下畫和龍嫂撐檯腳，而下畫傾計又舒服價錢又經濟的，最好係去時代廣場既鐘菜。

一睇價錢，非常經濟：

有人即問，嘩龍師傅你有無攪錯呀？十八蚊一碟小點都話平？絕無攪錯。係，佢正價係十八蚊碟，銅鑼灣下畫買位都係呢Ｄ價錢，但呢度正價你都要訂檯；不過我講既係下午茶時間，兩點半後有六折，咁經濟喇卦？

佢仲有咖啡飲添，稍為高級既酒樓都會有咖啡飲，呢度飲仲送埋個 cake 俾你添呀！

仲要留意多一樣野，呢度無加一，無茶介，咁兩個人都慳番廿幾蚊了。

我無叫咖啡，因為剛剛在自己寫字樓飲完，暫時未需要充電住。

我們叫了數個小點，再加上呢度最出名既瑞士汁雞翼，然後等食。

先上茶，我們叫了壽眉：

咦？咁趣緻既？黎左個白牧丹？茶係壽眉無錯，而白牧丹我就未聽過了，白牡丹我就聽過。

我鐘意食既鳳爪，係少有既有骨而我又鐘意既，佢做得好腍，好好食，好入味，鐘意選骨既人一定不能錯過：

蒸蘿蔔糕，好少有酒樓做得好食，呢間係其中既一間：

佢勝在有蘿蔔味，蘿蔔絲都食得到；而且配料用足，大大隻蝦米：

山竹牛肉，好彈牙，我好滿意：

三式腸粉，三條不同既腸粉，一次過試勻哂，好滿意，腸粉皮做得好滑，好薄，睇得出師傅既功力：

叉燒包，我去飲茶必叫，做得非常好：

俾個內容大家睇下，用料好靚，絕無肥豬肉，食落又唔太甜，抵食！

再來就是主角瑞士雞翼了，一碟有六隻：

圖中只得四隻，因為我同龍嫂見到已經忍唔住，一人一隻，邊食邊影。

個汁完全唔係瑞士汁。不過算啦，瑞士都無瑞士糖啦，最緊要整得好味，而佢真係整得好好味，我覺得同太平館有得揮，但佢買四十八蚊咋！

佢最機智既地方係，佢每一隻雞翼都切頭切尾，令到你一咬落去好易食到Ｄ肉，而且排骨一Ｄ都唔難，用左手單筷子都可以分開，真係做得好有心機。

食完我地好滿意埋單走了，又坐得舒服，點心又好食，埋單一個人六十蚊都唔駛，已經有酒店級數，仲想點呀？

鐘菜
地址：銅鑼灣時代廣場 10/F 1001 舖
必食推介：瑞士汁雞翼，山竹牛肉球，鳳爪，三式腸粉，叉燒飽
平均消費：六十元（下午茶時間）
分數：　　　　（特登都去）

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去