今天看了赤壁，等了很久，終於看到它上畫！

趁著下午有少少空檔，立即竄去銅鑼灣買飛，因為知道超級爆場！

果然，先去 JP 銅鑼灣，下畫去買即日七點半都要坐第二行中間，一係坐第五行最側邊，馬上 plan B，時代廣場同總統都有得做。

去到總統，都有飛，坐戲院正中間位置，七點三，兩個半鐘，六十蚊一個，好抵睇呀！

奉勸各位，如果去睇，記得做以下三樣事情：

1. 一人買一枝水，因為時間超長，兩個人一枝水一定唔夠飲。
2. 帶多件衫，入到去戲院冷氣勁凍，人既生理係無論熱天都好，坐得一個鐘頭即刻變冷血動物；我覺得我體內既血在一個鐘頭之後已經下降至十七度。
3. 開場前一定要去洗手間，唔係半路中途去真係好麻煩。

赤壁，大製作，Class 勁，我覺得最難既，係點樣將一Ｄ已知道既歷史拍得好，因為大家都知道結果；而今天看後的感覺，是吳宇森導演沒有令我們失望！

又教大家一個小秘技，本來我係想尋日，即係上映既第一日去睇既，但龍嫂一直奉行 "要睇戲一定要睇 yahoo 影評" 既做法，一定要有多人俾五粒星先去睇。

因為 yahoo 影評勁多，網友質素夠平均，例如呢套，尋日已經有百幾個影評，而平均都有四星，仲要係有人玩野俾一粒星拉低哂Ｄ分，我同龍嫂都好放心去睇！

呢套戲，我睇完好感動，亦提議大家到戲院睇，因為音效，場景，氣勢，全部都係在戲院先至有咁好既效果！

我覺得套戲完全展現了當年赤壁之戰的感覺。曹操的八十萬大軍，對只得八萬大軍的劉備，周喻和諸葛亮，怎樣用計謀，戰略去戰勝對方，令我體會到一個人生道理：就是做人不是靠力，而是靠腦。

套合在現代社會，更確。如要勤力，搵隻牛好過；如大力，只能做咕喱；做人一定要用腦，由於我一早已明白此點，所以我好少用力，那些擔擔抬抬的，我一定會搵搬運或工人，因為不是我的專長；我只會用腦，我成日都會思考，怎樣將事情做得好，和找誰人來做。

套戲我最欣賞的，有以下的場景：

第一幕：諸葛亮看到周喻練兵，擺了 "雁行陣"。諸葛亮對周喻道："這個陣法不錯，不過已經過時了。" 周喻問他有甚麼陣可擺，諸葛亮道："我有一個更過時的，叫八卦陣。"

及後看到八卦陣，真是大開眼界；至於怎樣精采，就留待你們到戲院感受一下了。

第二幕，是在尾段時，諸葛亮放了一隻鴿子，這隻鴿子一路飛，飛到敵人陣地，在這一分鐘裏，吳宇森導演利用這隻鴿子所飛過的地方，交待曹操的八十萬大軍是何等實力雄厚，精采！筆墨難以形容萬一！

第三幕，是在最後時，帶出火燒連環船的情景，從而慢慢淡出。係，是淡出，就完了。

原來套戲未完，還有續集！

在散場時，聽到有觀眾馬上打電話給友人，說這套戲是如何好看，但最不滿意的，就是原來套戲未完。

本來兩個半鐘頭是長時間，但我和龍嫂看完之後，大家都同意，如果馬上留低有續集看的話，我們會毫不猶疑留低，再消磨多兩個半鐘！

你可想而知有幾好睇。

火燒連環船令我最感動的，是因為吳宇森導演利用這一幕精采的場景完場，令觀眾不肯離去及茫然之餘，亦令我想到火燎森，火兄的網誌。

他說過，改這個名的原因，是因為 "星星之火，可以燎原"。我完全同意，亦覺得好感動。

因為在我的一生當中，已經試過數次，在開頭一些不著邊際的事情上，我做得特別用心；到後來，竟然真的像火燒連環船一樣，全部事情都聚在一起，發生了一連串的好運氣。

所以我常記著火兄的名字，每次看到火燒連環船也會很感動。

有空不妨一看，沒空也要找機會看，由吳宇森導演，梁朝偉及金城武主演的 "赤壁"。

赤壁 Trailer