網友大少拉在家中發生了一些事，涉及她的大兒子細兒子的一段對話，她聽了覺得很感動，就急不及待的告訴我，叫我馬上看她的網誌。我看後也覺得很感動，所以很想分享一下：
大少拉的分享
尋晚晚飯. 終於知道.. 我真係比起好多人黎得幸福.. 一來我有大老爺既愛錫. 二係我同哥哥同細佬一段對話.
尋晚晚飯前. 我同細佬睇返上年成績表. 對照今次既成績, 我同細佬講, 如果你努力讀書. 第日就唔使做苦力啦.. 哥哥沖完涼~睇到我同細佬睇返以前既成績表. 佢話媽媽我都想睇返以前d成績表呀,.我話~ 好~~ 我地一齊睇啦..
就係咁.我地3個就響我房一齊睇返哂所有成績表.之後我就同埋哥哥講. 其實今次我有d失望. 明明你地係得既,點解唔好好咁溫…
之後哥哥同我講, 我上年咁好成績~ 係因為我每日都拎出半個鐘用心溫習. 上個學期, 我唔太識, 所以開始無咩心機溫喇… 我話..唔識點解唔同我講….你同我講, 我會比你去補習架.. 哥哥話.. 我知屋企既環境..真係唔想你地要諗多份錢出黎..我即時心中想喊… 我話, 祗要你想…我同爸爸點都會比你去補習. 點辛苦都比.. 細佬都係… 點辛苦我地都會比你地去補習.. 我仲話.. 不如我同你去 xx 果間補. 我睇廣告佢地話, 一定會攞到a喎…. 哥哥即是話. 我唔去..呢間咁貴. 仲有就係…佢地根本唔係幫你補, 係比d題你. 叫你死溫. 中得題多, d人咪攞到a囉… 我唔想自欺欺人, 我成績好都係想自己努力得黎. 唔得..就怪自己唔努力……
點解…點解哥哥咁識諗. 仲有第一次佢肯同我講呢d說話. 原來佢自己有自己諗法. 但我最開心既係…哥哥話.. 媽媽,不如我去學校補習..學校有開補習班喇.. 價錢又唔太貴..我緊係話好啦..講真, 由佢 f.2 開始. 佢已經唔去學校補習班, 我話不如出去補, 佢次次都話唔去… 如果佢今次唔講. 我真係覺得佢係懶,唔想去補習…原來唔係… 係佢知屋企既環境…
至於細佬. 佢話我今次唔去補喇. 我問隔離位既同學就得架喇, 我會上堂留心聽書架. 我問細佬做咩唔去補呀?? 佢話等哥哥補丫. 我都去左補習班咁多次. 今次哥哥去啦.. 我話..你唔使擔心喎!! 爸爸媽媽都有錢比你地去學校補習班. 佢話唔好啦~ 我想今個學期抖下…抖下即係點解呢?? 我問細佬, 細佬祗傻笑….不過哥哥話. 如果細佬唔識. 佢要教細佬..
但我同佢地講.. 就算屋企環境點. 如果你地真係想補習,.就算媽媽出去做埋野, 我都唔會覺辛苦. 我同爸爸都會以你地為中心.
尋晚一整晚都好開心. 開心係佢地咁同我講, 我當佢地呃住我,氹住我都好, 起碼佢地在意我個心係點諗. 佢地先會咁同我講.
哥哥細佬仲同我講. 話我呢兩年變左.. 變左??? 佢地話係. 比起以前~咩都鬧左先. 但依家會比機會佢地解釋. 會靜心咁解釋返比佢地知. 佢地仲問我點解會咁.. 我諗. 因為我愛錫佢地..我唔可再動不動就鬧佢地.. 起碼我要知佢地點諗我先會幫到佢地.. 鬧….我自覺已經唔係一個好方法~ 聆聽先係上上辦法.! 我思想改變左….運都好似好起來.
最後我想講.哥哥細佬.. 你地咁乖.. 我真係唔知點讚你地…. 你地每一句說話, 都令我同爸爸心感安慰!
龍師傅的回應
大少拉, 替你開心, 正如你所說, 係開心過中頭奬!
第一, 大佬並不是你迫他, 而是他自己說, 這種說話最值錢! 這代表他已經生性, 將來無論他的成就如何都好, 他已經是一個懂得為家設想的人, 這樣的人, 就是好人; 我常說, 做人要公道, 他有顧及爸爸媽媽的感受, 而且是未出來社會做事已懂得人情世故, 爸爸媽媽辛苦, 我覺得, 他已經成功了!
