我常說，如果你想學習感情技巧，你必然要看一些真實的個案；而我的 blog，就有大量真實個案給你參考。

如果個案不真實，那看來做甚麼？感性文章，感性作家，就最擅長半夜一人分飾數個角色，像二十四個比利一般，努力寫你最想看到的事情，而讓你感覺良好，但你看了之後必然對你的感情毫無幫助。

看真實個案，再加上我的分析，你看了，必然會讓你的感情知識大增。

​今天就有網友跟我分享，她在網上交友，遇到了不少有問題的男人，她一一都能夠清楚看到；而同一時間，她也不禁問，為甚麼一直都遇不到適合的對象？

讓我來分析一下。

​F 小姐的來信

龍師傅您好，先自我介紹一下。我今年27歲，樣貌正常，很喜歡打扮，朋友經常都讚我很懂穿衣，有份穩定且壓力不大既工作，係大家眼中既乖乖女。

（龍師傅註：你其實條件不錯，你在來信附上相片，我也覺得你的五官生得很標緻，入場券你是有了，餘下來的，就是你的溝通技巧，你的想法，你的手段。）

本身屋企家教都算嚴，細個果陣無太多機會出去social。朋友大部分都係讀書年代認識既，物以類聚，朋友既社交圈子都唔大。

（龍師傅註：這會是一個問題，如果自少家教很嚴，出來社會做事社交圈也可能不太廣闊，這要靠後天改變；隨著自己出來工作之後，如果自己有心，就可以改變。）

加上之前自己既思想比較唔理性，愛情呢樣野雖然渴望，但只係以平常心，守株待兔既心態去看待，所以一直都係得個吉。身邊既人，包括屋企人都會覺得好奇怪，問我係咪唔想出去拍拖? 又或者覺得只係我要求太高?

（龍師傅註：如想法感性就比較不容易找到對象。另一方面，如果你很被動，也不會有很多機會。

桃花運强的女生，清一色都是很主動的，這點請你記住。）

決心用「交友app」係去年因為工作關係，有幸去國外工幹，當時好開心，確定一切工作既行程後便第一時間約實移民當地7年既中學同學，與她碰面及一起觀光。

（龍師傅註：如果社交圈子不大，網上交友是很可行的方法；當然網上交友有很多都不是好人，但你一直有看我的網誌，所以你也會很容易分得到。）

整整7年冇見，呢位同學已經成為左人妻，後來得知呢位同學既老公係佢當年移民冇耐，因為想練下英文，所以就開左一個當地都幾hit既交友app account，無心插柳+機緣巧合之下認識左對方，後來好自然就拍拖結婚。

（龍師傅註：絕對是，很多人都有一個誤解，就是網上交友的人不認真，不會有機會找到認真的對象拍拖，結婚，其實不然；相反，我有很多客人及網友都是透過交友軟件而認識異性，然後拍拖，結婚，所以我一直都很贊成用交友軟件認識朋友。

也當然，網上交友質素可以很參差，自己就一定要有認清適合對象的能力，這很重要。）

聽到我係感情方面咁多年依然冇着落，呢位朋友非常鼓勵我都玩下呢D app。

返到香港之後，就的起心肝開左account，玩佢玩既果個app。點知match到而又有交換contact既2個都係sales男 - A男 & B男。

（龍師傅註：自己要小心，但不用太過擔心，因為你有最强的軍師 - 龍震天，你看我的網誌，你不難發現這些浪費時間的人，及早掉頭走開，就可以了。）

A男 & B男 (美容男 - Sales男)

雖然當時我仲未開始睇師傅您既blog，不過一直都覺得佢地「好得過份」:

A男: 聲稱係co-founder of a new start up company，炫富，send一堆生活照，用template秒回whatsapp

（龍師傅註：這些必然在最開始的時候就知道，尤其是說自己做生意的，巧立名目的，說了一大堆也不知道他是做甚麼的，就有機會是混吉的。

又 Co Founder 又 Start Up，一聽就知道有問題了，即使開始時不知道，只要你有問下去的能力，問多兩句對方必然答不上來，因為他根本就是混吉的。）

B男: 講到自己好錫屋企人，好乖好孝順，用template於既定時間回覆whatsapp (其餘時間我只會見到我覆佢既message得1 tick)

（龍師傅註：這些也不難看得出來，因為很快就打到一大段文字，必然是 template，而不停有舖排地說自己如何孝順，如何愛小動物，又很快拿出生活照，必然是一早有預謀，這些都是 sales 來的，一定要避開。）

