先達寬哥頌

今日有網友問我去那裏買 iphone 好, 因為先達有咁多間, 我可以話俾你聽, 我去買果間, 叫做正源, 我覺得值得推介, 就在此表揚一下.

我表揚佢既原因係:

1. 負責人寬哥, 有問必答, 絕對唔會嫌你煩.

2. 佢好專業, 對 iphone 好有認識. 佢係負責幫人改機既, 咁你可能會問: 識改機有乜咁出奇? 咁你就大錯特錯了, 因為以我所知, 先達入面十間有九間都只係賣改左既 iphone, 自己係唔識改機既, 你問佢問題, 不如問我好過, 我可能仲知得多過佢.

咁如果你去一間唔識改機既舖頭買, 有乜事你估呢間舖頭幫唔幫到你? 梗係幫唔到啦!

3. 佢地既售後服務一流, 絕對唔會叫你買左之後, 有問題再去唔啋你, 寬哥絕對會幫到你!

4. 價錢老實, 佢地賣果個價錢就係果個價錢. 可能你會去到第二間, 睇到價錢會平幾十, 陷阱就係咁來了. 當你俾左錢之後, 佢地會叫你裝字典, 裝手寫版, 裝呢樣裝果樣, 到頭來可能又會貴番幾百, 咁可能會重貴.

我很喜歡寬哥既專業態度. 我成日覺得, 專業既 sales, 係唔使 sell 人既, 只需要引起顧客購買既意慾就可以了. 適當既時候做 closing, 就係最好既 sales. Steve Jobs 就係最好既 sales, Steve Jobs 可以做到香港無行貨, 亦無代理, 亦無 sales 係咁叫你買, 但係就超多人搶住去買!

我今天的電話又有點問題, 去到寬哥二話不說, 幫我重裝, 其實再裝都係幾嘥時間的, 佢免費幫我裝, 真係唔話得!

係裝既時候, 佢請我飲檸檬茶, 我真係覺得好開心, 亦睇得出寬哥真係有一D理念先去開呢間舖, 我仲記得佢問我飲唔飲野, 話檸茶好唔好, 我開頭以為佢叫外賣幫我叫埋野飲, 於是我話: "好呀, 凍檸茶走甜!"

佢先話: "大佬, 我上去樓上舖頭買俾你咋!"

咁我話: "我唔知麻, 咁要甜一樣啦!"

佢真係好醒目, 佢打電話落 order 既時候, 問人地有無少甜既維他檸檬茶, 真係好有心!

咁都不特止, 佢仲問我食唔食野, 然後又攞左個餅俾我, 話在廈門帶過來既, 我真係好開心!

我開心既, 當然唔係一包 lemon tea 或一個餅, 而係佢果種心, 真係好難得. 我呢次係全無幫趁喎!

如你想買 iphone, 你黎呢間包你唔會有錯, 我不敢說你會得到精美茶點一份, 但你一定會被他的專業所感動.

生意就係咁黎了. 我都不停在佢裝機期間想買個電話, 我應該下個禮拜都會買, 因為我想買個電話送俾人.

我鐘意佢果種無所謂, 當你朋友既感覺, 呢個朋友真係值得結交, 因為佢好好人, 所以我亦借此篇幅表揚佢同埋讚賞佢.

如果你真係想出 iphone, 呢間正源電訊肯定係你既不二之選! 下次去,

仲有, 專業既服務, 係唔會講價的, 呢個係老實既商人, 唔好期望去到買 iphone, 仲要好似羅湖城咁要減三百.

我介紹左個朋友, 佢要改三部機, 寬哥一個仙都唔減, 我心中暗叫 "好!"

因為真係太似我了! 專業!

你問, 唔減價就係專業? 我就話係. LV 全年都唔減價, 專科醫生都唔會減價; 我亦係, 風水紫微斗數一個仙都無得減. 除非值得幫既就作別論, 我可以減好多; 如果你問人減價之前, 你應該先問自己, 你付出過甚麼, 你做過甚麼, 要人減價給你?

最怕看到那些所謂師傅, 幫人睇風水可以幾百蚊全包, 我真係好難想像, 如果佢既職業真係風水師既話, 應該執左笠好奈了!

講番 iphone, 而家 iphone 又貴左, 因為來貨非常短缺, 無價講之餘亦未必有貨, 去之前打個電話問定先好.

8GB 都好似賣到四千八了.

