今日，同大家講下個 Case Study，係有關做生意既，呢間就係上環結志街既鮮壽司。

呢間壽司店既老闆同老闆娘都好 nice，招呼都好到加零一，老闆娘仲好靚女，我直頭覺得有港姐水準。但係，食物質素一般過唔一般，結論係，除非免費，否則我都好難再去。

得出一個道理，一間餐廳，食物係好重要，如果野食得，招呼又得，咁梗係一定會再去啦；招呼唔得，但野食好得，好似牛奶公司，我都會再去，因為好味麻；但原來招呼超得，野食唔得，係唔會再去的。

所以最基本既係，野食要好。

黎到呢度，會過五關斬六將，隔離都有好多同類型既壽司店，對面既築地壽司便是一例，我都去過，超得，價錢又唔算太貴：

鮮壽司，以刺身同小食為主，另有烏冬，拉麵等等。我同龍嫂都好肚餓，就先叫一個刺身定食再加幾件壽司頂住肚先，然後睇下再叫甚麼。

環境非常擠迫，全間店只有十二個位，主力外賣（但我地坐左個半鐘個 fax 機同電話都無響過喎）。

先來一些壽司，質素一般過唔一般。

三文魚及帶子壽司：

三文魚唔太肥，都賣得貴，九元……一件呀，即係十八蚊兩件，唔係卦？

我從任何一個角度都睇唔到佢點樣值十八蚊。板前，九元…兩件；羽，九蚊……兩件；峰壽司，九蚊……兩件，以上任何一間都做得好佢好多，佢既三文魚好瘦弱，無乜脂肪（從圖中可以清楚睇到），我諗佢地開呢間店最開頭 concept 係有點問題。

帶子，味道尚算 OK 既，但賣相就……

只得羽既帶子壽司一半 size，點做呀？我相信無一個正常人食完係會再次去食的！

未食前，將件帶子壽司反轉一看，睇到…..

飯粒唔均勻，件件壽司大細唔同，個師傅肯定唔係好有經驗果隻，而且仲幾 "la 西" 添！

接著來的，是蟹子沙律壽司，味道 ok（只是過得去），但賣相……

飯粒已佔了五分之四，青瓜份量適中，但蟹子就極少，而且沙律醬又極少，食得唔過引囉，咁又十八蚊！

劍魚同鰻魚壽司，係比較正常Ｄ既，不過料都一定唔係靚；如果料有分等級，我會定呢度係第五級，即係同元祿一樣，但價錢貴元祿一倍有多！

劍魚睇個樣知道唔係太過新鮮，好在夠凍，都遮掩左個事實：

再來，刺身定食，108 蚊得果幾片：

呢個價錢，可以在下午銅鑼灣吃得到很正宗的刺身定食了！

吞拿魚，來料都唔係太靚，色澤唔豐富，而且口淡淡：

又睇番個壽司飯粒，完全無粘力，一夾就散：

立魚，又係無乜味：

三文魚，厚切會好一Ｄ，但以價錢計，絕對唔值：

跟定食有送麵鼓湯，都可以：

仲有送個螺肉，我同龍嫂講："呢Ｄ都無乜所謂卦，應該味道一樣。"

點知：

螺肉真係有分好味同唔好味嫁，我都係第一次食到次一級既螺肉！

老闆好好人，問我地要唔要汽水，話係送既；我同龍嫂都深感意外，望下隔離檯，無檯有汽水送，點解只係送俾我地？

我話："唔駛啦，我只係飲健怡可樂"。佢地餐牌無，但老闆話睇下有無，轉過頭就在我地檯面見到啦！

原來佢走左出去士多買！咁好人既？

再問靚女老闆娘，佢呢度開左幾奈，佢話一個月度，開左一個月要送汽水，我已經解到碼，祝佢好運啦！

呢間舖在結志街，地利失哂，又唔近地鐵站，人流又無，附近又有咁多間壽司店，價錢又貴過人地好多，仲要食物不太新鮮，質素又差，我真係諗唔到佢點可以再做落去，以我看，一年已經好極限，即使招呼好到不得了，仲有汽水送，仲有傾有講，我都覺得難做。

入貨是一個問題，可能佢地都唔係在日本直接取貨，而貨亦唔係日日到，所以價錢又貴質素又無咁好。

佢地在呢個位開舖，如以咁既價錢同咁既質素，日本人肯定呃唔到，香港人都呃唔到，唯有係呃外國人而已。

又講得真係無錯，我地在吃壽司的時候，全部都係外國人！

不過我諗都好少有返頭客了，佢地應該搵個第二個代理拿貨，而價錢亦要定得平少少。

唔夠飽，又叫多個牛肉烏冬，四十三蚊，價錢合理，湯底都好甜，但唔係烏冬囉！

我諗玩奬門人，蒙住眼估食物，你估一萬次都唔會估到係烏冬，我覺得似上海麵多Ｄ！

睇得出老闆同老闆娘唔係做慣生意，但係好想做好生意既人。不過，做生意唔係你想做好就會做好的，一定要從顧客既心理，消費能力同埋自身貨物質素開始，到搵舖，到定價錢，到裝修，同埋定位係 target 邊一類既客人，全部都係好重要，我希望老闆同老闆娘真係諗諗點樣攪好Ｄ貨，咁先至有得維持。

如夠醒目，睇下對面築地送貨既時候黎既車，睇下佢地攞乜貨，然後跟住入，價錢又定俾佢地平少少，咁樣可能會做得奈少少。

地址: 上環結志街45號地下

電話: 25431166

必食推介: 真係諗唔到

平均消費: 一百六十元

食物質素：　　　　
環境質素：　　
服務質素：　　　　　
物值　　：　　　    　

總評　　：　　兩個太極，免費才去

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去