早前有客人想租舖做時裝, 問我意見, 因為她看中了上環一間舖頭:

此舖如果做裝修, 冷氣, 地產都無大問題, 因為未必很靠人流, 但如果做時裝, 我覺得麻麻地.

客人說因為隔離有兩間舖做時裝, 覺得有得做, 我則覺得租了這些舖, 未必可以賺很多錢, 因為人流太疏:

上環其實真係一個做舖幾難做既地方. 高格調又不會, 起碼差過中環, 銅鑼灣, 灣仔, 旺角, 尖沙咀; 而且一到晚上, 就好似宵禁那樣, 搵多個人傾計都無.

唯有一些開正在路口位, 如果價錢平宜的話, 就好一點, 好像這間鞋舖, 是在文咸東街路口位:

因為它在路口, 所以有兩面單邊, 個門口都很闊:

租是貴了一點, 但買了人流, 也比中環便宜, 上環 target 平價貨, 合極! 我的客人做中價貨, 我覺得開在上環有點難度.

上環另有一處, 做生意也甚講技巧, 地點在文咸東街及禧利街交界:

呢間辦館, 無三十年都二十年, 繼續營業, 因為在路口, 而且賣生果, 仍然做得住.

你睇呢間舖王, 除了橫跨文咸東街及禧利街之外, 孖沙街也連埋, 真係食正龍脈:

又近地鐵站, 真係一絕.

除了賣生果及汽水之外, 果汁也有, 所以話果汁利錢幾重! 我想和咖啡不相上下!

對面果間就無咁好彩了:

呢間呢, 以前叫做家家樂, 係快餐店, 招呼極好, 也易搵, 因為在路口位, 但東西非常一般, 捱左咁多年都要執笠:

都係果句, 租太貴, 夜晚無生意, 賣得又平 (二十七元一個飯), 又唔係太好食, 所以好難回本, 生意真係難做!

明天介紹一間在上環有得做既食店, 係西龍飯糰同老細開既, 留意了, 真係好好味!