始終銅鑼灣係我最愛去既地方，今日又想去銅鑼灣食飯，心目中已有地點，一係去崇光地庫二樓，一係去崇光四樓。

去到地庫，發覺一個午餐都要百二，加一要一百三十二，而且食得都比較 heavy，我又無咁既胃口，於是上去四樓，崇光 Cafe City  21：

在門口，已經見到有好多美食，價錢算貴，七十零蚊食一個 main course，加廿蚊有薯仔沙律同埋咖啡，夾埋都要一百蚊，但嚴格黎講都係在街邊食咋，因為你係出面食時外面行商場既人都會望到你。

咖啡都有好多選擇，但我其實係無選擇，因為俾多廿蚊跟餐只係得招牌咖啡：

佢呢度既咖啡有一個特點，就係採用虹吸式沖煮方法，呢個方法好處係萃取率好高，差唔多所有咖啡成份都幫你煮哂出黎，所以杯咖啡好入味，最好係沖藍山；但唔好處係時間太過長，程序亦太繁複，而且有某些咖啡豆取味過多會變酸，所以最好係出去飲。

我數年前自己都有玩過虹吸式咖啡，亦要買商業用酒精，用火係下面慢慢煮，後來亦買左全自動咖啡機，半自動咖啡機，到後來只用磨豆機磨豆，再用全自動咖啡機沖煮；因為我發覺磨豆機好重要，一杯好既咖啡，七成原因來自磨豆機，而半自動咖啡機沖洗比較麻煩，而且沖煮時間較長；對於非常懶惰的我，在質素可接受既程度底下，都係用番全自動咖啡機。

呀！講講下離左題，因為我太鐘意飲咖啡了，講番 UCC。我叫左個番茄湯意粉，再加廿蚊食埋沙律同飲招牌咖啡。

我入左去裏面坐，心理上好Ｄ，唔駛係出面俾人望住；大家一齊食互望我就無乜所謂，但係行街既人唔係同你一樣 channel 睇住你食野始終怪怪地：

先來沙律，毫無疑問俾足滿分；好入味，個薯蓉整得好好，夠凍：

再來番茄湯海鮮意粉，真係一般到唔一般：

我食落去，只感覺係金寶湯再加白恰意粉；雖然佢既湯我知唔係金寶湯，但都無乜特別。

以佢既口碑計，無理由會整得咁差，可能一時失手，我下次都會叫第二樣試下，因為幾年前未裝修之前都唔係咁差既。

最後咖啡來到，好入味，飲完亦好有感概，因為多年無飲過虹吸式既咖啡了，直至最近才在鈴木喝過，而我又想起幾年前自己沖煮既過程。

佢係用愛護牌 cream，完全對板；個 cream 對一杯咖啡都係好重要的。有人會話黑白奶已經係最好，我話一山還有一山高，你試過愛護牌既 cream，你就會知道佢既分別，味道萬中無一，一飲落去就知道；不過自己係屋企一個月飲一杯就唔駛買了，因為佢一盒都好大。

有上過來搵我算命既客人都會知道，每次我算命都係沖一杯咖啡，然後開盤，呷一口，又講下，呷一口，又講下，那種滿足感實在難以形容，味感交雜，思路特別清晰，而且也很嘆！

人生絕對應該要享受的，對嗎？

SOGO 4/F UCC
地址：銅鑼灣 SOGO 4/F
必食推介：蛋沙律, 咖啡
平均消費：一百元 (午餐)
分數：　　（可以一去）

（分數指南：以六個太極最好，無太極最差。）

　無太極：一生不去
一個太極：被迫才去
兩個太極：免費才去
三個太極：可以一去
四個太極：一定要去
五個太極：特登都去
六個太極：一生必去