早前晚上和友人吃飯，由於人數比較多，所以約了在比較旺的旺角區。

倫敦酒樓已經營業多年，它就在朗豪坊對面，山東街及彌敦道交界，地點超就腳，它的前身叫做國際酒樓。但講你都唔信，我咁多年經過無數次，但光顧還是第一次。

一看餐牌，典型的中式菜式，所以我們隨便叫了幾個小菜。

先來一個例湯，是木瓜煲魚及唐排。很香，很濃，雖然落了味精，但也很香甜：

看看湯渣，用料非常充足：

再來就是雞了。它的蔥比泉章居少很多，但雞味則不遑多讓，雞超滑，甚有雞味，我吃後非常滿意：

年尾點可以無魚落肚呀？年年有餘呀！我地叫左個大班兩味，先來炒球，雖然份量唔多，但一人一塊都夠了，好味！

個炆頭腩都好好味，不過生炆就要加三十元。我問個經理，咁生炆即係乜呀？佢話，生炆即係炆咯，好味Ｄ嫁！果然！

大蝦伊麵先至抵食。一百五十八元足有大蝦八隻，好大隻蝦呀，伊麵都好好味！

你睇隻蝦有幾大，一啖咬落去，剩肉！蝦既質地亦爽口呢！

我們另外又叫了桶蠔，不過味道就只是一般了！

好多味蝦呀！呢味係蝦仁炒腰果，蝦無咁大隻，不過都係好爽口！

再來一個近鏡：

呢味先抵死，我都未食過，大家睇下估唔估到係乜黎：

愛黎送飯一流，令我好有滿足，溫暖既感覺，佢係潤腸炒雞粒呀！

飯後送糖水甜品。真係溫暖在心頭，其實呢Ｄ野使幾錢呀？但送齊就會令到個客好滿意！

生果份量都唔少嫁！

席間睇到，好多去食既人都係五十歲以上了。佢應該好多熟客，而且佢價錢，份量都好實際，Ｄ野亦好好食，招呼當然無酒店咁好啦，但都算好有禮貌。

我下次都會再去！

倫敦酒樓
地址：旺角彌敦道及山東街交界，朗豪坊對面
必食推介：霸王雞，大班兩味
平均消費：每人一百六十元
分數：＊　＊　＊

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去