜不到位,寫了一篇 Ritz Carlton 怎樣用八分鐘的時間令我感覺他們專業的 blog,而讓 Chef Eddy 認識我,再因為機緣巧合之下,於 Ritz Carlton 結業的最後一天去享用他們最專業的服務。

更神奇的,是因為我寫的那一篇網誌,令我今天可以再和 Chef Eddy 見面,又可以見到王子和王妃,是緣份將我們連在一起呢!

這個試菜在晚上舉行,七時開始,我準時七點正來到赴會。

美麗華現時走年青人路線,全家酒店再裝修過,令人有煥然一新的感覺。

我到了之後,Chef Eddy 親自來到門口迎接我。因為我入唔到去呀,因為他們還未正式開張。

到步後,發覺王子和王妃已經到了。介紹了之後,就開始出去到處看,看看有甚麼新的食物了!

回到自己的座位裏,看見麵包已經上桌,排得好靚呀!

我地都無乜機會食,因為已經出左去拎食物了,食物太多,不能盡錄,你見我要分幾篇就知道有幾多野食啦,我果晚一個人食左三餐既份量!即係如果我日頭食呢餐既話,我果日都唔駛食野了,很滿足呢!

新鮮既果汁,乜都有,呢杯係西瓜汁:

生蠔吧,非常專業,全部都係即叫即開:

再來一個近鏡:

只見師傅熟練地用開蠔刀,用力地切開,佢真係好用力:

開左喇,好新鮮;我其實果晚都幾肚餓,好想即刻食番兩隻先:

我問師傅:你開得好用力喎!

師傅好感概咁話:如果你見到開蠔師傅唔駛用力開既蠔,你唔駛食啦,咁即係唔新鮮嫁!

好!又學到東西了!我想生蠔即叫即開都無乜邊幾間!

魚生檯,品種多到你唔信:

真係多到,直頭去左日本刺身店一樣,好少有酒店肯咁落本有咁多刺身的,佢唔只多,仲好好味。

佢地特登在日本請左個刺身師傅黎香港獻技,真係好專業,聽日我會同你地講,佢地既壽司有幾專業!

我最愛既巴力三文魚,原條:

相信呢味你都無乜機會去第二間酒店可以食到了,因為佢好貴,而且極少有:

長蟹腳……我想同自己許個願,如果餐餐都有蟹腳食就好了,超甜,超新鮮!

我想 highlight 既係長蟹腳有D酒店都有,但係驚死你食得多咯,未開殼就俾你咯,但係呢度唔係咁咯,呢度係驚你唔食咯,好似細路你咁開哂殼俾你咯!

我諗龍嫂都未必長期做得到;有次去日本,買左隻長腳蟹番香港,我坐係度等食,龍嫂就係度開殼,開左半個鐘頭,後來我都食左隻蟹八成,開殼既龍嫂就食得兩成。龍嫂話:"我以後去日本都唔會買長腳蟹番香港了,都搵我笨既!"

其實我都好想開嫁,但係開得好慢!

呢D真係心機錢黎嫁!

龍蝦仔,又係驚死你唔食咁,開哂邊俾你,王子係度諗緊點解佢可以開得咁齊邊:

翡翠螺任食,青口任食,真係好爽甜!

要特別一提既係魚生同壽司你可以埋去刺身 bar order,然後佢地會記低你係幾號檯,一陣間就會有服務員拎過黎俾你,唔駛等嫁,真係好細心!

呢個壽司拼盤,排得好整齊,有日本師傅坐陣確係唔同,而且睇落都好好味:

介紹左咁奈,都未起筷,因為不停咁拎野食,不停咁有野到,大家都只係掛住影!

都影得差唔多喇卦?要起筷了!

(待續,第二輯頭盤篇明天準時晚上十一時正出發)

尖沙咀美麗華酒店 Yamm
必食推介:晚餐 buffet
平均消費:五百五十元左右連加一(一至五有特價)
分數:* * * * * *(一生必去)

(分數指南:以六粒星最好,無星最差。)


無星:一生不去
一粒星:被迫才去
兩粒星:免費才去
三粒星:可以一去
四粒星:一定要去
五粒星:特登都去
六粒星:一生必去

​關於作者

龍震天課程

龍震天,玄學家,作家,擅長替客人分析感情問題,推算姻緣運,一生運程,同一時間也是課程講師;出版書籍超過三十本,題材包括心理學,身體語言,行為解碼學,男女感情技巧,男女感情個案分析,感情理論,潛意識,改思改運等等。


服務詳覽:

http://lungcourse.com/service

分享
Facebook LikeFacebookWhatsAppLineEmailSumoMe

四天戀愛溝通術


​原價 HKD2,680,現時 ​免費獲得!

「四天戀愛溝通術」免費獲得!


四天網上課程讓你了解男女關係如何用適當方法,包括誘導術,心理學,潛意識的控制,讓每個男人都為你做你想他做的事,說你想聽的話!

>

想知道 { 桃花萬人迷 } 的共同秘密嗎?