今天要介紹的，是中等級數的火窩館　－　火湯匯：

地點在謝斐道，好易搵，正正在銅鑼灣廣場對面，地鐵一出對面就到。

環境不錯，以火窩店來說算坐得舒服：

另有海鮮 counter，師傅就是在這裏預備海鮮了。

這裏有一個好處，就是吃東西免茶免芥免加一，所以食既時候無雜費，叫左幾多錢一計就知。

先來混醬，這裏的醬料選擇很多，十二種你一次過撈哂都得：

龍嫂撈左一碗，佢叫做 "百感交集"，真係喎，一點落去真係乜味都有，唔知係咪講同我一齊既感覺呢？但我做人真係好簡單喎，而且絕不含糊，一就一，二就二；定係講我見既客人呢？如果係既話，我絕對同意，到我出新書既時候有排講，呢個世界真係乜人都有嫁！

撈左醬之後，要叫湯底，我建議要叫燉湯，上次叫個豬（月市）湯，好味到暈，今次試下個花膠螺頭湯底：

湯未到，梗係要叫Ｄ即刻食得既野先啦，刺身最好，先來個三文魚：

又幾好味喎，出去叫三文魚真係好穩陣，尤其係在唔係專食日本野既食店裏面，三文魚大概是最簡單的刺身了。

不過三十八蚊我略嫌貴左少少！

然後到象拔蚌，一百八十八元：

味道好鮮甜，但比起上次去稻香果碟，差唔多價錢，但大呢度成三倍有多，所以都係稻香抵食Ｄ！

湯底來了，足料：

個湯都好好飲，佢係咁既，湯唔會用黎打邊爐，大家要飲哂佢，料就放落去火窩度再煲，等個湯底出哂味，咁你飲呢個燉湯就可以飲好多湯了。

睇真Ｄ料，真係好足，花膠都好大塊，而且螺頭又好大舊，好好食呀！

值得一提係佢既骨，你睇下有乜特別：

睇落去可能唔知，但其實佢係一入口即溶化，好神奇！有邊度既豬骨係可以成舊骨咁食？我諗佢係用左高壓煲，呢Ｄ要問煮餸另既朋友先知道了。

湯底來了，我地叫左豬骨湯：

個湯底都算可以，雖然有落味精，但因為成本問題，我可以接受，味道仲唔算差。

四寶丸，指定動作，好新鮮：

碌熟左既牛肉同墨魚丸都好彈牙，確係令我地食得好滿足：

呢個綠野仙踪一定要叫，好甜，好好味，蔬菜好新鮮，我地食哂，一件不留：

桶蠔又係我其中喜愛既打邊爐配料之一：

一百一十八元，都算抵食，真係好鮮甜，碌完之後入面都好軟熟：

靚到暈，我一啖已經食左！

牛肉就麻麻地，呢個肥牛要九十八元：

食完只係覺得一般，建議你唔好叫肥牛，牛柳粒會好Ｄ！

呢味魚麵，好特別，因為係要自己唧出黎既：

唧落去都幾粗，五十幾蚊，抵食，係墨魚黎既，好鮮甜，當然好過食烏冬又或者公仔麵啦！

招呼一般，埋單四個人七百幾，每人兩百元唔到，以地點來說，算係便宜之作。

上次唔記得左叫乜，四個人食千二，呢次印象都係叫差唔多野，唔知佢係咪減左價。

下次想食得好又坐得舒服Ｄ，可以考慮呢間，好處係地點就腳，無限時，無茶芥加一，唔好處係牛肉一般中既一般，因為打邊爐牛肉係靈魂黎嫁麻！

以質素來說，佢比有骨氣差少少，但有骨氣又多人，又要限時，重要唔平！咁去邊間你自己可以取捨下！我覺得整體都唔錯嫁！

火湯匯
地址：銅鑼灣波斯富街24-30號寶漢大廈地庫(銅鑼灣廣場一期向謝斐道正對面)
必食推介：四寶丸, 手唧麵, 墨魚滑, 綠野仙踪
平均消費：二百元
分數：　　　（一定要去）

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去