書展舉行七日，今天是第五天，我才有時間去看一下。
今年書展有早場飛，如早上去只是十元一位，我和龍嫂卻不知道，買了貴飛，每人要二十五元。
人山人海，一個字，迫！！！
我去書展只有兩個目的：一，看看有甚麼外面沒有的新書；二，聽嘉賓的講座。
在今天下午，聽了兩個講座，一個是倪匡先生講武俠小說，另一個是清洪大狀的座談會。
聽了這兩個講座，深有所感，所以明天及後天會說及我在這兩個講座的得著。
現在先說回書展情況，星期六，日去其實好無著數，閒日去，早上去會好多少。我們由早上十一點去到下午五點多，在離開時，其實是人流的高峰期，人可以多到嚇死你。
隨了書本之外，也有很多其它的東西售賣，例如快譯通機：
現時的快譯通已經可以連上 Wifi 了。我其實有諗個買，因為都係三千多元，可以有多國語言，去旅行都會方便Ｄ，但龍嫂一力反對，我都無辦法。
另一個，叫做新傳媒，乜咁 "新" 既？
再睇下佢出既刊物，原來係新假期成日送既旅遊指南，我都有好多，得閒又換下：
佢既旅遊指南唔錯，勝在好平，廿零蚊有兩，三大本！但現場所見，就要賣到六十元了，我覺得幾貴。
再去另一個攤位。我買了這本：
扭計骰，我諗個個人都玩過，但係無乜人可以扭得番。記得以前細個陣時，我可以扭得番，大概是五分鐘左右。
後來無玩，又唔記得了，而家正好見到這本書，可以幫我再回憶下點玩。
經濟日報，都有好多書出：
我買了一本係講廣告的，可以學多一點 marketing 的東西。
我最 buy 佢書裏面既一句，就係 "唔好諗住 marketing 賣廣告係靠 brain storming，靠撞彩，生意是不能撞彩的，而且公司也不會給 budget 任你舞；呢次唔得，可能下次都唔會搵你了。"
甚確！
想起一直以來合作了四年多的文化會社，他們很有 market sense，每個人都是天才，他們可以在書未出街時，知道一本書賣唔賣得；而且也會和我分享很多有用的意見，例如書名，排版，每次都有神來之筆；我的 "讓別人為你加分"，在他們再次排板及排次序之後，我可以完全不認得自己本書，太神奇了！
所以一直以來都合作愉快，而且每次他們在出版上的意見我也會完全信任，因為我相信他們的眼光及專業態度，每次大家都很滿意！
聚賢館：
如對玄學有興趣，睇下佢既書仔都唔錯，勝在 size 細，價錢平，而且易明，佢既風水天地亦係一本幾好既風水雜誌。
開益書店：
好多人，我都入唔到去。我想介紹係上面 banner 既藍色圓圈系列既書，好似近期好 hit。
大眾，個 counter 做得好大：
而且係紅色，好搶眼！
皇冠出版社：
張小嫻係主打，另外有鄭梓靈，一系列既作家，皇冠都出好多愛情小說。
每次書展，都總有呢Ｄ攤位：
我同龍嫂往年都好雀躍，一買就幾十本，因為佢平，後來發覺，其實都係令你要騰出更多空間去放置佢地而已，所以今年堅決不買，行都唔行入去！
另有漫畫精品，亦係好多人駐足既地方：
仲有圖書義賣，都係廿蚊本：
紅出版，近期大熱，我見到佢地都出左好多書，而且亦有七本係 blogger 寫既，我熟悉既有王耳耳，因為佢有問過我紫微斗數問題。你地有時間就去捧下佢場啦，佢影既相係好靚嫁！
行下行下，見到泛華，即幫我本書發行既發行商：
