這兩天忙個不停，下午在寫字樓見客，晚上再到新界看風水，再回到寫字樓已經是晚上九時。

上環有一個特色，就是九點後大部份食肆都已經關門，即使仍然開著，也多是準備收舖，用料唔慌新鮮，在無選擇的情況底下，我和龍嫂決定了去尚興。

皇后大道中近皇后街一帶，以前有三大潮州舖佔據，分別為尚興，兩興同埋斗記，再加上出名的潮州巷仔，在香港幾乎無人不識。

後來斗記沒有了，就只剩下尚興及兩興，兩間都係差唔多，勁掠水；我話既唔係佢既菜式，而係佢既雜費；仲有，食野要睇佢口面，你聽過未？龍嫂都話頂佢唔順，但野食就極度好味，睇下你點取捨。

未叫菜，先來個功夫茶，潮州舖梗有：

飲緊茶，佢黎多兩碟小菜，有花生，好脆，炸得好香！

仲有咸酸菜，清甜，咬落去有好多汁，零舍開胃！

以上三樣我稱之為 "雜費三寶"，我建議一定要食哂佢，因為全部雜費唔係野少的，不過都好好味，價錢為：

茶位：HK10 x 2 位 = HK20
花生：HK10
咸菜：HK10

夾埋四十元，可能你話：唓，晚飯差唔多啦！我就睇下個百分比，如果一百頭，雜費等於 35%，都幾貴了！

不過你到最後條氣會順番的，一陣先講，睇下佢個餐牌，紅色，好醒神！

牆上都有菜式介紹，拍得住大酒樓嫁：

我同龍嫂得兩個人，又唔可以叫得太多。

先叫一個荀粿，三十元半打，黎到先知係咁樣既，好像潮州粉果：

一吃之下，對了，就是這個味道了，皮很有彈性，如果你喜歡吃潮州粉果的話，這個一定合你心意！

中間還有蟹柳，我想是改良過吧，以前的潮州菜才不會有蟹柳呢！可能老闆自己鐘意，放了些少進去也說不定。

再來一個炒三鮮，味道很香，只嫌鴨掌比較少，不過兩個人食也算可以了。

我最喜愛的沙爹牛河。大大的芥蘭，河粉也很有沙爹味，醬汁濃，啱哂我！

其實沙爹牛河係咪咁難做呢？我去過很多地方，吃的都是垃圾，唯有正宗的潮州舖可以做得到。一般茶餐廳做的都不好吃。

吃得飽飽，埋單了，才發覺除了收取高昂的雜費之外，他們有兩樣東西順番你條氣。

一：唔收加一。

二：送糖水，而且唔係普通糖水。呢度有無潮州人呀，講唔講得出呢碗係乜東西？

答案係綠豆爽加清心丸，你有錢出面都無得食，只係得正宗既潮州舖先有，旺角打冷既唔算數。

下次你經過上環，不妨黎呢區，兩興尚興任你揀，兩間都好正宗。

尚興
地址：上環皇后大道中
必食推介：荀粿，沙爹牛河
平均消費：八十元
分數：　　　（一定要去）

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去