第二, 細佬懂得為大佬設想, 說這一次機會留給大佬, 我好想說, 細佬也已經生性, 而且我可以解碼為兩兄弟感情極好, 打死不離親兄弟, 1+1=3, 將來出到社會做事, 一定會互相扶持, 運勢也可以推高.
第三, 身為媽媽爸爸的你們也會開心, 做事也會起勁, 心情也會好, 正是辛苦也是值得的, 金錢真的買不到!
哥哥細佬, 你們已長大了, 不用媽媽再操心, 你們都是傻仔來的, 我好肯定, 如你們生性, 你們爸爸媽媽再辛苦也願意!
龍師傅 addition blog
現時後生仔女濕柴太多（註：濕柴者，係廢過廢柴，廢柴都可以放入火爐燒，濕柴係放入火爐都燒唔著），入屋或同檯食飯不叫人的多不勝數，食飯時只是自己狂打機也是多不勝數，有幾多後生仔女，好像大少拉的兩個兒子那樣生性呢？我看很少。
眼望不到人，盲；耳聽不到身邊人說話，聾；人不叫，啞；飯又不吃，要父母不停催促，代夾餸，斷手；雙腳不動，一味坐在座位上打機，斷腳。
四肢殘廢斷手斷腳又盲又聾又啞腦閉塞的孩子，其實是很難形成的；有這樣的父母，才會成就這樣的子女，一切皆有因果報應，如果將來子女長大後不認得自己呼呼喝喝不孝順，我好想說，這是抵死，是這些父母長年累月一手一腳做成的，與人無尤。
人又不叫，吃飯玩樂父母付錢，自己打機，正是公又你贏，字又你贏，和又你贏，我真係好想一腳伸過對面。
當然，gene 很重要，但家庭教育也很重要的，我常說，有怎樣的父母，就有怎樣的子女。父母也不教他們叫人，兒子女兒當然就不叫了；每次我看到這些小孩子，我都會很火滾，一個只得幾歲的小朋友，眼睛好像生了在額頭似的，一見人，叫也不叫，大安旨意，當整班長輩是透明。
不過我當然不會明言，心知這些人垃圾不如，長大後有排都不會有運行。有運行和叫人有甚麼關係？可能你會這樣想，我好想說，就是這樣簡單；人也不叫，沒有尊重，身邊發生甚麼事也不知道，一坐低就打機，同檯食飯衰過搭檯，父母縱容，也不關他們事，因為從來沒有人教他，見到也只是父母代叫，例如："叫人啦，叫叔叔啦"，而當事人好像是吃了啞藥一樣，父母也不會再理會，就坐下吃飯或入屋；算吧啦，唔識教就不如唔好生，如叫人也不教，就是沒有家教，沒有家教的人，一是流泯，二是乞兒，一定是低下層的人；注定一生人緣運差，父母還要在整頓飯之中不停的說自己的仔女怎樣可愛聽教聽話得意，我聽後只覺得想嘔。
今天和無見廿年的朋友吃飯，人面依舊，但多了三個小豆釘。三個家長一見面，馬上叫自己的兒子女兒叫人，還要是逐個叫，叫的時候還要叫他們望著長輩；我很有得著，改運，就要從小事開始，從少有這樣的家教，才會成就不黑心的公道人。
如你現時已為人父母，你想一想和朋友見面時，你是怎樣叫你的子女叫人的，好好想一下，下次留意一下，不但幫你自己有面子，還可以幫你的子女增強運氣及將性格轉好。
大少拉的兩個兒子，我肯定將來一定是不黑心的公道人，因為大少拉識教，大少拉 mind set 極好，不怕蝕底，有諗頭，你看她的 blog，就會發覺她怎樣用心每天做不同的美食給她的一家人，我只能說，款式多過茶餐廳，有幾次我看她的 blog 我會不自覺嚥了一啖口水，然後給她一個回應。
有時間，你去看看，一個家庭主婦，怎樣思想改變運氣。
大少拉 blog：http://hk.myblog.yahoo.com/jw!5Dg6oTOLFRJC.6f2MCPR_A–/article?mid=15079
大少拉，希望今天這篇 blog，可以帶領你的 blog 上到 yahoo 人氣 blog 頭一百位！
