金利來賣領帶就聽得多，佢地都有整野食？無錯，係中環蘭桂坊，佢地有一間概念店，叫做 Goldlion TSR 生活概念店。

整個概念店分開四層，一層係食中菜，一層係 Salon，另外兩層係食西餐。我今日下午路經中環，又要經歷 "俾錢買位"。試想下，中環有一百萬人返工，整個中環都無一百萬個位啦，所以度度都咁多人！

上到蘭桂坊，見到呢度有得食午餐，價錢 HKD108.00 per head，好啦，就試下啦！

一開門，見到個環境都唔錯，絕非一般西餐廳可比。夜晚有 fine dining，我呢餐都當係 fine lunch 啦，因為環境靜局，傾計一流，招呼都算可以。

睇下個餐牌，都好多野食喎！

四樣野，比你會揀乜呀？我就揀左牛扒！

佢地都玩 semi buffet，沙律，生果同甜品係自助既，餐飽，湯，主菜同咖啡就得一份，但都好夠食了！

先來個飽，都幾硬下，我平時都食唔慣硬飽，所以都唔敢話佢好唔好食：

值得一提既係佢地用既刀，好特別既，你會睇到刀柄比較闊身，手感一流！

再來看看沙律自助吧，午餐黎講都算多選擇，我最鐘意中間既薯仔！

午餐都食唔到咁多，只係一碟已經夠哂數啦！

其實佢比客人自助都好醒目。講真，食得你幾多呀？即使你唔食早餐，當 brunch 咁食，我諗食兩碟都已經好飽了。但咁樣反而令到個客心理上覺得好抵；

薯仔好好味，生果都好甜，用料都幾好下！

肚裏感覺冰冷，跟住黎一碗熱羅宋湯，好暖胃呀！

羅宋湯好濃味，佢地都幾用心機去煲！

接著來到主菜了，牛扒真係香甜，伴左芥棘汁，配合埋牛扒既味道，絕配！

只是略嫌多筋左少少。不過佢又唔係牛柳，多少少筋係情有可原的，而且牛扒極為鮮味，我可以收貨。

最後，到甜品時間了，佢有兩個選擇：

我只係揀左其中一件餅，因為實在太飽了：

好食，但不算太過突出。點形容呢？即係美心西餅，你食落會話，ＯＫ咯，你又唔會嘔番出黎，但係咪真係好好食呢？我又唔覺得了。

熱咖啡，佢係用咖啡機仲既：

香滑，佢地用既豆都幾濃。

櫃面都算整齊，三五知己黎傾下計都好有氣氛既！

係呢度食午飯，我先覺得似食飯咯，因為中環你比三四十蚊都只係買個飯盒而已，位都無得你坐。

要坐，咁就等下啦，等半個鐘都唔出奇！

黎到呢度，唔訂檯都有位，一招手又有人黎招呼你，環境清靜，絕對唔嘈，你可以用心食飯；又無人趕你走，可能係上樓既關係吧，晚上人都唔會太多；我試過有一次晚上來，都即刻有檯，不過消費略貴，大概三百零蚊一個左右，不過食既野當然唔同！

下次去開中環，想食番餐舒服Ｄ既飯的話，呢度絕對係你既不二之選！

祝大家新年快樂！

Goldlion TSR 生活概念店
地址：中環德已笠街21號
訂座電話：25267712
午餐價錢：120 per head
分數：＊　＊　＊

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去