今天, 我要介紹比板前更勝一籌的壽司旗艦店 – 板長壽司:
老闆 Ricky San 也真的有生意眼光, 分店開完一間又一間, 為甚麼呢? 這就是識做生意和不識做生意的分別了. 第一, 他永遠只開在旺區, 例如銅鑼灣, 尖沙咀; 第二, 在板前壽司開了六, 七間分店之後, Ricky San 馬上重新包裝, 再開四間板長壽司; 價錢貴一點, 但來料完全一樣, 不過我比得好願意! 點解呢, 睇落去就知道了.
現時 Ricky San 在無線做特輯 "和味無窮", 我保守估計都要六十萬一輯, 一做十輯就係六百萬, 唔通咁又嫌貴? 如果你有時間, 不妨去下板前望望, 你就知道呢六百萬俾得值唔值了.
我另外覺得 Ricky San 好有腦既係, 根本佢而家都唔駛賣廣告, 板前已經排哂隊, 但佢依然要賣廣告, 只係建立個品牌而已. 出到去全世界都識, 咁我覺得佢都好滿足了, 名利兼收!
說回今日要介紹的旗艦店 – 板長壽司.
他們現時有四間分店, 我去的是銅鑼灣分店. 我六點去, 唔駛等而直入, 如果你在樓下的板前, 一定沒有可能. 這裏唔駛排隊, 有三個原因, 第一我來得早, 六點都未有乜人可以收得工; 第二佢係樓上舖, 樓上舖係會差少少; 第三係佢既價錢貴一點.
這就是用錢買時間了, 每個人的心態都會不同, 我則每天都在用錢買時間呢.
入到去, 地方舒服, 座位也會大一些, 而所用的餐具也很一體化, 全部都有板前 logo:
再看 menu, 精美無比:
這裏有一個特色, 就是壽司是每件計的, 不像樓下的板前, 每次都是兩件, 我和龍嫂可以吃到自己喜愛的壽司, 真好! 例如龍嫂, 佢要兩件帶子壽司, 我則要一件; 我想要鰻魚壽司, 龍嫂不要, 我又可以只叫一件.
再睇下佢個 order 紙架, 又令我諗番起花板壽司, 而板長壽司則好聰明, 個架係一層層的, 好易拎:
先來一個海鹽墨魚壽司, 口感超好, 味道由於加了海鹽關係, 非常入味, 亦很有水準!
呢碟蟹膏甜蝦壽司, 龍嫂叮囑左我三次, 話一定要推介俾你地! 必叫! 盡在不言中! 蟹膏既鮮味, 再加凍凍既甜蝦, 飯, 紫菜, 食完我都無話可說了!
墨魚鬚壽司, 又係必叫, 因為佢好爽口, 同埋只係每件五蚊咋, 其實都唔係貴板前好多(板前賣九蚊兩件).
呢個湯在板前是沒有的, 叫做蝦湯, 最特別既係佢有年糕, 個蝦湯簡直鮮味到暈! 好濃既蝦味, 煲到奶白色! 如果唔係龍嫂叫住我, 我早已經飲哂, 唔記得影相了!
值得一提的是, 這碗湯只賣十五蚊, 而且也很大碗, 絕對不是麵豉湯那種碗, 大家放心叫! 叫兩碗都得! 茶餐廳例湯都賣九蚊碗啦!
蟹棒壽司, 一貫之作, 好味, 不過今日好似乾身左D, 但都可以入口!
三文魚壽司, 好鮮味! 五蚊件, 又係比板前貴少少!
鵝肝壽司, 呢次係我自己講, 必叫! 鵝肝香滑, 入口即溶!
燒三文魚壽司, 龍嫂話普通, 但都可以, 絕對唔係唔好食!
海膽飯, 廿五蚊, 好正, 海膽冰凍, 新鮮! 入口即溶, 你睇下未入口已經溶就知道啦!
油甘魚, 勁好味, 我食到嗌救命! 最有畫龍點睛作用的就是面頭那點東西了! 成件油甘魚香哂!
帶子壽司, 十蚊件, 好抵食, 佢有三個級數, 我覺得中價果隻會好D, 因為呢隻比較細:
食完, 都係時候埋單了, 我地食到唔識郁, 都只係食左二百一十八蚊, 在我而言我覺得超值, 而且好似仲平過板前喎. 可能每樣都可以叫一件吧!
唔駛等位, 招呼好, 野食勁好, 仲想點呀? 快D聽日就去啦! 我建議去銅鑼灣呢間最好, 因為上左樓, 要等位都有冷氣. 而灣仔果間, 係軒尼斯道 Starbucks 隔離, 如果入唔到去, 只係食塵, 入到去, 個(月市)都已經積塵了!
呢間我俾夠佢五粒星, 因為無論在各方面, 都令我太滿意了!
板長壽司
地址：銅鑼灣東角道24-26號怡東商場2/F 281-282 舖
必食推介：蟹膏甜蝦壽司, 鵝肝壽司, 帶子壽司, 油甘魚壽司, 蝦湯
平均消費：一百一十元
分數：
（特登都去）
（分數指南：以六個太極最好，無太極最差。）
無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去
BONUS BLOG – 商場谷客入去睇絕招
食飽飽, 又係時候行街街了, 今日就在離開板長壽司的時候, 見到有以下情況, 我地想出去, 三個靚女攔住我地, 唔俾我地出去:
點解會咁樣呢? 原來怡東商場裝修過之後, 人流一直唔旺, 背後都有好多原因, 而其中一個係商場入面收唔到電話, 真係神奇!
另外樓下都無乜人行, D人只係上去, 樓下個入口超細, 根本D人就唔會入去.
其實你睇番成個環境, 大家都知個問題係邊啦! 入口超窄, 而且無野吸引, 所以都一定要靠呢三位靚女攔住, D 人先會入去, 我同龍嫂係俾人攔住既情況底下, 仲要夾硬走出黎, 你話樓下呢堆舖係咪死到唔死?
計我話, 權宜之計就係門口整個大招牌, 有咁光得咁光, 咁樣會吸引到人流; 另外在夏天時, 個冷氣有咁大得咁大, 咁樣D人就自然會被吸入去! 再加埋D音樂, 咁D人都會入黎睇下啦! 佢一樣都無做到, 我唔明呢間商場既 marketing 係點做既! 唔通又係覺得嘥錢, 所以無做?
再睇下個商場入口, 又係無門線既, 我早幾日都話過門線係幾咁緊要, 呢間商場真係漏哂氣, 真係板長入黎進駐都一定帶旺唔到佢! 我亦肯定佢地無搵人睇過風水.
希望商場既管理層睇到可以改善下啦, 我都想佢地好! 咁大個商場, 仲係崇光隔離, 如果做唔住, 真係有點可惜!
