很多網友都想我講不同方面既題材，有人想睇食，有人想睇旅行，有人想睇我既懷舊收藏，有人想睇我既思想改變運氣文章，有人想睇風水文章，有人想睇紫微斗數文章，最近還有人想我寫書評，真係寫得邊樣？

咁好啦，盡量各方面都寫下，只要有資料在手我就寫，像以下這篇，是最近去過西營盤，無意之中發覺而影下來的。

今日要介紹一個非常無得做既商場，西營盤 MRT：

呢個商場舊到唔舊，在廿年前 MRT 商場可謂呼風喚雨，一時無兩。如大家有留意，葵涌廣場就有一間，佢既聰明之處係買左一個大地方，然後拆細分租出去。

而葵涌廣場而家都仲有係度，西環呢間都係度，不過人流就差天共地了：

一來非常舊，又無翻新；二來呢個位好死，雖則大單邊，但兩邊都無人流，附近亦無野行，只係見到路過既人急急回家，或急急返工，或急急搭車，總之係唔會停留：

做細路仔生意勉強有得做，不過都係要對街果排舖位，如在樓上，真係免費都無得做。

以下這間，向正電車路，模型舖，下畫先開，我覺得都係得個捱字：

樓上十室九空：

連租務處都長期無人，個舖頭都不似舖形；我又即刻解到碼，即係好奈都無人租過咯：

這個商場一共有三層，第三層以前係一間餐廳，後來結業，長期都租唔出；鬼咩，我係度諗，免費俾佐敦牛奶公司做，去到呢Ｄ咁既死位都要執笠啦：

上到一樓，全部吉哂，一定唔會有人行，如租呢度，放心，包唔會有人流：

而家都只係樓下果排有人租，做既行業係補衫，賣教科書，賣模型：

可能你睇到會問：西營盤個商場關我鬼事咩？係，表面上係唔關係事，亦唔關我事，但我想帶出一個道理，就係平日多留意身邊既野，同埋識得問下自己點解會咁樣；你會發覺，個腦會靈活好多；望得多了，自己長了知識，將來一有機會，即刻 recall，一定會有用。

順帶一提，西環 MRT 商場對面有間樂嚐軒，有好多網友話幾好食，我就未試過了。