上次說過元朗的三上日本料理，今次說說西環店，除了食物補充之外，也有一些體會。

那天我們八個人，不知去吃甚麼好，我就提議，不如就西環三上吧，大家一致贊成。

八點半打電話去訂九時的檯，回覆說沒有問題，還要說只 hold 五分鐘；那好吧，八時五十五分去到，結果……

等到九點十先入得，有無攪錯呀？足足等左差不多一個鐘頭！在攝氏八度的氣溫下！

據門口既服務員解釋（後來才知道是經理，身先士卒，最高級既企係門口吹風），佢話我地八個人，所以諗住比間房我地，點知無人走。

我地個個都在八度既街道上吹風，你話慘唔慘？

不過又慘唔哂，等候期間有人好勞嘈，但我又唔怪得佢地既，天寒地凍，預好位先好確認人地，又要話只留五分鐘，我寧願你叫我地八點九，甚至乎九點先黎都可以，一入黎咪可以即入咯！

等左咁奈既結果，係得到一間房，都唔錯嫁；雖然無暖氣，但都夠暖了！

有朋友問個經理，等左咁奈，有無野送先，都係隨口問下，跟住個經理話送沙律俾我地，好呀，黎到睇下……

嘩，又少蟹子，又無肉鬆，仲要得個飯碗咁細碟，比八碟我地呀？一個人一碟都唔夠啦！雖則係送，但都好似係寒酸Ｄ。

於是朋友又叫個經理黎，問佢：你地唔係咁有誠意麻？送個沙律比我地咁大碟既？

個女經理反應都算快，馬上話：呢碟梗係唔夠啦，只不過係知道你地等左咁奈，所以俾你地食住先啫，跟住會有兩碟黎啦！

雖然呢句說話都好勉強，但都算有誠意；轉頭又黎多兩碟，大家睇下比較就知道相差有幾遠了：

咁大家都好滿意，有時原來多口問一句，係會有著數既！

我地又叫左小食，螺肉，好大碟：

中華沙律，我呢生人都無叫過，我就唔係幾對口味了，但朋友話好好食：

北海道燒蠔當然係必叫之選啦，好正，三十八蚊有三隻，抵到爛！

然後又叫 D 熱食，有金菇牛肉卷，龍嫂話好好食喎！

仲有一個行運一條龍，隻大蝦好新鮮，好好味，口感複雜，真係食落去就百感交集！

三文魚一磅，都幾多嫁，厚切，好鮮味：

特大裝帶子就梗係要叫啦，有朋友話好軟，好驚，唔熟咁食落去好似怪怪，我話咁先至叫鮮味呢！

壽司拼盤。我發覺多人叫壽司，叫呢個拼盤就合哂心意。乜都有，唔駛諗；我日頭已經用腦用到頭爆了，晚上正好休息一下呢！

滑蛋牛肉定食，好正，牛肉有牛肉味，又滑，又係必食之選！

有湯既都叫左兩樣，有差燒拉麵，好好味呀，麵彈牙，差燒又軟熟，真係一個字，正！

另外仲有牛肉烏冬，係手打既，個湯底非常白，非常鮮味，我拉尾直頭捧起個湯碗飲哂佢！

食飽哂了，有個好醒目既後生仔入黎講：你地要乜野甜品呀？經理送既！頭先我朋友一肚子悶氣都無哂了。個經理都算識做，咁樣一定 keep 到客，所以做人最緊要識做。點先可以識做？睇下我既書啦！

甜品有兩種，一種係泡芙，八粒，一人一粒，又係好好味：

雪糕都黎左五六種，都係好好味；有雲呢拿：

同埋有個紫蕃薯雪糕，呢個一定要試，好特別，好蕃薯味呀！

睇番 D "贈品"，一個單球十五蚊，八個都百二了，仲有泡芙，都要廿幾蚊，仲有沙律，都要成舊水，咁送送埋埋都兩舊水？成本我諗十蚊都唔駛，但就可以令到客人開心離去，呢Ｄ就係識做了。

其實個客人滿意，送少少野又有乜所謂呢？我成日都講，用錢解決到既問題，根本就唔係問題，因為你只需要有錢就可以解決得到了；用錢解決唔到既問題，先至係問題。

所以，我地唔好將時間糾纏係一Ｄ用錢解決到既問題上，不如諗下點樣將Ｄ時間分配係諗新野果度好過。橋係最難諗既！

我又諗到，又例如格價，貨比四間係我既鐵律，有時格下價係一定要既，但我有 D 朋友格價格到一百間，咁就唔需要了，格得黎，有時幾個月，都 outdate 啦！

三上日本料理
地址：西環卑路乍街百佳對面
必食推介：北海道燒生蠔，湯牛肉烏冬定食
平均消費：每人百五元
分數：＊　＊　＊　＊（一定要去）

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去