下畫在銅鑼灣，又未到見客時間，於是走去食午餐。

想試下新野，其實有間係景隆街既壽司店我都想去既，新開，價錢又唔貴，係翠華隔離，又無人，不過最大疑點係無人，所以最後都係無去。

去左呢一間：

Japanese Curry Shop BEE！

呢間我都有無數咁多次過門而不入，因為覺得佢既食物無乜特色，但呢次見佢無人，門口又好香下，於是就試下啦，下畫係銅鑼灣五十零蚊一個午餐包湯包咖啡仲想點！

入到去，馬上好似去左日本，除了裝修似日本既地道餐廳之外，連服務員都唔係香港人，好特別。

我選擇左親子飯，即係雞肉蛋飯，貪佢無骨，呢間日本餐廳環境都唔錯，都好有日本 feel 下：

大家睇下圖中既服務員，佢係乜人？我都唔知了，只知道佢唔係日本人，而且佢其他同事都唔係講廣東話，我諗佢係泰國人，又或者菲律賓人。

先黎前菜，好好味下：

甜蘿蔔再加瓜，簡簡單單，都已經係好好既前菜了！

再整多舊凍豆腐你嘆下，好特別，口感好好：

湯亦唔錯，雖然都係麵豉湯，但佢既味道好特別，同一般既絕對唔同，好鮮味呀！仲有舊豆卜咁既物體，都好好味！

到主菜親子飯了，反而一般，但都可以接受；起碼係日本米，雞肉超香，但我嫌佢汁唔夠；話得係親子飯，梗係比細路仔食啦，細路仔食飯最鐘意撈汁，所以親子飯一定要多汁，如果 D 蛋可以整得無咁熟就好了，咁蛋黃可以流落去碗飯度，一定香死了！

你睇 D 珍珠米幾圓！有 D 日本餐廳叫飯俾絲苖米，真係當人地傻既；十年前就得，而家 D 人一睇下次都唔會再去啦！

呢間餐廳好實際，用既料我相信都唔平：

餐後既咖啡都唔錯，嘆下咖啡，閑坐一下，都好開心！

食飯，一個人有一個人既快樂，兩個人又有兩個人既快樂，一班人又有一班人既快樂喎！總之食飯就係好快樂！

又想起一些一百磅仲嫌自己肥既女孩子，係咁節食，我覺得情緒都會好受影響下，無野食，人又唔開心，又無心機，減完亦唔知為乜；其實以相學黎講，有肉既人係會有福氣，以前皇帝都鐘意超肥既楊貴妃啦！

辛苦搵黎志在食，所以人都係要食好Ｄ，咁樣先至有心機去搵錢！

Japanese Curry Shop BEE
地址：銅鑼灣謝菲道（總統商場對面）
必食推介：親子飯
平均消費：每人六十元
分數：＊　＊　＊（可以一去）

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去