今日要介紹既係稻香酒家，打邊爐好正；不過呢間唔係非一般稻香，而係在大角咀既稻香。

你會問：咁有乜分別呀？好大分別，唔駛等位已經講哂。

一般稻香，永遠都要等位，有訂檯無訂檯都要等位。呢間唔駛，因為你永遠都搵唔到，你只能搭的士去，旺角朗豪坊門口，上的士唔好話去稻香，唔係佢趕你落車，因為朗豪坊就有一間；你要話去新九龍中心。

發音要正確，唔係佢車左你去西九龍中心！

基本上呢間稻香七點前去都好穩陣，打邊爐真係一流，野食新鮮！

環境好坐，雖然人係多Ｄ，不過都傾都計，無隔離果間力奇火窩咁，直頭傾唔到計！

未食之前梗要混醬一番啦，呢度既配料都好齊下：

我特別想 highlight 佢地既廚房。人地既廚房慌死你睇到咁，呢間則剛剛相反，公開哂，透明度甚高！

湯底我地叫左豬骨湯，好好味呀！我地每人飲左兩大碗，我就飲左五碗！係咪男仔係都鐘意飲湯呢？龍嫂無乜呢舖引喎！

呢個蔬菜籃一定要叫，好香甜，好好味，仲有雜菇，好有益！

蘿蔔，超新鮮，超甜！

丸類，都係超好，水餃超彈牙，不過建議唔好淥得太奈，唔係會散哂：

菜肉餃又係推介之選，一粒粒好似會跳咁！

蝦丸墨丸就梗係指定動作啦，好好彈牙呀！

呢個係乜呢？係墨魚滑，又係精選之作，包裝紙有稻香字樣，證明係自家製，零舍不同！

呢個時候，梗有人自告奮勇出黎攪下呢個墨魚滑既，尤其係男人，我都係其中一個，都唔太難唧啫！

牛骨髓，我既至愛，好好味；我係鐘意食無骨既野，懶麻！

雞片，好香，好新鮮！

都唔知係咪前世同墨魚有仇，叫左墨魚丸，墨魚滑之後，仲叫墨魚片，不過又幾好味喎，食果時都唔係好覺重複左：

我地亦特登叫左象拔蚌，二百蚊有找，抵到爛！又新鮮，又大條，放落湯底一淥即食，正呀！

牛肉片都好新鮮，手切牛好味Ｄ！

羊都好味，唔係太羶！

桶蠔好大隻，好鮮甜！

總括黎講，呢餐都食得好滿意！價錢又唔貴，每人二百元左右，好開心，服務員態度 ok，傾到計，偏遠地方真係遠Ｄ搭的士黎都抵！

又係果句，如果你唔係的士哥哥，唔好懶叻咁自己由旺角行入去搵，包你一世都搵唔到，然後死死氣坐的士，跟住唔駛一分鐘就到！

大角咀真係好似一個迷宮咁，條條街都差唔多，而你可以行勻成個大角咀都搵唔到你想搵既地方，真係好佩服係大角咀住既朋友可以正確無誤咁返到屋企呢！

順帶一提，大角咀食野 ok，但住就麻麻地，我嫌佢條天橋一帶都好有煞氣，煙塵又多，我都有幾個客人住果邊，運勢只是一般；反而奧海城果頭就好好，幾個奧海城既客人運勢都 "發發" 聲！

稻香海鮮酒家
地址：大角咀新九龍中心
必食推介：象拔蚌，蔬菜籃
平均消費：每人二百元
分數：＊　＊　＊　＊

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去