早前和大家分享過上樓舖是否有得做，今天和大家分享一下一些做生意的心得。

講開做生意，真係十日十夜都講唔完。做生意係一門好複雜既學問，不過十成做生意的人，七成都是將做生意看得太過簡單，以為自己有腦，有本錢開檔，咁就係生意。其實唔係，做生意個頭要開得好，但守業更為重要，好多人都創到業，但就係衰在守業那一關。

守業，係靠自己專業既態度，keep 住熟客，咁先有得做，如果唔係，只靠生客，不出一年會執笠。

做生意，唔熟唔做。好多人都會半途出家，咁就無得做。

例如做咖啡店。見人地 Starbucks 賣咖啡賣得咁好，以為利錢好，自己開一間，咁又有得做。如以做咖啡店為例，我覺得係好難做。

我大大話話去過超過二百間上樓咖啡舖飲咖啡。我可以話，能夠令我滿意既咖啡，不出十間。

咁其它果百九間既咖啡店點解唔好飲，佢地唔想沖好Ｄ咩？唔係，佢地係想沖好Ｄ，不過佢地係無能力沖得到。

我有個朋友，走去上左個咖啡開業課程，咁就話想開咖啡店。我問佢，沖一杯咖啡係點沖？佢講唔出。我諗教佢咖啡開業課程既導師都講唔出。

大部份人，都係同我呢個朋友一樣，鐘意飲咖啡，咁就以為可以開咖啡店。其實除左鐘意飲咖啡之外，要自己識得沖一杯好飲既咖啡，咁先至可以有資格諗下開咖啡店。

好簡單，我一講 Espresso 既沖煮方法你就明。一杯 Espresso 既沖煮，係用 7g 既咖啡粉，用 30cc 水，在 9 個大氣壓力下，以二十五秒沖煮完成。

我就以上既問題問過好多人，好多人都唔知，包括我果位想開咖啡店既朋友。

如果基本既沖煮方法都唔知道，咁點做？沖出黎既咖啡一定好難飲。

除左 Espresso 之外，Latte，Regular 都有其獨特既 formular，如果唔知，一定做得唔好。

好多人想開上樓咖啡店，以為裝修下，有Ｄ特色就可以開檔，其實係本末倒置；開一間咖啡店，最重要既當然唔係裝修，而係杯咖啡好唔好飲。

如真係想開檔，就一定要熟果行。去邊度入靚既咖啡豆，點樣煮，用部乜野既商用咖啡機，其實都係好緊要。

然後就係搵舖，行多幾條街，上多Ｄ人地既咖啡店，一定學到野。

我以前去好多間上樓咖啡店，大部份咖啡店都係杯咖啡唔好飲，咁我下次一定唔會再去。

諗真Ｄ，做生意唔係自己主觀既願望，而係實際上既運作，本錢既運用，成本既控制。