西餐廳你食得多，扮高級既西餐廳你食過未？我就試過，佢叫飯廳。

一聽個名，真係以為佢係高級西餐廳，睇價錢，四百蚊兩個人食龍蝦，我覺得貴花園少少。所以我覺得應該係食得比花園好Ｄ，誰不知……

佢地既擺設都好特別，燈光稍暗，完全係高級西餐廳格局。

不過食野除左環境之外，食物質素，服務態度，都係我既考慮之列。諗起八字既得令，得地，得勢。如果三樣都得，即係身強，咁一定係好野啦；如果三樣著埋兩樣都唔得，咁即係身弱啦！話之你裝修到皇宮咁啦！

我同龍嫂當然無食龍蝦，我地食左扒餐，一百零八蚊個，先黎個湯：

白湯都ＯＫ既，紅湯就……

超咸，我開始明白點解隔離幾檯飲完個紅湯貶哂咀了！

呢度招呼其實都真係幾差的。我同龍嫂飲湯既時候，等左好奈都無包，咁就問佢地有無包跟，個服務員先拎比我地。

呢個蒜蓉包係全晚之中最好的了，好軟熟：

上菜都算快，不過可惜啦，身弱，無得醫。

主菜，鵝肝同牛扒，都幾好味，肉質唔錯：

鵝肝都幾大塊，同 Ritz Carlton 梗係無得比啦，但都可以入口，到我既主菜，紐西蘭牛扒：

我特別叫左個 Cappuccino，廿八蚊，比我想像中差，無奶味，又唔滑，我覺得都好行貨下：

龍嫂要杯例牌咖啡，一睇落去，當然唔係 my cup of coffee 啦，僅次於即沖：

最抵死係佢個奶 mug，裂紋清晰可見：

任何一間餐廳都唔會咁卦？

跟住黎一個 "自家製甜品"，龍嫂滿心期待，點知：

嘩，真係自家製喎，整粒咁既啫喱糖加少少椰絲，好似小學家政堂咁。龍嫂睇左好奈，拉尾到無食度。

條氣唔順，咁再叫多個梳乎厘啦，四十八蚊，一黎到，又係……

士多啤梨超酸，橙超酸，梳乎厘又好甜，開始明白點解太平館食呢味甜品要早一日前去預訂了！

埋單時睇清楚，咁橋佢有張海報，原來係同鴻星同一個集團既，哦……

自從上次同龍嫂用左一千蚊食左個係門口臨時降張檯兼招呼勁差既大閘蟹餐後，我都好多年無再去過了！

所以佢地既服務員有咁既態度，我至此已覺得一Ｄ都唔奇怪了！

佢地既服務員一Ｄ都唔專業。

1. 我地叫餐茶既時候，個服務員走埋黎問：係咪埋單？

好趕咩？定係雙眼睇唔到？睇下檯面就知道未黎啦！

2. 話得佢扮高級西餐廳，自有其原因。席間有結他手現場伴奏，完全無 eye contact，只係跟住樂譜彈同唱，我走埋去睇下，有埋歌詞嫁！你幾時見過人地上台唱歌拎埋歌詞上去唱而唔望觀眾呀？

呢間餐廳我覺得佢可以做得更好的，只要加多一點 training，在食物上用心一點就可以了。例如甜品，你整碗紅豆，又或者比個美心蛋糕我都好呀，整粒啫喱糖就話係自家製甜品，離譜Ｄ卦？

飯廳
地址：將軍澳中心，荃灣中國染廠大下地下，銅鑼灣霋東街
必食推介：牛扒唔跟餐，咖啡自己去 Double Star 買
平均消費：每人一百三十元
分數：＊　＊

（分數指南：以六粒星最好，無星最差。）

無星：一生不去
一粒星：被迫才去
兩粒星：免費才去
三粒星：可以一去
四粒星：一定要去
五粒星：特登都去
六粒星：一生必去