諗住入去睇下自己既書，點知一本都無，可能舊書已沒有存貨，亦可能無位擺，要放新書，我見到文化會社都有好多書放出來，例如野蠻空姐，林以諾牧師，而舊書則好少；這些都不是我的出版社所能控制的。
另有一間，我覺得好得意：
佢地係賣乜呢？就係你可以將你自己既相片，或文章輯成一本精裝書，你只要下載佢地既軟件就可以做，做完上載番俾佢地，佢地七至十日送到你門口，都係六十蚊咋！平到我唔信！
我幫佢地計，真係成本都未必做得到，我同龍嫂都好有興趣，因為我地都想輯錄一Ｄ相或者文章，咁我地就幫襯左兩本！
另有城邦，佢地有好多相機書，八折：
我好鐘意本攝影學校，但太重，所以第日先買。
行到肚餓，咁就要去吃東西啦，咁就去左出面食小食。
我同龍嫂食左：
燒賣十粒，牛丸五粒，小菠蘿飽兩個，碗仔翅連魚肉一碗，熱咖啡一杯，尤魚鬚一包，咁就收左我一百蚊，我諗食街邊檔一百蚊已經食到我反肚了。
我想 highlight 既係圖中呢位師傅，最右邊果個：
佢係負責燒賣，牛丸同菠蘿飽既。當我將Ｄ飛俾佢，佢好似唔係好情願咁，然後佢睇到大部份我 order 既食物都係佢負責，佢竟然講左句："Why me？"
唔知佢係咪以為我係香港人唔識聽英文，其實我都唔知呢句係咪講俾我聽。我一聽到呢句，頓有所悟，完全解哂碼。
一份佢應該做既工作，一份佢應該做既職業，竟然佢見到係會講 "Why me？"
佢態度都好差下，我覺得係個心裏面講已經好唔應該，因為有呢種 mind set 既人運程一定好差，而且仲要講出口，我唔使同佢睇紫微斗數都知道，佢既一生都會係好悲哀，因為佢運氣會係好差，一生都唔會有乜好事。
我係度諗緊我自己，從無講過 "Why me" 。我又唔係生癌，點會講 "Why me"？
我成日都講，人係要不停正面諗先至會有好運，買左馬，都未跑，就同自己講 "一定輸哂啦"，如諗住輸梗，不如唔好買啦！
我又諗起最近發生左Ｄ好唔開心既事，係有個網友，去信太陽報免費問命之後，不停咁追我，問我幾時覆，我其實真係無義務要覆佢的。
好，覆左之後，登出左之後，又不停咁追問我運程。我同佢講，呢個係免費問命，我是一定不會再跟進的；因為如果不停咁跟進，一來我無時間，二來對其他付費作網上算命既客人都好唔公平。
咁佢又變招，逐個宮位問，例如問命宮有破軍既人會點，夫妻宮有七殺既人會點，以求不停咁逐粒星問，逐個宮位問，可以得到一個完整的網上算命！
這還不算，她還要是每個回應都是私人的，我也沒有那麼多時間呀！這些人，我覺得很自私，自己的問題不停的出私人回應問我，要知道，我回覆的，都是網友們感興趣的問題，而不是私人的回覆呀！
還有，這位網友除了懂問問題以外，甚麼也沒有付出過，天下間又怎會有這樣的事情呢？
到最後，她還不停的追問下去，我只好直說。我以一個比喻來作終結。就是：每天都到雜貨舖門口檢一粒米，以求在若干時日之後，可以儲成一碗白飯；與其如此，何不正正經經買一碗白飯來吃呢？
我也跟她分享，她這樣做，我已經可以解到碼。我說她的運程，也一定不會好到那裏去，她的一生，也只有到處去檢小便宜，而永無想過自己怎樣付出一點去成就大事；她這種態度，和我的人生觀是完全兩回事，簡直是背道而馳，所以我看到她這樣，我很不開心。
明天再和大家分享書展講座的得著，尤其是清洪大狀，他讓我學懂了很多做人的道理及人生觀！
