HeHe, 又係龍嫂我呀，一時手痕霸左龍師傅個 blog 寫兩篇。

講到食甜品，當然由最鐘意食甜品既我 – 龍嫂黎介紹啦，上次食完 Ritz Calton 的甜品，真係好懷念，一去到見到，哇！開心死，今次仲比上次的多好多款添，而家所見到的呢 d 相係未開始食 buffet 之前影的，影個陣已經好想食，我一路睇，一路影個陣就不停咁話一陣要食呢個，要食o個個，但係因為個 buffet 太多正野食喇，所以有 d  都無食到。唯有下次再去食啦！

先黎睇下個甜品架，哇，唔係講笑，呢度只係一部份黎咋。仲有好多大 cake 架，睇落去就知喇！

什果 cake，呢張相係大家都未開始食甜品個時影既，一見到呢個什果 cake，即刻林海峰上身，「唔駛講野啦！」個樣靚到………生果多到………唔駛食，見到都開心啦！

我就先黎杯楊枝金露先，不太甜，淡淡的柚子及芒果味，配合得剛好，用隻咁高貴既杯黎裝，即刻唔同晒 feel。

咦！咁熟口面既，金箔朱古力杯，好懷念啊，念舊既我，梗係整番杯啦，面頭的朱古力依然香濃，配合中層的蛋糕，底層的咖啡，好味到震呀！

呢款我就無試過，因為真係試唔晒咁多，但齋睇賣相已經好得啦！

別出心裁既綠茶蛋糕，點忍得口？

呢款又係無試過，下次去要補番數啦，hehe…..

Yamm 的朱古力係有一手既！

而家睇番 d 相，先發覺好多野都未試過喎，攪到我有 d 失落添，而家好想再食呀！

朱古力 mousse，配合帶有酸味的士多啤梨，Fit 到爆！

呢款王子第一 round 就要食，可想而知，呢個金箔茘枝果凍幾咁魅力非凡啦！

講到甜品，雪糕點少得，香滑手打雪糕，裡面仲有好多好多朱古力粒，熱愛朱古力既我，開心到呢……..連不太愛甜品的龍師傅，到最後都要我幫佢拎一球返黎呀，甜品篇中必食推介。

輪到生果喇，點會剩係得西瓜、哈蜜瓜咁 cheap，你睇！車厘子都有，仲要係大大粒任食，咁橋我未食呢餐之前去街市生果檔買返公司食，都要 $38一磅，你話呢餐幾抵呢！

食到呢度都差唔多尾聲喇，忽然醒起仲有 coffee or tea，因為太夜我無飲到，怕飲完訓唔著，但熱愛咖啡的龍師傅當然無論幾夜都好，對佢完全無影響，仲飲埋我個份添，要左個 Cappaccino 及 Espresso，佢地用 illy 咖啡豆，龍師傅覺得味道雖然淡了一點，(因他平時不太喜歡 illy 的咖啡豆)，但由于是試業期間，有這樣的質素都算不錯的了。

這杯 Cappaccino 的賣相不錯的啊！

小小的 Espresso ，略嫌味道淡了一點。

總括黎講，呢餐論質素、環境，絕對滿分，仲要 Chef Eddy 請，其實都幾感動，難得佢又記得我地咁有心，其實我地同王子都無食到日式燒烤，因為大家真係食唔落，所以下次一定要補番數呀！