今天到大角咀看風水，晚上順道約了朋友在大角咀打邊爐，去了一間叫力奇火鍋的，個個都話好味，我又即管睇下：

一看門口，覺得舖位甚為細小，再看之下，原來在旁邊有一個地方，好像是廚房改裝，白矇矇的，像是工廠的食堂。

一進去，非常熱鬧：

大家都有一個共通點，就是大家面上都掛著笑容。經驗告訴我，這類型的地方東西應該很好吃。

先叫湯底，我們叫了豬骨煲，130 元：

呢個係乜湯底，咁多料既？真的是嘩眾取寵，蕃茄都比夠十個八個你，我先試一下湯：

好味到不得了，夠味，仲有些少胡椒味！我建議打邊爐前大家先飲一碗湯先，包你全程掛著笑容！

席間有朋友說，豬骨湯底太肥，面有難色；我心諗，咁你不如食滾水淥菜啦，使乜出黎食飯。

其實久不久一次是ＯＫ的，食最緊要開心，做人最緊要開心；下下就住就住，人生一定會不開心，活得不夠暢快。

豬骨，真好味，大大舊，好正：

再來就是看餐牌了：

order 了之後，新鮮料陸續上檯。先來肥牛，一般貨色，好硬，但後段再碌則好好味：

再來就是蝦膠及墨魚滑，超好味，超新鮮：

新鮮到點？我食蝦膠時是有蝦殼的！

炸魚皮，都ＯＫ啦：

海蝦，我建議必食：

大大隻，一碟有十隻。圖中只有七隻，因為太大隻，太正，還未影相已經被友人拿去放落鍋了。

另外就是桶蠔，也是建議必食，大大隻，成個湯碗咁大，點解Ｄ蠔可以咁大隻既？

最後一提的是生猛南非鮑魚。52 蚊一隻：

點生猛？講你都想像唔到！兩隻鮑魚上檯時會郁嫁！你幾時見過上檯既鮑魚會郁？我一夾落去，佢猛咁噴Ｄ滑潺潺既液體出黎！我諗左好奈，最後都要放落個煲度！

一咬之下，不得了！我以為會好硬，點知相反！非常熟諗，又彈牙，真係意想不到！又大隻，每隻都有手掌咁大！龍嫂話一人一隻就差唔多！

另外下次如果再去，我一定要試蟶子皇（３２蚊一隻），象拔蚌，睇隔離檯 order 左都好似好好味！

埋單只是 760 元，平均每人消費 150 左右，超值！

下次你去時，有數點需要注意。

1. 大角咀，真係一個迷宮，我建議你搭的士去，唔係你可能行左成個大角咀都搵唔到，條條路都差唔多。

2. 佢既椅係無背既，坐完勁腰骨痛！

3. 佢既設計係俾你食野既，唔係俾你傾計，如果你諗住可以好好傾計就唔好去，因為太嘈，你要好大聲對面個朋友先聽到。

4. 早去有著數，最好七點前。因為太多人，同埋即使你訂檯，去到都係要等，我親眼目睹！

力奇火鍋
地址：大角咀角詳街 53 號地舖
平均消費：150 元
必食推介：桶蠔，海蝦，蟶子皇，南非鮑魚