我樂意推介, 亦樂於借這篇篇幅去多謝寬哥, 因為佢真係一個好有心既人, 我深深被他感動, 就像我在講座之中感動了我的學生一樣. 有心既人, 真係會感染其他人的!

如果你真係想買 iphone, 亦打算去正源電訊買的話, 記得同佢講, 有個你請過佢飲檸檬茶食餅既人叫我黎既, 佢叫龍師傅, 佢係個 blog 度大力表揚你, 佢都叫你去睇睇, 話要表揚你同埋幫你大力宣傳喎, 原來世界上係有一個咁專業, 咁好既人!

正源電訊
地址: 旺角先達廣場 1/F F28
寬哥電話: 61102244

 

  • sally表示:

     買唔買好呢?又話3G….點好呢??
    [版主回覆06/03/2008 20:51:00]沙利龐, 睇你係咪真係好想快D要, 同埋係唔係真係要3G.
    買呢種潮野, 都係要講時間的, 越快買越好, 如佢出3G, 你又等佢GPS, 出完GPS, 你又等佢太陽能, 咁道氣都已經過哂了. 我相信你唔想係買果陣時, 賣菜既阿婆都係用 iphone. 如果到時你買左既話, 可能你既朋友會諗: "唔係卦? 而家咁老土都用 iphone?"
    所以我成日話市場會決定物值就係呢個道理. 點解新出既潮物會貴D, 又或者名牌又會貴D? 係有原因既, 你俾既, 唔只係部機本身既價錢, 而係你在朋友面前 show 出來佢地果種驚喜表情.
    我不會忘記上年我出 iphone 既時候, 果時度度都無得買, 又貴, 當我用既時候, 真係成條街都望住我部機, 朋友見到都會問下, 我講座既時候拎出來, 又可以當 demo, 其實呢個價錢真係差唔多了, 如果賣到三千元, 咁又週街都係, 又唔輕香了.
    iphone 真係好實際, 介面簡單易用, 又可以聽歌, 仲可以影埋相, 同埋個機身設計真係一流, 佢有好多設計野你睇到會覺得好好既.

  • sally表示:

    好o岩聽….一於買啦! 我已經有 ITOUCH + IMAC +NANO (Older version) +Shuffle….APPLE + LIZATION~~~
    [版主回覆06/03/2008 22:45:00]沙利龐, 既然你買左咁多 apple 產品, 咁你對佢有信心啦, 快D買啦!

  • CalCalvin表示:

    寬哥的專業付出不知不覺地有回報了
    [版主回覆06/04/2008 00:05:00]佢一定有回報, 以我所見, 每次去都有好多熟客搵佢, 佢亦無乜所謂, 好健談呀!

  • 米雪兒表示:

    俾龍師傅衷心表揚勁讚....  寬哥真係一定絕對有好運行!
    [版主回覆06/04/2008 00:18:00]米雪兒, 係呀, 雖然我同佢真係唔太熟, 但我從佢既相格都睇得出, 佢真係一個唔簡單既人, 做生意真係一流, 佢賺得到你錢之餘亦好公道!

  • QQ表示:

    3仔唔知係唔係出行喎呢 ?
    如果係 3豬就好啦
    [版主回覆06/04/2008 16:40:00]QQ, 你好, 已 confirm 會出, 不過係咪佢地係獨家代理就未知, 不過無論佢地係咪獨家都好, 其它既電訊商應該會遲過佢地, 因為睇哂 D gesture, 如果 PCCW 或 Smart Tone 有代理仲唔第一時間公佈咩?
    所以我又可以將呢件事解碼, 終極結果, 一切都等 9 June Steve Jobs 自己既 present, 我一定即時收睇, 好期待呀!

  • 火貪鈴貪表示:

    3 出的 iphone 係 3G
    [版主回覆06/04/2008 16:40:00]Xanadu, 係呀, 3 已經在 29 May 公佈了!

  • 車匙表示:

    我都仲好鍾意我部iphone呀~ 嘻~ 不過佢出3g….我又好想要….但係有行貨賣時, iphone好似好cheap左啦~
    [版主回覆06/04/2008 16:41:00]車匙, 第一批都OK既, 唔知外形有無改變呢? 可能仲有GPS 喎! 而且, Steve Jobs 每次都有驚喜俾大家, 雖然近排少左 "One More Thing", 但都有唔少突如其來既驚喜嫁!

