11 3 月, 2008

今天要介紹的,是我超過十次過門而不入的壽司店,花板壽司。

看地方,總覺得它的食物不錯,而且每次都無人,無論早,午,晚,佢都無人,唔駛等位;不過它的最大疑點,令我卻步的,也是它無論何時都無人。

經驗話俾我聽,呢類型既店子一定唔好食,但今天和龍嫂終於按捺不住,在門外商量了十分鐘,然後入去。

當侍應大聲叫 "以拉沙以媽些" 時,我和龍嫂感覺到像是行了一條不歸路!

其實以位置計,佢輸哂,位處景隆街,只有寵物店可以長期開得住,隔離既舖頭,好多都執左,連對面既拉麵街,都係做左幾年,而家變做電腦中心,我一睇,又係頂多兩年貨仔,呢D係死症,無得醫!三審之中,呢條街係失令,失地,失勢!

同區好既壽司有板前,長期迫爆;羽壽司,又係長期迫爆;除左D野好食之外,佔哂地利亦係其中一個因素;所以我成日都同客人講,做生意唔係貪平租既,寧願貴D,細D,都要去最旺既地方;我有個客人同我講過,佢永遠係好心急,佢賣衫除左租家樂同女人街,就係家樂同女人街,永遠唔會租元朗,天水圍,商場既靜舖。家樂講緊六萬蚊租,女人街講緊十三萬蚊租,而偏遠既商場可能只係七千蚊租而已,你地自己諗下呢個道理。

我地七點鐘去,都有少少人,環境也算乾淨:

我地開始劃壽司,我發覺好趣緻,佢既單有唔同顏色:

趣緻既係,佢地唔同顏色係用人手用螢光筆劃上去既,有乜用?

原來係咁:

佢地想著咁樣可以分清楚,但我覺得真係好趣緻!

人做每樣事情都有其動機,咁樣係浪費時間,我已經即刻解到碼,即係佢地好得閒,無乜生意,你諗下板前,佢地真係得閒到咁劃?我諗唔會了!

其實好簡單,開頭印既時候印唔同顏色咪得咯,使乜咁麻煩!另外一樣我解到碼既係,呢間店既老細係完全無做過生意,而且諗頭極差!同埋佢既伙記或經理諗頭都係極差!我都無做過食店生意,我都諗到;全間店無一個人諗得到???唔係卦?

壽司來了,第一碟係蝦壽司,質地唔錯,好彈牙!

有件好似係豆腐,叫一次已經足夠!

油甘魚,佢地話係空運到港,但我覺得都唔係咁甜,唔通空運然後放入雪櫃三日先拎出黎賣?

帶子,我認為係好好味既,但佢有兩個價錢,三十五元同二十五元,一定要叫二十五蚊果隻,因為兩種既 size 係完全一樣嫁!

牛肉壽司,都比較少有,我覺得都 ok 既,但就唔係啪入口果隻了!

蟹柳,人地板前賣十二蚊佢又賣十二蚊,但佢好乾,我又可以憑佢咁乾去解碼呢件蟹柳……嗚嗚…..佢已經…….已經…….放超過六個鐘頭啦!驚唔驚呢?

即係話午餐放到而家都無人食過,而佢係咁在個迴轉檯度轉左六個鐘頭,真係幾驚喎!

三文魚,佢做得 ok,但三文魚度度都有,而且大部份都好味,我唔會因為呢樣野而加分俾佢!

吞拿魚腩碎壽司,都 ok 啦。

最頂引係呢件鵝肝壽司,開頭諗住二十五蚊就幫趁佢啦!點知:

鵝肝 size 又唔一樣,燒出黎出面熱入面凍,又無賣相,連舖好佢,整得靚靚地都費事,我都煎得好過佢啦!

另外仲有海膽,咁既質素點會賣二十五蚊呀?你話用馬糞海膽我都覺得唔值,更何況一定唔會啦!

尤魚壽司,九蚊兩件,咪就係尤魚咯,絕對係一件尤魚,絕對唔會有奇蹟!

甜蝦壽司,係我認為好味既壽司,不過我去吉之島或 Citysuper 都一樣啦,又係無得加分!

我地臨尾食左十三碟,我心算最叻,因為我成日都要鍛練腦部,我計落就二百二十幾,但埋單佢二百零幾。如果做生意打單,照計都打錯,以一間咁大既壽司舖係絕對唔可以原諒既。

咁即係話,佢地既計算系統都有問題,可能太新卦?

另外一提既係招呼方面,你入到去記住講野要加 echo,即係每樣野都要講兩次,第一次佢地會應你,但係唔會幫你做既。我唔知係咪忙到咁,不過睇落應該又唔係既,只不過係佢地唔專業啫,我自己都覺得煩,倒茶奉旨無,叫仲要叫兩次,連埋單都係要叫兩次。

我想提一提埋單,我覺得好離譜,一間咁大既壽司店,入哂 system 都要計錯數,埋單既時候計少左三十幾蚊,我同龍嫂心算都已經知道,我覺得係一件不可原諒既事情。

做生意,就係賺錢,點會計錯?真係唔知呢間係乜舖頭。

睇番網友講呢間壽司,原來佢又有機會計多左數喎,真係離譜:

http://hk.myblog.yahoo.com/bonita_lo/article?mid=2425&suc=1

佢地既老闆真係要好好檢討一下!

BONUS BLOG:八達通吊飾

食飽飽,行過隔離,發覺有間賣八達通吊飾既,都好得意,女仔一定啱:

你睇佢個心形吊飾幾靚?真係睇到都鐘意呀!

花板壽司
地址:銅鑼灣景隆街 24-26 號地下
必食推介:無
平均消費:一百一十元
分數:* *(免費才去)

(分數指南:以六粒星最好,無星最差。)

無星:一生不去
一粒星:被迫才去
兩粒星:免費才去
三粒星:可以一去
四粒星:一定要去
五粒星:特登都去
六粒星:一生必去

關於作者

龍震天課程

龍震天,玄學家,作家,擅長替客人分析感情問題,推算姻緣運,一生運程,同一時間也是課程講師;出版書籍超過三十本,題材包括心理學,身體語言,行為解碼學,男女感情技巧,男女感情個案分析,感情理論,潛意識,改思改運等等。


服務詳覽:

http://lungcourse.com/service

分享
Facebook LikeFacebookWhatsAppLineEmailSumoMe

四天戀愛溝通術


原價 HKD2,680,現時 免費獲得!

「四天戀愛溝通術」免費獲得!


四天網上課程讓你了解男女關係如何用適當方法,包括誘導術,心理學,潛意識的控制,讓每個男人都為你做你想他做的事,說你想聽的話!

>

想知道 { 桃花萬人迷 } 的共同秘密嗎?