講你都唔信, 本來今日同龍嫂一心要去銅鑼灣太平館食飯, 點知去錯隔離的南華餐廳, 唯有將錯就錯, 聽日先再去太平館補番數.

點解會去錯呢, 因為我地都無去過呢間太平館, 而這間南華餐廳剛巧在隔離, 裝修又好似差唔多, 所以有此一錯, 都算係經典了; 我做左咁多年人都未試過! 可能當日有鬼也不一定, 明明望住太平館, 但入左去隔離門口, 最離奇係我同龍嫂都唔覺, 埋單先知道, 連餐牌都係差唔多風格!

我們叫了兩個餐, 分別是焗海鮮飯及蟹蓋牛柳餐, 雖然不是在太平館, 但價錢卻拍得住太平館, 而且極多人!

服務員為我們擺放餐具, 都算整齊:

未來主菜, 先來餐包, 溫拿牛油, 夠經典呀:

味道只是一般, 麵包只有微溫, 而且質素平平無奇!

湯, 我諗金寶湯都好過佢:

湯邊唔係太乾淨, 而且湯入面有一舊舊, 都唔知係咪交黎既湯.

先來牛柳焗蟹蓋, 賣相幾得:

蟹蓋都好入味, 但要成百元, 抵唔抵你自己諗過了:

個牛柳都唔錯, 我地要五成熟, 整得好好咁上碟:

一切開, 非常對板, 肉汁香甜, 正到暈:

焗海鮮飯, 成個餐要成百二元, 我覺得好食, 但只值七十八:

食完黎個甜品, 喱哩, 舊式餐廳都係呢D了, 唔通俾個 cheese cake 你咩, 睇開D啦!

餐茶一杯咖啡, 一杯檸茶, 都係咁啦, 無呃你, 蒙住眼都飲得出既, 但都唔駛提啦, 普通過唔普通:

花奶為黑白奶. 算啦, 幾十年都唔會變咯:

南華餐廳, 有人請, 勉強好過花園既, 但都好勉強啦, 以呢個價錢黎講, 去到花園可以食兩餐了. 所以我唔知佢地既賣點係邊, 唯一賣點就係在太平館隔離, 博D人等唔到太平館就入黎咯; 又或者, 好似我地咁, 睇唔到就入黎咯.

南華餐廳
地址：銅鑼灣白沙道8號地一
必食推介：牛扒餐, 焗海鮮飯
平均消費：一百三十元
分數：　　（可以一去）

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去