  • 表示:

    龍師傅極力推介得既,相信真係一個保證,依D就叫口碑.  好認同師傅所講既,專業真係無需減價,有D人為做生意,用減價做綽頭,只會做爛個巿,冇得益之餘亦會影響左其他人或同行.
    [版主回覆06/05/2008 23:27:00]瞳, 係呀, 真係俾佢賺條氣都順!

  • Master Pak表示:

    如果你問人減價之前, 你應該先問自己, 你付出過甚麼, 你做過甚麼, 要人減價給你?<= 同意,呢個世界係冇免費午餐架。 講番Iphone,我想問,香港有冇Iphone accessories既正貨賣呀?
    [版主回覆06/05/2008 23:28:00]秋雲兄, 請問你係講邊類既 accessories 呢?

  • Master Pak表示:

    例如earphone ?我係ebay check過,發覺都係香港貨,不過唔係原裝,價錢正路。係呢邊買原裝好貴,我覺得唔值。不過apple既野,又係出名貴。。。所以wonder下香港有冇原裝iphone earphone,知道一下價錢。有冇suggestion?
    [版主回覆06/06/2008 00:18:00]秋雲兄, 係香港, 無. 佢地都係在美國買番黎賣, 超貴, 成四百蚊, 所以D舖頭都唔入了. 正是郵費都蝕埋!

  • Master Pak表示:

    係囉,講得好岩,又唔係有咩特別功能。
    [版主回覆06/06/2008 01:14:00]最緊要舒服同埋型, 呢個就絕對可以做得到!

  • Foon Koo表示:

    哈哈~~~真係受寵若驚,原來你就係龍師傅.
    今朝有位朋友打黎問iPhone,講左陣,佢話晌網上見到有人推介我地公司,我至知原來龍師傅你晌度做'媒".好鬼hardsell呀你,哈哈~~
    講真,我o既行徑咁騎呢都得到你認同,真係好開心,個感覺就好似讀幼稚園o個陣老帥chop左個白兔仔咁.但調番轉講,本身個人唔好,又點會有人對你好丫,呢d野係亙動o既…
    講番新iPhone,我地家陣所知同大家都係一樣,到時出機要跟乜plan同簽幾長約都未知,總之往後有咩新消息,我會上黎同大家交流下架啦.
    [版主回覆06/11/2008 22:56:00]寬哥, 世事真有那麼巧嗎? 我今天就是到你舖頭買電話, 想不到你剛走了, 和你緣慳一面呢! 但回到家, 卻看到你的回應, 這篇寬哥頌配上你的留言, 真是一絕!
    最後我買了, 希望很快又來幫襯你吧!
    在寫這篇網誌時, 只是想表揚一下你這麼有心及好人而已, 沒想到又會給你看到. 嘻!
    看到你的網誌, 原來你也是同道中人, 也有自己的網誌, 看到你在 163 寫的網誌很多, 如果你在 yahoo 寫的話, 一定更多人看, 其情況就如 IE 一樣, default 最多人用. 無計.
    以前我也想著 blog 要亮麗一點, 自己掏腰包走去 typepad 開, 但瀏覽量超少, 而且也只是我的客人去看而已; 在 yahoo 寫, 立即很多人看, 也有一定的回應, 而且亦識到一大班好朋友, 你諗諗啦!
    另有一個很好的功能, 就是你如果在 yahoo 開 blog, 我訂閱了你, 有 update 我就會很快看到了.
    我今日都有免費水同埋保護貼呀! 好開心! 下次我黎到要請番你地!

  • coolu表示:

     無獨有偶, 我也是於云云先達店子找上老實商人寬哥哥幫我改 I-Touch. 那時候想找人改機, 但商場大多數的店員總開天殺價幾百塊. 當我行到寬哥哥的店外, 裡面坐著有鬍子並穿上黑白t-shirt兩男孩, 像時裝達人也像軟硬, 膽粗粗問一問, 寬哥哥就給我一個很合理的價錢且還給我坐在他店子等他改機…因為version問題, 他嚐試多個方法,oh我心想這位人兄真的很用心啊…後來終究成功. 臨走時, 他說有什麼問題可以隨時打電話給他.  所以我一直keep住他們的卡片, 因為我想若有機會買iphone, 我定必會來此店.  因為那裡是可以讓顧客稱心 ~
    [版主回覆07/06/2008 23:16:00]coolucoolu, 係呀, 寬哥確係好好人, 所以我都自發出一篇網誌表揚佢.
    將來買 iphone, 改機, 我都一定會搵佢, 因為佢好可靠, 絕對放心呢!

  • >