直到有一次B男連珠炮發式邀約 (交換contact後短短幾日)，因為實在係約得太快太急，我就同佢講：「未來呢2個禮拜都唔得閒，遲下先!」

但佢完全無視我個答覆，好冇禮貌地再offer另一個within 2 weeks既日子，就係因為佢chur到咁所以加重左我既疑心，最後竟然俾我check到B男用既電話號碼其實已經俾唔同既人report過，B男係一個chur到爆既sales。

（龍師傅註：對，因為是用 template，而且同一時間和多人對話，所以少你一個不少，但他就不會有心機個別再和你作 follow up，所以只好不停約你出來，你不出來他就下一個，就是這樣。）

咁我就順勢check埋A男，發現A男用既電話號碼都係同樣被好多人report過係sales，所以當時就直接block左佢地既whatsapp，無再聯絡。

（龍師傅註：這是明智之舉，可以在網上看到；但更亮麗的，是你一開始時就知道。）

之後我就冇再玩果個app，轉用第二個比較多本地人用既app，雖然都match到唔少人，但可以develop到deep conversation既就寥寥可數。加上傾既內容都好一式一樣，開始會覺得悶悶地。

（龍師傅註：自己也要想，是對像找錯，還是自己也是「悶悶地」的類別？去到這裏可以客觀審視。）

C男 - 黑心+搵食男

直到後尾遇到C男，佢講埋D當時我覺得好eye catching既野，例如話：「我真係好有興趣認識你」之類既廢話，而當其時我用交友app既資歷尚淺，亦都仲未開始睇師博您既blog，所以傻下傻下就好快將我電話比左對方，佢仲要過左1星期先add我whatsapp，一黎講唔夠2句就話約出黎食飯 (宜家諗返，其實就當時大家既對話情況，自己其實都未有初步了解過對方，而且個男仔又咁hea，約出黎真係好哂氣)。

（龍師傅註：去到另外一個重點，就是認識了解不夠，必然不能出來，因為有機會浪費你的時間。）

出黎果日係一個星期六，我地去左食lunch，AA制，之後去左附近行左陣 (俾佢抽左2次水 - 手放左係我的背上面: 一次係我一路行一路講緊個urgent電話，另一次係臨走佢送我去到地鐵站口say goodbye果陣)，咁我梗係趁機縮開走人。

事後，佢有send message俾我話：「thanks for the lunch」，但當我覆左之後佢就無再覆任何野啦。

開頭我仲要有少少唔開心添，問自己到底有咩做得唔夠好。後來，有一日無意之中，就係網上發現師傅您既blog，及後又聽埋「情到龍匙」Podcast，真係令我獲益良多，宜家諗番，好彩當時無再同呢位C男有任何交涉，如果唔係蝕得仲勁。

（龍師傅註：第一次見面吃飯就要 AA 的男生，必然不值得交往，這是鐵律。）

​汲取上一次既教訓之後，我都唔感隨便再約人出黎，而係先以對話內容既邏輯性去判斷對方值唔值得交往；當中都過濾左唔少搵食男 - 一黎就狂問你幾時得閒約出黎又或者專講咸濕野既人。

（龍師傅註：對，要出來，最少要看到男方真誠，而且有誠意，而且有興趣去了解你，這才是追求的過程；而不是說了兩句就約何時出來，這種男生最浪費時間。）

亦有一d完全只係想線上交友既男仔 - 即傾左3個月，亦沒有意欲約出來 (雖然我已經暗示過，比哂位佢約佢都唔約，最後我就狠下心藍剔左佢)。

（龍師傅註：有些可能志在談談而已，這種人也必然不值得交往。

也要審視自己，是否沒有很快判斷對方是否適合的人的能力，所以我也看到你浪費了不少時間在這些問題上。）

D男 - 自卑型黑心男

另外，我同一個D男都keep住傾左3個月whatsapp，聲稱做ibank，成日話自己係"toxic guy"，"forever alone"，姑勿論呢d形容詞係真係假，冇女人會鐘意無自信既男人掛? 

（龍師傅註：這些也不適合。）

加上，第一次食飯 (佢提議食放題) AA制，而且佢外貌唔討好 (滿目瘡痍)，加上性格古怪 - 最憎女仔化妝；搽指甲油；stereotype左做空姐既女人都係好bitchy，同班紀律部隊最match 之類(聽得出佢滿口歪理)， 所以雖然食飯後佢都有不停搵我，但最後我都係狠下心藍剔左佢。

（龍師傅註：這種人沒有自我審視的能力，而且很負面，絕對不值得交往。）

（龍師傅註：別人做甚麼我們控制不到，但我們可以控制自己做甚麼；這樣的男人，真的不交也罷，我也在之前的網誌不停提過。）

F男 - 又係黑心男?

