龍師傅要中六合彩了 – 世紀爛 Gag 王都俾我撞到!

在吃飯的時候,身邊來了一男一女,他們好像是初相識的,男的不斷說笑,女的全無反應,間中勉強回應一下。我和龍嫂聽了三分鐘,大家你眼望我眼,相視而微笑,真的好像是衛斯理和白素一樣,大家心靈相通,大家想的都是同一樣的東西:我們遇上世紀爛 gag 王了!

如果這個世界有十大爛 gag 王的話,那個男仔真的當之無愧!我亦開始明白,點解有D女客人跟我說而家D男仔真係揀唔落手,我真的明白了!如果我係果個女仔,我想還未點菜,我已經想走了。

那個男的明顯是在追那個女仔,所以在席間不停的想著一些笑話,又或者想著一些覺得自己好勁的說話去對那個女仔說。

一開頭,那個男的對那個女仔說:”你估下我信乜教?”

女的說:”佛教?基督教?天主教?” 男的微笑著搖頭。

“我信訓教的!哈哈哈!” 男的自己覺得好風趣,我想這個時候應該有歡樂今宵的錄音笑聲出現!而他也很明顯籌備這個 gag 已經很久了!

男的繼續道:”咁你係信乜教?”

女的回應道:”佛教。”

男的道:”咁你知唔知聖經有分新約同埋舊約?” 真正九唔搭八,人地話信佛教,佢無端端講基督教,我諗佢呢句台詞應該係一早諗好,但個腦轉得唔夠快,所以照講。

他自顧自道:”我對聖經唔係好有認識咋,不過我知道聖經有分新約同舊約。”

其實我都唔知佢講乜,果個女仔更加唔明佢講乜,無以應對。

然後到點菜了,菜單有一味三文魚鼻,他問待應:”呢味菜真係有三文魚鼻?”

侍應回答說是。

他續道:”咁咪要好多條三文魚整出黎咯?”

待應都不知道怎樣回答,我想她正在盤算怎樣答這一個白痴問題。

“即係咁,”爛 gag 王又自顧自繼續道,”牛脷都要有好多條脷啦,一碟牛脷有幾塊咁多!四塊都要用四隻牛整啦!”

侍應和那個女仔都完全無反應,他覺得自討沒趣,又道:”我即係咁舉例啫。”

又充份顯現出爛 gag 王既第二個特性 - 自己以為好笑,別人唧都唔笑!

我在想那個女仔會否笑他無知。牛脷係咪應該好大條呢?我諗一條牛脷應該可以切到幾十舊了。

為人風趣,幽默,很多時候都是天生的,沒有那個 sense,就不要做那樣的事,我也有些朋友堪稱爛 gag 王,別人都轉了去別個話題,他才就剛才的話題再說下去,大家都不知道怎樣應對;又或者,自顧自的說了一些自以為好笑的話,我們聽在耳裏怎樣也不覺好笑,他自己卻笑餐飽!今天我所看到的這位世紀爛 gag 王,就是這類人,我差點想用紙筆記下來,因為他句句精彩,正好用來作反面教材,我和龍嫂都聽得津津有味,我還想過去和他們坐,以便我聽得清楚點呢!因為他說的那些爛 gag,我真的很難想得到,以前歡樂今宵都唔用!

沒有那個觸覺,就不要說那樣的話。如果自己不懂講笑,就不要講笑,唔識講笑但又要講笑,其實都係好勉強的,更加唔會識到女仔。

人最重要係做番自己,其實自己既氣質會自然地表露出來。有人專業,有人沉默;有人風趣,有人鬼馬;最重要的,是找到自己的方向,然後在那個方向去突出自己。

不過爛 gag,可以講學問;不講學問,可以講興趣;總之,梗有一款合你造型,如果唔知都可以去搵造型顧問公司問下。

我曾經就我自己的衣著,談吐,造型,手勢,性格,去找過顧問公司幫手,做回適合的自己,我好珍惜那兩天的專業度身訂造的課程。雖然價錢都幾貴,但都好值得。

換回一個自己專業的型像,可以幫助自己賺回不少的生意,以物值來說我可以講那一次真是超值。

其實現時餐廳做培育出一個專業的服務員並不難,只是有沒有心機及有沒有人去做而已;不過我看很多餐廳都沒有這一類的課程給服務員,所以他們也是照板煮碗去做;其實要留客,食物質素好是必然,服務也是很需要注重的一環;你看我那麼多食評都只是俾三粒星就可以睇到,有好的服務,雖然不能立即給六星,但也可以給四星呀!

要識得講笑,一定資訊要 update,腦亦要轉得快,人不用勉強自己,做回自己最專業的那個工作就可以了。廚師唔會做醫生,醫生亦唔會打金,打金既唔會做裝修,裝修既亦唔會做 Sales。每個人受到父母影響,性格及後天教育的關係,一定個個都唔同,而我亦都深信,每個人一定有其長處;將其長處加以發揮,就一定會成功!

 

>