早陣子本來想去太平館, 點知去錯左南華餐廳, 今日一於再去, 終於入對門口了!

等位都等左半個鐘頭, 佢呢度又真係幾多人的, 但我覺得超值, 只要在七時前進場, 應該唔駛等超過十五分鐘.

一入到去, 要拎個 menu 睇下封面, 對了, 這次真是太平館了:

太平館我去過佐敦兩間, 這間反而未去過, 因為次次經過都好多人, 唔知佢地既水準係咪同其它分店一樣呢?

睇番佢地既介紹, 原來已經有百幾年歷史了, 大過你同我阿爺, 我諗果時我太太公都未出世:

睇番呢個分店地址, 我先知原來中環都有, 我都唔知添!

如果唔知想食乜, 呢度有個2人套餐, 不過我地今次無叫, 因為我想食肉醬意粉:

呢個餐亦係最多人叫的, 埋單都要一百五十元一個, 但我覺得超值, 因為佢出品既味道, 係無一間舊式餐廳可以比較的, 即使酒店級數, 我暫時只想到 Ritz Carlton 既龍蝦伊麵可以同佢 fight 一 fight 而已.

我地決定散叫兩樣, 其實散叫都唔係咁貴, 都只係七十多元而已, 埋單兩個人, 唔駛兩百蚊已經落到樓:

睇下上面, 唔知點解雞絲河要貴牛河廿蚊呢?

我地最後叫左肉醬意粉, 同埋瑞士汁炒牛河.

先來肉醬意粉, 完全對辦, 絕對無令我失望; 我諗即使有乜野唔開心既事都好 (不過我都好少, 因為我常常改變思想去遷就事實), 我見到, 食完即刻笑得番!

男女朋友嘈交都好, 入到黎個女既一食, 我諗都即刻收聲:

我諗佢有幾好食真係唔駛我講既. 大家睇下以下張相, 就知道我所言非虛. 我而家都好想食:

意粉好諗, 好豐富口感, 完全吸收左肉醬既味道; 而肉醬則好油, 但因為佢油, 才會令佢非常好食!

再來到瑞士汁牛河了, 我覺得亦無須多講:

夠熱, 夠滑, 雖然賣到八十元, 貴過何洪記, 兩興同尚興,  但我覺得係兩樣野黎既, 直頭係另一個級數, 食完呢碟牛河, 先至係真正食過牛河!

再來一個近鏡牛肉, 睇到都好食到想死!

汁醬口感豐富, 河粉亦好入味, 唔經唔覺, 在我影相時, 龍嫂已經食左一半:

再來唔駛三分鐘, 我已經食埋另一半:

以上張相就係最好既證明, 我好少食到咁齊整既, 真係全部食哂!

咁既食物質素, 雖然只有一般既招呼, 但我都毫不考慮極力推介佢! 仲要俾佢五粒星!

太平館
地址：銅鑼灣白沙道6號
必食推介：瑞士汁牛河, 肉醬意粉, 瑞士汁雞翼, 瑞士汁乳鴿 
平均消費：一百元
分數：　　　    （特登都去）

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去