後來，我match左另一個樣貌正常，講野都正路既F男。傾左2星期左右，大家大概知道對方工作性質，工作地點，興趣等，就約左出黎食晚飯。

佢一共搵左5間餐廳俾我揀，我filter左3間俾返佢make final decision，但佢好有風度咁比我做final decision，然後佢就負責book枱。

當晚，佢比約定時間早到左，係餐廳門口等左我一陣，但因為我仲未到佢就先去洗手間，後尾我準時到達，但因為佢去左洗手間，調番轉我係餐廳門口等左佢一陣。

點餐果陣，佢問我想食咩，然後佢負責落order - 我地叫左2個set dinner，main course就share，最令我意想不到既係當食物黎到果陣，佢先夾意粉落我個碟度，然後再夾俾自己。

出於禮貌，之後我見佢食哂自己碟入面既野，都有主動夾番比佢。原先諗住，終於有個好少少既開始啦，點知埋單果陣，佢主動先比cash (該餐廳只收cash)找數，餐飯總共食左HKD 450，而當我拎左銀包出黎問要夾番幾多果陣，佢毫不猶疑就話：「HKD 200啦」。

我個心當下即刻沉左一沉，但表面當然係保持微笑。

回程果陣，因為大家住得好近，只有一個地鐵站之隔，我地一齊搭地鐵離開。

到站後，我先落車。未出閘，已收到佢個message，thank you返我payme比佢。

上到地面，我見落雨就同佢講左句：「咦，落雨喎」。

然後，佢就問我有冇帶遮，佢自已未出閘可以搭返轉頭比把遮我。

不過，我自己有遮，所以就無麻煩佢。

之後大家都有keep住whatsapp，隔左2日後佢就問我有無興趣睇一套電戲，我話google下先，然後又借機會問佢幾時會去睇，當佢話depends on my schedule果陣，我即刻扮無知話：「下，我以為你想介紹我同我朋友去睇架咋」，佢即刻話係想同我去睇 (有鑑於佢之前既表現，我都冇即刻答應，只係話考慮下先。」

佢都無chur我，只係話：「no worries, take your time!」然後又傾其他野。

再過多2日，本身我已經狠下心藍剔左佢，諗住大家唔搵大家就算，點知佢又主動搵番我講野，傾傾下又再約我去唱K (當然我都係話考慮下先) 。

F男做既野有部分都算係可取，加上我身邊又無乜好對象，咁到底仲應唔應該比多一次機會佢?

抑或，其實呢個只係一個手段高明既黑心男?

（龍師傅註：還是那個鐵律，第一次約會就要 AA 的，99.99% 都是黑心男。

如果你覺得值得博那 0.01%，那就可以繼續，不過，你損失的，會是時間。）

睇左龍師傅咁多篇blog, 當然知道第一次見面就AA制既黑心男都係不值得交往，免得浪費時間。

不過我都想弱弱地請教一下師傅，以上提到約我出黎既男仔全部都係AA付款收場，而佢地主要係大我5年內又或者係同年既，會唔會係呢個generation既人都習慣左同朋友出黎食飯夾返自己果份，所以唔覺得約一個女仔出黎食飯要有唔同既gesture?

（龍師傅註：其實不然，最重要是你要找一個對你好的男人，而你現時也當然有機會。

你認識的男生，到去到三十出頭了，這個年紀還要女方付費？

如果是這樣，真的不如不認識。

經濟獨立不停 AA 的男人的等價交換，就是你自己也經濟獨立，你想要找一個人陪你，而不會介意全部都 AA；我也有客人是這樣的，她們大部份都是專業人士，她們也不需要男生有甚麼經濟上的付出，只需要男方想生小朋友，對自己專一就可以，這就另計。）

去到呢一刻，我都已經有d心灰意冷了，Mr.right個影都仲未見到。定係其實我命裡註定冇好姻緣?  

隨信附上本人的近照給師傅，如方便的話，麻煩師傅指點一二。

萬分感謝，祝師傅身體健康，業務蒸蒸日上。

（龍師傅註：看樣子你是完全沒有問題的，關鍵只在於你在開始時是否有效過濾的人，不要浪費自己的時間。

​另外，你當然也要留意自己的溝通風格及技巧，你自己也要客觀審視；因為我沒有見過你真人，所以無從評論，有時候，你的小動作，你的身體語言，你的思維及想法，也會是找到合適對象與否的關鍵。

希望可以幫到你，也希望你的經歷可以幫到其他朋友。）